Proverbs 24

¹Tiga gũkanaiguĩra andũ arĩa oru ũiru, na ndũkanerirĩrie gũtwarana hamwe nao;

²Amu ngoro ciao ciĩcũranagia o ũhoro wa ndunyo, na mĩromo yao ĩgakĩaragia o ndeto cia kĩũnũhu.

³Nyũmba yakagwo na njĩra ya ũũgĩ; ũtaũku nĩguo ũtũmaga ĩĩhande:

⁴Nĩ ũmenyi ũiyũrithagia matheegi mayo ũmathi wothe ũrĩa wĩ bata na mwega.

⁵Mũndũ mũũgĩ nĩwe wĩ na hinya, ĩĩ-ni, mũndũ ũrĩ ũmenyi nĩwe ũkĩragĩrĩria ũhoti.

⁶Amu ũgĩthiĩ ita, thiaga ũrĩ mũtaarĩrie o wega; kũrĩa kwĩ na aheani aingĩ a kĩrĩra gũtũũraga kwĩgangarĩte.

⁷Ũũgĩ-wa-ma wĩ igũrũ mũno, ndũngĩkinyĩrĩrĩka nĩ kĩrimũ; kĩo gĩtingĩĩtumũrĩra kanua kĩrĩ boi-inĩ.

⁸Mũthugundi njĩra cia gwĩkana ũũru-rĩ, andũ mamwĩtaga o muungumania.

⁹Mathugunda ma irimũ iria njũra-matũ nĩ ma ũhĩtia, na mũtendi nĩ kĩndũ kĩĩ magigi harĩ kĩrĩndĩ.

¹⁰Ũngĩtuĩka wa kũũrũo nĩ hinya mũthenya wa mĩnyamaro-rĩ, hinya waku no mũnyinyi.

¹¹Teithũrithagia arĩa maratwarũo gĩkuũ-inĩ; acio makiriĩ kũũragwo-rĩ, menya ũrege kũmahonokia.

¹²Ũngiuga ũũ, Ũhoro ũcio ithuĩ tũtiraũũĩ-rĩ, githĩ ũrĩa ũthimaga ngoro ndangĩtarania ũguo woiga? ũcio ũgitagĩra muoyo waku, we githĩ ndoĩ kana nĩguo? nake githĩ ndagathukĩra mũndũ o mũndũ kũringana na ũrĩa ekĩte?

¹³Mũrũ wakwa, rĩa ũũkĩ, amu nĩ mwega; kĩrũme mũruru waguo, ũkĩrĩ wa gũgũcamĩra mũrĩo:

¹⁴Ũkĩmenye atĩ ũũgĩ-ũrĩa-wa-ma noguo ũtariĩ harĩ ngoro yaku; ũngĩkorũo nĩũgĩĩte naguo-rĩ, no ũkagĩa na thutha mwega, na kĩĩrĩgĩrĩro gĩaku gĩtigatura.

¹⁵Wee, mũndũ ũyũ mwaganu, ndũtige gũcemerera gĩtũũro kĩa ũrĩa mũthingu! ndũgĩtige kwananga kĩhurũko gĩake!

¹⁶Amu mũndũ mũthingu agũaga magũa mũgwanja, o agĩcokaga gũũkĩra, ĩndĩ arĩa aaganu mona ũũru maturũragwo nĩguo gũturũrũo.

¹⁷Thũ yaku yagũa, wee tiga gũkena; yaturũrũo-rĩ, ngoro yaku ndĩgacanjamũke:

¹⁸Jehova ndagakĩone, ũndũ ũcio ũmũiguithie ũũru, acoke ahũndũre marakara make moime harĩ thũ ĩo.

¹⁹Tigaga gwakanwo nĩ ngoro nĩ ũndũ wa andũ arĩa eki ũũru, na ndũkaiguage ũiru nĩ ũndũ wa acio aaganu,

²⁰Nĩ gũkorũo mũndũ ũrĩa mũũru ndarĩ thutha mwega akona; kĩmũrĩ kĩa ũrĩa mwaganu-rĩ, no kũhorio gĩkahorio.

²¹Mũrũ wakwa, wee ĩtigagĩre Jehova, o gwata mũthamaki; ndũkanamathithanie na andũ arĩa mendaga kũgarũrithia maũndũ,

²²Amu-rĩ, mũtino wao ũkamakora na kĩhobanĩrio; iharagania rĩrĩa rĩngiuma kũrĩ acio erĩ, nũ ũkĩrĩũĩ?

²³MAYA NAMO no mohoro ma andũ arĩa ogĩ. Gũtĩĩra andũ maũthĩ cira-inĩ-rĩ, ti ũndũ mwega.

²⁴Mũndũ wĩraga ũrĩa mwaganu, Wee nĩwe mũthingu, nĩ kũgekwo arĩgekagwo nĩ andũ a mabũrũri, arĩthũũragwo nĩ ndũrĩrĩ o gũthũũrũo.

²⁵No arĩa marũithagia ũrĩa mwaganu nĩ wega marĩonaga, marĩikaraga o na kĩrathimo kĩega.

²⁶Wa gũcokia ũhoro icokio rĩrĩa rĩringaine, no ta aamumunya mũndũ mĩromo.

²⁷Amba ũtue mwako, ũwĩhaarĩrĩrie na kũu gĩthaka-inĩ; warĩkia, ũgĩcoke ũgĩake nyũmba yaku.

²⁸Ndũkanaigĩrĩre mũndũ ũrĩa ũngĩ ũndũ ũtarĩ ho; kũhenania, menya ũkahenania na mĩromo yaku.

²⁹Menya ũkoiga, Ngũmwĩka o ũguo anjĩkĩte, mũndũ ũcio ngũmũthukĩra kũringana na ũrĩa ekire!

³⁰Ndĩragereire mũgũnda-inĩ wa mũndũ kĩgũta, na mũgũnda-inĩ wa thabibu wa mũndũ ũtarĩ wĩcirio,

³¹Na rĩrĩ, wothe ũrarĩ mũmeru mĩigua, ũkaiyũra, gĩthiithi kĩaguo nĩkĩrahumbĩtwo nĩ cong’em na rũirigo rũaguo rũa mahiga rũkamomoka.

³²Ndĩrawĩrorera o ngĩcũranagia ũhoro ũcio wega, ndĩrakĩguũka, na gũtaarĩka ndĩragĩtaarĩka;

³³Mũtugo waku nĩ ũũ: Nĩnyambe ngomakome, njoke toro hanini! nĩndekwo ngũnjanie hĩ kahinda ngĩkome!

³⁴Ũhoro ũcio-rĩ, ũgatũma ũkĩa waku ũgũkorerere ta mũitũ, ũtharĩkĩrũo nĩ ũnyamari ta arĩ mũndũ ũgwete ngo.