Proverbs 23

¹Waikara thĩ kũrĩa irio na mwathi-bũrũri-rĩ, barĩrĩra wega atĩ ũcio nũ ũkũng’etheire:

²Nĩ kaba ũngiĩigĩrĩra kahiũ mũmero akorũo ũrĩ mũndũ wa mũhaaha.

³Rũkũri rũu rũake, ndũkanarũcemekere, amu nĩ irio cia gũkũhenereria.

⁴Tiga kwĩnogia na kwenda gwĩtongia; tigana na ũũgĩ waku mwene.

⁵Githĩ wenda gũkũũrĩra maitho kĩndũ gũtarĩ? amu gũtirĩ nganja ũtonga nĩwĩmeragia mathagu o ta nderi ĩkĩgũrũka yerekeire o matu-inĩ.

⁶Tiga kũrĩa irio cia mũndũ wa riitho rĩa ũkarĩ, na ndũkanacemekere rũkũri rũu rũake,

⁷Amu-rĩ, ũguo anonaga ngoro-inĩ yake, noguo atariĩ; gũkwĩra egũkwĩra, Rĩa, na ũnyue! na ngoro yake ndĩrĩ harĩ wee.

⁸Kenyũ kau warĩa nĩũgũcoka gũgatahĩka, onacio ndereti ciaku njega ikũũre o tũhũ.

⁹Tiga kwaria ũhoro na kĩrimũ, amu ndeto ciaku no kũrurũka angĩrurũka ũũgĩ wacio.

¹⁰Menya gũkanakũũra mũtĩ wa ndĩĩra wa mũhaka, na ndũkanaingĩrĩre mĩgũnda ya andũ a ndigwa,

¹¹Nĩ gũkorũo mũmarĩhithĩria nĩ ũrĩa wĩ na hinya, na nĩwe ũngĩkamacirĩrĩra harĩ wee.

¹²Ĩringĩrĩrie ngoro ĩthikĩrĩrie ũtaari, o na matũ namo makĩigue ciugo cia ũmenyi.

¹³Ndũkaage kũherithagia mwana, amu wamũhũra na rũthanju, ndangĩtuĩka wa gũkua.

¹⁴No kinya ũmũhũrage na rũthanju, ũkĩgiranie muoyo wake na Kwa-ngoma.

¹⁵Mũrũ wakwa, ngoro yaku ĩngĩgĩa na ũũgĩ-ũrĩa-wa-ma, ngoro yakwa o nayo no ĩkene;

¹⁶Ĩĩ-ni, higo ciakwa no icanjamũkage rĩrĩa mĩromo yaku yaaria maũndũ marĩa marũngĩrĩru.

¹⁷Ngoro yaku nĩĩmenye gũkaigua ũiru nĩ ũndũ wa andũ a mahĩtia; wee-rĩ, mũthenya wothe tindaga na ũhoro wa gwĩtigĩra Jehova:

¹⁸Amu nĩ ma, no gũkagĩa na thutha mwega, na kĩĩrĩgĩrĩro gĩaku gĩtigatura.

¹⁹Wee, mũrũ wakwa, igua, nĩ getha ũkĩũhĩge; erekagĩria ngoro yaku ĩgerage o njĩra.

²⁰Ndũkanegwatanie na inyui-cia-njohi, ona kana arĩa ndĩa-nyama,

²¹Amu ũrĩa ũrĩagwo nĩ njohi, o nake ũrĩa kĩrĩi, magakinya gũkĩara; ũgũta-rĩ, no kwĩhumbithia mũndũ matangari.

²²Thikagĩrĩria thoguo mũgũciari, na ũmenye gũkarũrũka nyũkwa na aatuĩka nĩ mũkũrũ.

²³Ĩgũrĩre ũhoro-ũrĩa-wa-ma, na menya gũgacoka kũwendia; ĩĩ-ni, gũra ũũgĩ, o na ũtaaro, na mbuguĩro.

²⁴Ithe wa mũndũ mũthingu nĩ wa gũikaraga e mũkenyũku mũno, mwĩciarĩri mwana mũũgĩ no gũkena arĩkenaga nĩ ũndũ wake.

²⁵Gĩkenagie thoguo na nyũkwa, ĩĩ-ni, mũtumia ũcio wagũciarire, gĩtũme aikarage e mũkenyũku.

²⁶Mũriũ, njerekeria ngoro yaku, maitho maku ta nĩ makenagio nĩ njĩra ciakwa.

²⁷Thima-rĩ, mũka wa maraya ahaana ta mũtaro mũriku, mũndũ-wa-nja mũgeni-rĩ, nĩ irima ikunderie rĩa gũtegana.

²⁸Ĩĩ-ni, nĩ kuoheria ohagĩria andũ ta njangiri, na nĩatũmaga kĩrĩndĩ-inĩ kũingĩhe mĩgarũka.

²⁹Nĩ mũndũ ũrĩkũ uugaga, Wũi? nĩ ũrĩkũ uugaga, Ĩya-ĩ? nĩ ũrĩkũ ũtindaga na mahiũrania? nũ ũikaraga o akĩguguna? nũ ũgĩaga nguraro cia tũhũ? ĩ, mũtunĩhi maitho nĩ ũrĩkũ?

³⁰Githĩ ti arĩa matindaga marũmanĩrĩire na njohi? githĩ to arĩa marakagĩra ndibei ĩrĩa ningĩrĩrie?

³¹Atĩrĩ, wee-rĩ, tiga kũbara ndibei o na yagĩtunĩha, na yakorũo nĩĩrakengakenga ĩrĩ gĩkombe-inĩ, na yatuĩka nĩĩnyorokaga wega ĩkĩmerũka:

³²Amu mũthia-inĩ, nĩ kũrũmana ĩrũmanaga ta njoka, kũratha ĩkarathana o ta nduĩra.

³³Maitho maku no kuona maũndũ magarũrũku, nayo ngoro yaku ĩkiuge maũndũ ma ũnanu.

³⁴Ĩĩ-ni, ũgĩtuĩke ta mũndũ wĩmamĩtie o iria-inĩ rĩrĩa inene gatagatĩ, kana ta mũndũ ũkomete mũthia-inĩ wa gĩtugĩ kĩa macua.

³⁵Ningĩ uuge atĩrĩ, Ngũthĩtwo-ĩ, na ndingĩtuurũo; ngahũrũo, na ndiigue ũndũ! O ndĩĩkĩhindũka rĩ? ngũgĩthiĩ gũthiĩ kũmĩetha o rĩngĩ!