Proverbs 22

¹Kaba mũndũ ethurĩre kũgĩa na igweta rĩega gũkĩra ũtonga mũnene; kwendeka nĩ kwega kũrĩ betha na thahabu.

²Itonga na ngĩa nĩmatũnganaga hamwe; mũũmbi wao othe no Jehova.

³Mũndũ mũbarĩrĩri onaga gũkĩgĩa ũũru, akehitha, no arĩa matarĩ ogĩ mathiagĩrĩra o na mbere, magakĩya kũhera.

⁴Ngerenwa ya kwĩnyihia na gwĩtigĩra Jehova nĩ ũtonga, na gĩtĩo, na muoyo.

⁵Njĩra ya arĩa aremi ĩĩ na mĩigua na mĩtego; mũndũ mwĩmenyereri ngoro yake ndangĩkuhanĩrĩria nakuo.

⁶Menyeria mwana njĩra ĩrĩa aagĩrĩirũo nĩ gũthiĩra, na nde hingo akoima yo o na aakũra.

⁷Mũtongu nĩ mwathi wa ũrĩa mũkĩa, na muohori nĩ ngombo ya mũmuohoreri.

⁸Ũrĩa ũhuraga wogogi, kĩrĩa akagetha nĩ ndirũ; rũthanju rũrĩa ehanagĩra naruo nĩ kuunĩka rũkoinĩka.

⁹Ũrĩa wa riitho rĩa ũtana, we nĩarĩrathimagwo, tondũ nĩagayagĩra arĩa aagi irio ciake.

¹⁰Ingata mũndũ ũrĩa mũtendi, namo matetania no meyumĩre nja; ngarari o na hũhi no hingo ingĩthira.

¹¹Ũrĩa wenda ũkembu wa ngoro-rĩ, tondũ wa uuma-andũ wa mĩromo yake, mũthamaki no gũtuĩka mũratawe.

¹²Mũndũ wĩ na ũmenyi, maitho ma Jehova nĩmamũmenyagĩrĩra, ĩndĩ ũrĩa mũgarũ, ũhoro wake nĩ gũturũra aũturũraga.

¹³Kĩgũta kiugaga atĩrĩ, Thome kwĩ na mũrũthi; barabara-inĩ-rĩ, no kũũragĩrũo kuo.

¹⁴Tũnua twa aka a kwene nĩ irima iriku mũno: mũndũ mũrakarire nĩ Jehova no agũe thĩinĩ warĩo.

¹⁵Ngoro ya mwana ĩthaĩkanĩtio na ũrimũ, ĩndĩ rũcamiũ rũa kũherithania no rũũingate haraya nake.

¹⁶Ũrĩa ũhinyagĩrĩria arĩa ahũthũ nĩ getha eongerere indo, o na ũrĩa wĩtegithagia matega gwa itonga, erĩ gũtirĩ ũtagatuĩka mũnyamari.

¹⁷INAMĨRĨRIA gũtũ ũigue mohoro ma andũ arĩa ogĩ, ngoro yaku ta mĩerekerie na harĩ ũmenyi ũyũ wakwa.

¹⁸Amu nĩ wega mũno ũngĩtũũria maũndũ macio thĩinĩ waku, magagĩkoragwo mehandĩte mĩromo-inĩ yaku.

¹⁹Wee nĩwe ndĩramenyithia mo mũthenya o ũyũ tũrĩ, nĩ getha ũtuĩke wa kwĩhokaga Jehova.

²⁰Anga ti maũndũ me bata ngwandĩkĩire makoniĩ kĩrĩra o na ũmenyo,

²¹O ma gũkũmenyithia ciugo cia ma, o iria njĩhokeku, nĩguo ũcokerere agũtũmi ũrĩ na ciugo iria cia ma?

²²Menya ũgatunya mũndũ mũhũthũ kĩndũ gĩake nĩ ũndũ nĩ mũhũthũ, kana ũhinyĩrĩrie mũndũ mũthĩnie mwacira thome-inĩ,

²³Nĩ amu Jehova nĩwe ũgatuĩka mũmacirĩrĩri, na acume amacumi amatunye mĩoyo yao.

²⁴Ndũkanatume ndũgũ na mũndũ ũhiũhaga kũrakara; mũndũ wa marũrũ-rĩ, tiga gũkanathiĩ thiritũ nake.

²⁵Nĩ getha ndũkae kwĩruta mĩtugo yake, ngoro yaku ĩkĩgwatwo nĩ mũtego.

²⁶Ndũkanatuĩke wa arĩa mang’athanagĩra, arĩa matuĩkaga mathenya ma andũ angĩ nĩ ũndũ wa mathirĩ.

²⁷Ũngĩgakĩaga gĩa kũrĩha nakĩo-rĩ, ĩ, kĩo nĩ kĩ kĩngĩtũma ũtunyũo ũrĩrĩ ũrĩa ũkomaga?

²⁸Menya gũkanakũũra mũtĩ wa ndĩĩra wa mũhaka ũrĩa wahandirũo nĩ aa thoguo.

²⁹Wĩ mũndũ wonaga mũruti wĩra wake na kĩyo? ũcio-rĩ, agatuĩka wa kũrũgamaga harĩ athamaki; ti wa gũkarũgamaga harĩ andũ arĩa matoĩo.