Nehemiah 6

¹Na gũgĩkinya atĩrĩ, atĩ Sanibalati, na Tobia, o na Geshemu, ũcio Mũarabu, o na arĩa angĩ a thũ ciitũ maaheo ũhoro wa atĩ nĩnjakithĩtie rũthingo, o na atĩ hatirĩ ithenya o na rĩmwe rĩtigarĩte rĩa kũndũ kũrĩa kwarĩ gũtharũku, (o na harĩa o na hĩndĩ ĩo itekĩrĩte mĩrango ya ihingo-rĩ),

²Sanibalati na Geshemu makĩndekanĩria, makiuga atĩrĩ, Ũka tũcemanie gatũũrainĩ kamwe ga tũtũũra twa bũrũri ũrĩa mũgũu wa Ono. No rĩrĩ, maacirĩire kũngera ngero.

³Na niĩ ngĩkĩmarekeria andũ, makamere atĩrĩ, Ndĩ na wĩra mũnene mũno ngũruta, na tondũ ũcio ndingĩhota gũikũrũka njũke. Kaĩ wĩra ũngĩgĩtithia hĩndĩ ĩrĩa ndĩũtigĩte ngoka kũrĩ inyuĩ nĩ ũndũ kĩ?

⁴Nao makĩndekeria andũ mahinda mana makĩnjĩraga o ro ũguo; niĩ na niĩ ngamacokagĩria ũhoro ũtariĩ o ta wa mbere.

⁵Hĩndĩ ĩo Sanibalati akĩndekeria ndungata yake ihinda rĩa gatano, o ta mahinda marĩa mangĩ, nayo yarĩ na marũa matarĩ makũnje me guoko kwayo;

⁶na thĩinĩ wamo kwandĩkĩtwo atĩrĩ, Ũhoro nĩũheanĩtwo ndũrĩrĩ-inĩ, o nake Geshemu nĩoigaga ũguo, atĩ wee mwene, o na Ayahudi, mwĩcirĩtie mũreme mũthamaki, mũmũũkĩrĩre; na atĩ ũndũ ũcio nĩguo ũtũmĩte wake rũthingo rũa itũũra rĩu; o na kuugagwo atĩ nĩwe ũkwenda gũtuĩka mũthamaki wao, o ta ũrĩa ũhoro ũcio ũheanĩtwo ũtariĩ.

⁷O na ningĩ atĩ nĩũtuĩte anabii amwe aheani ũhoro, maheanage ũhoro ũgũkoniĩ kũu Jerusalemu, makiugaga atĩrĩ, Gũkũ Juda nĩkũrĩ mũthamaki; na rĩrĩ, ũhoro ũcio hihi nĩũkũheo mũthamaki o ta ũrĩa ciugo icio ciarĩtio itariĩ. Na tondũ ũcio gĩũke tũgĩe ndundu ya ũhoro ũcio.

⁸Ngĩgĩcoka ngĩmũtwarithĩria ũhoro, ngĩmwĩra atĩrĩ, Hatirĩ maũndũ o na marĩkũ mekĩtwo ta macio ũkuuga; no rĩrĩ, nĩ gwĩthugundĩra ũmethugundĩire na ngoro yaku.

⁹Nĩ gũkorũo andũ acio othe mendete gũtwĩkĩra guoya, makoiga atĩrĩ, Hihi moko ma andũ acio nĩmekũhinyara, maremwo nĩ kũruta wĩra, naguo nĩũgũtiga kũrutwo. No rĩrĩ, wee Ngai, ndagũthaitha wĩkĩre moko makwa hinya.

¹⁰Na niĩ ngĩgĩthiĩ mũciĩ wa Shemaia, mũrũ wa Delaia wa Mehetabeli, ngĩmũkora ehingĩire gwake nyũmba, akĩnjĩra atĩrĩ, Nĩtũcemanie nyũmba ya Ngai o kũu hekarũ-inĩ thĩinĩ, tũcoke tũhinge mĩrango yayo, nĩ ũndũ andũ acio nĩmegũũka gũkũũraga; ti-itherũ ũtukũ nĩguo marĩũka gũkũũraga.

¹¹Na niĩ ngĩkiuga atĩrĩ, Hĩ! Nake mũndũ ta niĩ aakĩũra hihi? Ningĩ-rĩ, nĩ mũndũ ũrĩkũ ũngĩgĩkorũo atariĩ ta ũũ ndariĩ ũngĩgĩtonya hekarũ-inĩ nĩguo atĩ ehonokie? Ndingĩtonya kuo.

¹²Na niĩ ngĩgĩcoka ngĩona atĩ ti Ngai wamũreketie, na nĩ Tobia na Sanibalati maamũhakĩte.

¹³Naguo ũndũ ũyũ kĩũmbe nĩguo watũmĩte ahakwo nĩo, nĩ getha ndĩĩtigĩre, njĩke ũndũ ũcio, njĩhie; na nĩ getha mone ũndũ wa gũtũma maheane ũhoro wakwa mũũru, nĩguo mone njĩra ya kũ’menithia.

¹⁴Atĩrĩrĩ, wee Ngai wakwa, ririkana Tobia na Sanibalati nĩ ũndũ wa mawĩra moru marĩa marutĩte, o na mũnabii mũndũ-wa-nja ũcio ti Noadia, o na anabii arĩa angĩ, arĩa mangĩanguoyohirie.

¹⁵Naruo rũthingo rũu rũgĩkĩrĩkio mũthenya wa mĩrongo ĩĩrĩ na ĩtano wa mweri wa Eluli, na rũaninĩte matukũ mĩrongo ĩtano na merĩ rũgĩakwo.

¹⁶Na gũgĩkinya atĩrĩ, atĩ hĩndĩ ĩrĩa thũ ciitũ ciothe ciaiguire ũhoro ũcio, ndũrĩrĩ ciothe iria ciatũrigicĩirie igĩĩtigĩra, ikĩmaka mũno, nĩ gũkorũo nĩcionire o wega atĩ wĩra ũcio ũrutĩtwo nĩ Ngai witũ.

¹⁷O na ningĩ matukũ macio andũ arĩa anene a matũũra ma Juda magĩtwarithĩria Tobia marũa maingĩ, o namo marũa ma Tobia magĩtwarũo harĩ o.

¹⁸Nĩ gũkorũo kũu Juda kwarĩ andũ aingĩ mehĩtĩte makoiga megũtuĩka a mwena wake, nĩ ũndũ aarĩ mũthoniwe wa Shekania wa Ara; ningĩ mũrũwe, Jehohanani, nĩwe wahikĩtie mwarĩ wa Meshulamu wa Berekia.

¹⁹Ningĩ nĩmaamũgathagĩrĩria harĩ niĩ atĩ nĩekaga maũndũ mega, o nacio ndeto ciakwa iria ndaaragia makamũheaga. Nake Tobia agakĩndehithagĩria marũa ma kũnguoyohia.