Proverbs 21

¹Ngoro ya mũthamaki ĩĩ moko-inĩ ma Jehova ta mĩtaro harĩ mũmiunithia; amĩroragia o na harĩa ekwenda.

²Mĩthiĩre ya mũndũ yothe no mĩerekereru, we akĩĩonera, no Jehova nĩathimaga ngoro.

³Gũtuaga maũndũ na ũthingu, ningĩ na kĩhooto, nĩ kwagĩrĩru harĩ Jehova kũrĩ kũrutaga magongona.

⁴Maitho kũgĩa manyiira, o na ngoro gũtuĩka ya ngũrũ, arĩ kuo kĩmũrĩ kĩa arĩa aaganu-rĩ, nĩ mahĩtia.

⁵Itaranio cia ũrĩa wĩ kĩyo irehithagie o ũthegei, ĩndĩ mũndũ o wothe wa mũhiũhũko, kĩrĩa onaga no ũnyamari.

⁶Kwĩgĩĩra na mĩthithũ na njĩra ya rũrĩmĩ rũa maheni no ta kĩbii, ũrĩa kĩhurunjũkaga; amathi ayo no gĩkuũ maremathĩra.

⁷Ũhahanyi wa arĩa aaganu nĩũkamahakũrũria o ene marindũke, nĩ ũndũ nĩ aregi gwĩka ũhoro ũrĩa wa kĩhooto.

⁸Njĩra ya mũndũ mũritũhĩre nĩ ngero agerete nĩ ng’onyoku o kũgonyoka, no ũrĩa wa maũndũ makembu-rĩ, mawĩko make nĩ merekereru.

⁹Nĩ kaba gũtũũra nyũmba igũrũ na nja, koine-inĩ kayo, gũkĩra nyũmba nene thĩinĩ hamwe na mũtumia wa kĩmbĩmbĩ.

¹⁰Ngoro ya mũndũ mwaganu ĩthĩgagia o gwĩkana ũũru; ndonaga ta aagĩrĩirũo nĩ gũtuga mũndũ ũngĩ wa itũũra.

¹¹Mũtendi aaherithio, mũndũ ũtarĩ mũũgĩ nĩohĩgagio; ũrĩa mũũgĩ, we aataarũo, nĩ ũmenyi ongagĩrĩrũo.

¹²Ũrĩa Mũthingu nĩaroranagia mũciĩ wa ũrĩa mwaganu, na gũturũra agaturũra acio aaganu, magakĩmomoka.

¹³Wa gwĩthinga matũ ndakaigue ũrĩa mũhũthũ agĩkaya, we nake no agakaya, na ndakaiguwo.

¹⁴Kĩheo kĩa ngungo nĩkĩhoreragia marakara, ihaki rĩĩ gĩthũri-inĩ rĩgakĩhoreria marũrũ manene.

¹⁵Ituĩro rĩa kĩhooto rĩatuwo, nĩ gĩkeno harĩ arĩa athingu, no harĩ andũ arĩa eki waganu, nĩ mwanangĩko.

¹⁶Mũndũ wa kuuma njĩra ĩrĩa ya ũũgĩ athiĩ kũũngũtũka, harĩa akahurũkĩrĩra no ũũngano-inĩ wa arĩa akuũ.

¹⁷Mwendi o maũndũ ma gwĩkenia agatuĩka mũnyamari; mwendi ndibei na maguta-rĩ, ndagatuĩka gĩtonga.

¹⁸Ũrĩa mwaganu atuĩkaga gĩkũũri gĩa gũkũũra ũrĩa mũthingu, ũrĩa mũgarũka agagĩcokio ithenya rĩa ũcio mũrũngĩrĩru.

¹⁹Kaba gũtũũra bũrũri ũrĩ werũ mũtheri, gwĩ gũtũũrania na mũtumia wa kĩmbĩmbĩ na no wa nugunugu.

²⁰Gĩtũũro kĩa mũndũ mũũgĩ kĩĩ mũthithũ wa bata, na gũtiagaga maguta, ĩndĩ kĩrimũ no kũmerũkia kĩimerũkagia.

²¹Mũthingatani na ũthingu na ũtugi agĩaga na muoyo, na ũthingu, na gĩtĩo.

²²Mũndũ mũũgĩ no kũhaicĩra rũirigo igũrũ aharũkĩre gĩtũũro kĩa njamba, amomore hinya wakĩo ũrĩa ciĩhokete.

²³Ũrĩa ũriĩraga kanua gake, gwata rũrĩmĩ, nĩ ngoro yake ariraga mĩnyamaro.

²⁴Mũndũ mwĩgereri, mũndũ wa mwĩtĩo-rĩ, etagwo mũtendi; maũndũ make nĩ ma kwĩambatĩria na ngũrũ.

²⁵Mũndũ mũgũta, wĩrirĩria wake nĩ kũmũũraga ũmũũragaga, amu moko make nĩmaregaga kũruta wĩra.

²⁶Kũrĩ ũtindaga na njura nene mũthenya ũgathũa, no mũndũ mũthingu nĩ kũheana aheanaga atekũnona.

²⁷Igongona rĩa mũndũ mwaganu no ta kĩndũ kĩĩ magigi; makĩria githĩ ti rĩrĩa ekũrĩruta e na ũhinga ngoro?

²⁸Mũira wa maheni no kũhuka akahuka athire, ĩndĩ ũrĩa mũthikĩrĩria wa ũhoro, kwaria gwake no gũtũũre.

²⁹Mũndũ mwaganu nĩ kwĩũmia eũmagia ũthiũ, no mũndũ mũrũngĩrĩru, nĩ mĩthiĩre yake ataaragĩria.

³⁰Gũtirĩ ũũgĩ, kana ũtaũku, kana kĩrĩra o na kĩrĩkũ, kĩngĩĩhotera ũndũ harĩ Jehova.

³¹Mbarathi nĩĩtandĩkagĩrũo mũthĩ wa ita, ĩndĩ ũrĩa ũngĩtũma kũhootanwo no Jehova.