Proverbs 20

¹Ndibei nĩ mũndũ mũtendi, njohi-rĩ, nĩ mũndũ wa ngũĩ, nake ũrĩa ũngĩhĩtithio nĩyo, o ũrĩkũ, ti mũũgĩ.

²Itebebia rĩa mũthamaki nĩ ta mũthungurumo wa mũrũthi: mũndũ wa kũmũrakaria nĩ muoyo wake mwene areĩhĩria.

³Gũthengera ngũĩ nĩ gwa kũheithia mũndũ gĩtĩo, ĩndĩ kĩrimũ, gũtirĩ gĩtenda mburugano.

⁴Mũndũ mũgũta nĩaregaga kwenja mũgũnda tondũ wa heho ya gathano, na hingo ya magetha agetia irio, na gũtingĩkorũo kũrĩ.

⁵Methugunda ma ngoro ya mũndũ matariĩ ta maĩ me irima iriku, ĩndĩ mũndũ mũtaũku nĩegwĩtahĩra.

⁶Andũ arĩa angĩ nĩ a kwĩanĩrĩra o mũndũ ũtugi wake, ĩndĩ mũndũ mwĩhokeku, angĩoneka nũ?

⁷Mũndũ wĩ maũndũ ma kĩhooto, o ũrĩa wa mĩthiĩre mĩgima, ciana iria atigaga, kaĩ nĩ cia gũkena-ĩ!

⁸Mũthamaki rĩrĩa aikarĩire gĩtĩ gĩake gĩa ituĩro nĩ kũharagania aharaganagia ũũru wothe na maitho make.

⁹Nũ ũngĩhota kuuga ũũ: Ngoro yakwa nĩndĩmĩthambĩtie, gũthirũo nĩ’thirĩtwo nĩ mahĩtia makwa, ngathera?

¹⁰Gũthima na mahiga makĩrũkaine, o na ibaba ikĩrũkaine, kũu kwerĩ no magigi harĩ Jehova.

¹¹O na kaana kamenyekaga na ciĩko ciako, kana maũndũ mako nĩ makembu, na kana no marũngĩrĩru.

¹²Gũtũ gwa kũigua, o na riitho rĩa kuona, cierĩ no Jehova waciũmbire.

¹³Tiga kwendana na toro, ndũkae gũgakinya gũkĩara; ikaraga ũramũrĩtie maitho, na nĩũrĩhũnaga gĩa kũrĩa.

¹⁴Mũgũri akĩgũra oigaga, Ti kĩega, ti kĩega! na aarĩkia gwĩthiĩra agacoka kwĩraha.

¹⁵Thahabu no kũrĩ, o na ruru no nyingĩ, ĩndĩ mĩromo ĩrĩ ũmenyo nĩ ithaga rĩĩ bata mũno.

¹⁶Ũrĩa watuĩka ithenya rĩa mũgeni-rĩ, kiumanie na kuoya nguo yake! kĩmũtue o we ngwatio ya thirĩ harĩ andũ acio a kũngĩ!

¹⁷Irio cionekete na maheni, nĩicamagĩra mũndũ mũrĩo, no kahinda kau kangĩ kanua gake gakaiyũra o mũthanga.

¹⁸Ũndũ o wothe ũgĩthugundwo ũrũmagio na kũrĩĩrũo kĩrĩra; ũgĩthiĩ ita-rĩ, thiaga ũrĩ mũtaarĩrie o wega.

¹⁹Mũcangi na ndeto cia mũhuhu nĩatuhũraga maũndũ ma ndundu: mũndũ wa mĩromo ĩtatumagia, ndũkanakĩmathithanie nake.

²⁰Mũgeki ithe kana nyina, kĩmũrĩ gĩake gĩkahorera nduma-inĩ oĩrĩa njirũ ci!

²¹Igai rĩngĩgwatwo na mũhiũhũko kĩambĩrĩria marigĩrĩrio marĩo matingĩtuĩka marathime.

²²Tiga kuuga atĩrĩ, Ũũru kwĩrĩhĩria nĩndĩĩwĩrĩhĩria! eterera Jehova, nake nĩarĩkũhonokia.

²³Gũthima na mahiga makĩrũkaine nĩ ũndũ wĩ magigi harĩ Jehova; ratiri ya maheni o nayo ti njega.

²⁴Mĩgendere ya mũndũ nĩ Jehova ũmwathagĩra: mũndũ aakĩhota atĩa kwĩmenyera gĩtũmi kĩa njĩra ĩo agerete?

²⁵Nĩ mũtego harĩ mũndũ kuuga na kĩhĩko, Kĩndũ gĩkĩ nĩndaamũrĩra Ngai, na aarĩkia kwĩhĩta ũguo, acoke kwĩũrangia.

²⁶Mũthamaki mũũgĩ nĩ kũhuhũra ahuhũraga andũ arĩa aaganu ta mũũngũ; nĩ ta arehagĩre kĩgaragari igũrũ rĩao, kĩrĩa gĩa gũkonyora ngano.

²⁷Roho wa mũndũ nĩguo kĩmũrĩ kĩa Jehova, gĩthuuthuuragia mũndũ nginya tũturi twa nda tuothe tũrĩa twĩ thĩinĩ mũno.

²⁸Mũthamaki aigagwo nĩ gũtugana na gũtuĩka wa ma; gĩtĩ gĩake kĩa ũnene nĩ ũtugi ũtiiragĩrĩra.

²⁹Hinya wa aanake nĩguo ũgemu wao, nao athuri, ũthaka wao nĩ mũtwe ũrĩ mbuĩ.

³⁰Mĩtuuru ya kũhũrũo nĩĩthambagia mũndũ ũũru wake; mahiũkia nĩ gũtonya mamũtonyaga o kinya tũturi twa nda tũrĩa twĩ thĩinĩ mũno.