Nehemiah 7

¹Na gũgĩkinya atĩrĩ, atĩ rũthingo o rũarĩkia gwakwo, na niĩ ngĩkorũo njĩkĩrĩte mĩrango ihingo-inĩ, o na aikaria ayo, o na aini nyĩmbo, o na Alawii magathurĩrũo mawĩra mao-rĩ,

²ngĩkĩhe Hanani, mũrũ wa awa, o na Hanania mũnene wa nyũmba ĩrĩa yakĩtwo na hinya wathani, nĩguo maathanage Jerusalemu; nĩ gũkorũo Hanania aarĩ mwĩhokeku, na agetigĩra Ngai gũkĩra andũ aingĩ.

³Ningĩ ngĩmera atĩrĩ, Ihingo cia Jerusalemu nĩimenyererũo itikahingũragwo o nginya hĩndĩ ĩrĩa riũa rĩrĩkoragwo rĩarĩte, na mĩrango yacio ĩhingagwo andũ a kũmĩrangĩra marĩ ho, na mũmĩĩkagĩre igera cia kũgiria ĩhingũrũo; o na ningĩ thurai arangĩri arĩ inyuĩ thĩinĩ wa andũ arĩa matũũraga Jerusalemu, o mũndũ arangage ituanĩra-inĩ rĩake, na mũndũ o mũndũ arangage ang’ethanĩire na nyũmba yake.

⁴Na rĩrĩ, itũũra rĩu rĩarĩ rĩariĩ na rĩkaneneha, no rĩrĩ, andũ arĩa maatũire kuo thĩinĩ matiarĩ aingĩ, na nyũmba itiaakĩtwo.

⁵Nake Ngai wakwa agĩgĩtũma ngoro yakwa yende gũcokereria andũ arĩa anene a matũũra, o na arĩa maathanaga, o na andũ arĩa angĩ, nĩ getha matarũo o ta ũrĩa njiaro ciao itariĩ. Ngĩkĩona ibuku rĩrĩa rĩa ũhoro wa njiaro cia andũ arĩa maambatire rĩa mbere, na thĩinĩ warĩo ngĩona rĩandĩkĩtwo ũũ:

⁶Ici nĩcio ciana cia andũ a bũrũri wa Juda iria ciaambatire ciumĩte thĩinĩ wa andũ arĩa maatahĩtwo, o acio maathiĩtwo nao nĩ Nebukadinezaru, mũthamaki wa Babuloni, iria ciacokire Jerusalemu, o na Juda, o mũndũ itũũra rĩao.

⁷Nao nĩo maarehanire na Zerubabeli, na Jeshua, na Nehemia, na Azaria, na Raamia, na Nahamani, na Moridekai, na Bilishani, na Misi-perethu, na Bigivai, na Nehumu, na Baana. Mũigana wa arũme acio a andũ a Isiraeli-rĩ, watariĩ ũũ:

⁸Ciana cia Paroshu ciarĩ ngiri igĩrĩ na igana rĩmwe rĩa mĩrongo mũgwanja na igĩrĩ.

⁹Na ciana cia Shefatia ciarĩ magana matatũ ma mĩrongo mũgwanja na igĩrĩ.

¹⁰Na ciana cia Ara ciarĩ magana matandatũ ma mĩrongo ĩtano na igĩrĩ.

¹¹Na ciana cia Pahathu-moabi, iria ciumĩte harĩ ciana cia Jeshua na Joabu, ciarĩ ngiri igĩrĩ na magana manana ma ikũmi na inyanya.

¹²Na ciana cia Elamu ciarĩ ngiri ĩmwe na magana merĩ ma mĩrongo ĩtano na inya.

¹³Na ciana cia Zatu ciarĩ magana manana ma mĩrongo ĩna na ithano.

¹⁴Na ciana cia Zakai ciarĩ magana mũgwanja ma mĩrongo ĩtandatũ.

¹⁵Na ciana cia Binui ciarĩ magana matandatũ ma mĩrongo ĩna na inyanya.

¹⁶Na ciana cia Bebai ciarĩ magana matandatũ ma mĩrongo ĩĩrĩ na inyanya.

¹⁷Na ciana cia Azigadi ciarĩ ngiri igĩrĩ na magana matatũ ma mĩrongo ĩĩrĩ na igĩrĩ.

¹⁸Na ciana cia Adonikamu ciarĩ magana matandatũ ma mĩrongo ĩtandatũ na mũgwanja.

¹⁹Na ciana cia Bigivai ciarĩ ngiri igĩrĩ na mĩrongo itandatũ na mũgwanja.

²⁰Na ciana cia Adini ciarĩ magana matandatũ ma mĩrongo ĩtano na ithano.

²¹Na ciana cia Ateri wa Hezekia ciarĩ mĩrongo kenda na inyanya.

²²Na ciana cia Hashumu ciarĩ magana matatũ ma mĩrongo ĩĩrĩ na inyanya.

²³Na ciana cia Bezai ciarĩ magana matatũ ma mĩrongo ĩĩrĩ na inya.

²⁴Na ciana cia Harifa ciarĩ igana rĩa ikũmi na igĩrĩ.

²⁵Na ciana cia Gibeoni ciarĩ mĩrongo kenda na ithano.

²⁶Na andũ a Bethi-lehemu na Netofa maarĩ igana rĩa mĩrongo ĩnana na anana.

²⁷Na andũ a Anathothu maarĩ igana rĩa mĩrongo ĩĩrĩ na anana.

²⁸Na andũ a Bethi-azamavethu maarĩ mĩrongo ĩna na erĩ.

²⁹Na andũ a kũu Kiriathu-jearimu, na Kefira, na Beerothu, maarĩ magana mũgwanja ma mĩrongo ĩna na atatũ.

³⁰Nao andũ a Rama na Geba maarĩ magana matandatũ ma mĩrongo ĩĩrĩ na ũmwe.

³¹Na andũ a Mikimasi maarĩ igana rĩmwe rĩa mĩrongo ĩĩrĩ na erĩ.

³²Na andũ a Beth-eli na Ai maarĩ igana rĩa mĩrongo ĩĩrĩ na atatũ.

³³Na andũ a Nebo rĩa kerĩ maarĩ mĩrongo ĩtano na erĩ.

³⁴Na ciana cia Elamu ũrĩa ũngĩ ciarĩ ngiri ĩmwe na magana merĩ ma mĩrongo ĩtano na inya.

³⁵Na ciana cia Harimu ciarĩ magana matatũ ma mĩrongo ĩĩrĩ.

³⁶Na ciana cia Jeriko ciarĩ magana matatũ ma mĩrongo ĩna na ithano.

³⁷Na ciana cia Lodi na Hadidi na Ono ciarĩ magana mũgwanja ma mĩrongo ĩĩrĩ na ũmwe.

³⁸Na ciana cia kũu Senaa ciarĩ ngiri ithatũ na magana kenda ma mĩrongo ĩtatũ.

³⁹Naho ha ũhoro wa athĩnjĩri-Ngai, kwarĩ ciana cia Jedaia, wa nyũmba ya Jeshua, nacio ciarĩ magana kenda ma mĩrongo mũgwanja na ithatũ.

⁴⁰Na ciana cia Imeri ciarĩ ngiri ĩmwe na mĩrongo ĩtano na igĩrĩ.

⁴¹Na ciana cia Pashuri ciarĩ ngiri ĩmwe na magana merĩ ma mĩrongo ĩna na mũgwanja.

⁴²Na ciana cia Harimu ciarĩ ngiri ĩmwe na ikũmi na mũgwanja.

⁴³O naho ha ũhoro wa Alawii, kwarĩ ciana cia Jeshua, na cia Kadimieli, cioimĩte harĩ ciana cia Hodeva, nacio ciarĩ mĩrongo mũgwanja na inya.

⁴⁴Naho ha ũhoro wa aini nyĩmbo, kwarĩ ciana cia Asafu, nacio ciarĩ igana rĩmwe rĩa mĩrongo ĩna na inyanya.

⁴⁵Naho ha ũhoro wa aikaria mĩrango, kwarĩ ciana cia Shalumu, na cia Ateri, na cia Talimoni, na cia Akubu, na cia Hatita, na cia Shobai, nacio icio ciothe hamwe ciarĩ igana rĩa mĩrongo ĩtatũ na inyanya.

⁴⁶Na ha ũhoro wa Anethini-rĩ, kwarĩ ciana cia Ziha, na cia Hasufa, na cia Tabaothu,

⁴⁷na cia Keroso, na cia Sia, na cia Padoni,

⁴⁸na cia Lebana, na cia Hagaba, na cia Salimai,

⁴⁹na cia Hanani, na cia Gideli, na cia Gahari,

⁵⁰na cia Reaia, na cia Rezini, na cia Nekoda,

⁵¹na cia Gazamu, na cia Uza, na cia Pasea,

⁵²na cia Besai, na cia Meunimu, na cia Nefushesimu,

⁵³na cia Bakabuku, na cia Hakufa, na cia Harihuri,

⁵⁴na cia Bazilithu, na cia Mehida, na cia Harasha,

⁵⁵na cia Barikosu, na cia Sisera, na cia Tema,

⁵⁶na cia Nezia, na cia Hatifa.

⁵⁷Naho ha ũhoro wa ciana cia ndungata cia Suleimani, kwarĩ ciana cia Sotai, na cia Soferethu, na cia Perida;

⁵⁸na cia Jaala, na cia Darikoni, na cia Gideli,

⁵⁹na cia Shefatia, na cia Hatili, na cia Pokerethu-hazebaimu, na cia Amoni.

⁶⁰Anethini acio othe, me hamwe na ciana icio cia ndungata cia Suleimani, maarĩ magana matatũ ma mĩrongo kenda na erĩ.

⁶¹Nao aya nĩo maambatire moimĩte Teli-mela, na Teli-harasha, na Kerubu, na Adoni, na Imeri, magĩthiĩ na arĩa angĩ, no rĩrĩ, matiigana kuonania wega ũhoro wa nyũmba cia maithe mao, o na mbeũ yao, kũmenyeke kana hihi maarĩ a Isiraeli, kana aca;

⁶²nĩ ciana cia Delaia, na cia Tobia, na cia Nekoda, nacio ciarĩ magana matandatũ ma mĩrongo ĩna na igĩrĩ.

⁶³Ningĩ thĩinĩ wa ciana cia athĩnjĩri-Ngai kwarĩ ciana cia Hobaia, na cia Hakozu, na cia Barizilai, ũrĩa wahikirie mũka wa airĩtu a Barizilai, Mũgileadi, na agetagwo rĩĩtwa o ro rĩu rĩao.

⁶⁴Andũ acio nĩmaacaririe ũhoro wa njiaro ciao thĩinĩ wa marĩĩtwa ma andũ arĩa maandĩkĩtwo o ta ũrĩa njiaro ciao ciatariĩ, no ndũigana kuoneka; tondũ ũcio magĩkĩonwo ta magwatĩtwo nĩ thahu, makĩingatwo matigacoke gũtuĩka athĩnjĩri-Ngai.

⁶⁵Nake barũthi akĩmera atĩ matikarĩe indo iria nyamũre mũno o nginya hĩndĩ ĩrĩa hakoneka mũthĩnjĩri-Ngai wĩ na Urimu na Thumimu.

⁶⁶Nakĩo kĩrĩndĩ kĩu gĩothe hamwe kĩarĩ andũ ngiri mĩrongo ĩna na igĩrĩ na magana matatũ ma mĩrongo ĩtandatũ,

⁶⁷thengia ndungata ciao cia arũme na cia andũ-a-nja; nacio ndungata icio ciarĩ andũ ngiri mũgwanja na magana matatũ ma mĩrongo ĩtatũ na mũgwanja; o na ningĩ maarĩ na andũ magana merĩ ma mĩrongo ĩna na atano arĩa maainaga nyĩmbo, arũme na andũ-a-nja.

⁶⁸Nacio mbarathi ciao ciarĩ magana mũgwanja ma mĩrongo ĩtatũ na ithathatũ; nacio nyũmbũ ciao ciarĩ magana merĩ ma mĩrongo ĩna na ithano;

⁶⁹nacio ngamĩra ciao ciarĩ magana mana ma mĩrongo ĩtatũ na ithano; o nacio ndigiri ciao ciarĩ ngiri ithathatũ cia magana mũgwanja ma mĩrongo ĩĩrĩ.

⁷⁰Na rĩrĩ, andũ amwe arĩa maarĩ atongoria a nyũmba cia maithe ma andũ acio nĩmaarutire indo ciao nĩ ũndũ wa wĩra ũcio. Ũrĩa barũthi akĩruta mbaũni cia thahabu ngiri ĩmwe, o na mbakũri mĩrongo ĩtano, na nguo magana matano ma mĩrongo ĩtatũ cia athĩnjĩri-Ngai, agĩciiga mũthithũ-inĩ.

⁷¹O nao anene amwe a nyũmba cia maithe mao makĩruta mbaũni cia thahabu ngiri mĩrongo ĩĩrĩ, o na ratiri ngiri ĩgirĩ na magana merĩ cia betha, magĩciiga mũthithũ-inĩ wa indo cia kũrutithia wĩra ũcio.

⁷²O nacio mbaũni cia thahabu iria ciarutirũo nĩ andũ arĩa angĩ ciarĩ ngiri mĩrongo ĩĩrĩ, o na ratiri ngiri igĩrĩ cia betha, o na nguo cia athĩnjĩri-Ngai mĩrongo ĩtandatũ na mũgwanja.

⁷³Ũguo nĩguo athĩnjĩri-Ngai, na Alawii, na aikaria mĩrango, na aini nyĩmbo, na andũ amwe thĩinĩ wa andũ arĩa angĩ, na Anethini, o na Aisiraeli othe, maacokire gũtũũra matũũra-inĩ mao. Na rĩrĩ, mweri wa mũgwanja wakinya-rĩ, ciana cia Isiraeli ciakorirũo itũũrĩte o ro ũguo matũũra-inĩ ma cio.