Proverbs 25

¹ICI O NACIO nĩ thimo cia Suleimani, ciacokereirũo ikĩandĩkwo riita rĩngĩ nĩ andũ a Hezekia, ũrĩa warĩ mũthamaki wa Juda.

²Harĩ Ngai, kũhumbĩka ũndũ nĩ gwa kũmwĩkĩrĩrithia, no athamaki, ũndũ ũmekĩrĩrithagia nĩ gũthuuthuuria ũhoro o gũthuuthuuria.

³Kũraiha na igũrũ nĩ matu-inĩ kũraihĩte, na kũrika na thĩ nĩyo ĩrikĩte, ngoro cia athamaki nacio itingĩtuĩrĩka.

⁴Taaha gĩko gĩthire betha-inĩ, na nĩĩriuma kĩndũ gĩthondeke nĩ mũtheria;

⁵Ehutia andũ arĩa aaganu harĩ mũthamaki, na gĩtĩ gĩake kĩa ũnene nĩgĩkũrũmio nĩ ũthingu.

⁶Rĩrĩa mwĩ mbere ya mũthamaki, tiga gwĩthũng’ĩrĩria, na ndũkerũgamie harĩa ha makang’ũ,

⁷Amu nĩ kaba wĩrũo, Ambata haha, gũkĩra ũcokio na mũhuro mũnene arĩ o ho, mũrĩkĩtie kuonana nake na maitho.

⁸Ndũkanathiĩ kũgariũrana na mũndũ na kĩhĩko, ndũkae kũrigwo nĩ ũrĩa ũgwĩka cira wathira, rĩrĩa mũndũ ũcio wanyu arĩkorũo agũconorithĩtie.

⁹Ariai ũhoro wanyu na mũndũ ũcio arĩ we, ũgĩtige gũtengũra ndundu yene,

¹⁰Mũndũ wa kũigua ũndũ ũcio ndagagĩkũrume, na ũtũũre na ũcuke ũtangĩgũthira.

¹¹Kiugo gĩa kwario o ihinda rĩagĩrĩire, no ta matunda ma thahabu me tũtiti-inĩ twa betha.

¹²Mindo ya thahabu, na ithaga rĩa ngingo, o rĩa thahabu ĩrĩa ngembu, nĩ taguo irũithia rĩa mũndũ mũũgĩ rĩtariĩ gũtũ-inĩ kũrĩa kũigu.

¹³Ta ũhehu wa tharunji hingo ya magetha, noguo mũrekio mwĩhokeku ahaana harĩ amũrekia, amu nĩagandũraga ngoro cia acio mamwathaga.

¹⁴Matu na rũhuho itekũrehe mbura, nĩguo mũndũ atariĩ ũrahaga ũheani wake na gũtarĩ.

¹⁵Ũkirĩrĩria mũraya ũtũmaga mũnene agucĩrĩrĩke, na rũrĩmĩ ruororo nĩruunaga ihĩndĩ.

¹⁶Wona ũũkĩ-rĩ, rĩa o ũrĩa ũgũkũigana, nĩ getha ndũkae kwĩhũnĩrĩria ũcoke kũũtahĩka.

¹⁷Ikinya rĩaku ta nĩrĩtĩragĩrie gũthiĩ kwa mũndũ ũrĩa ũngĩ, ndakae kũnogio nĩwe, agũthũũre.

¹⁸Mũiganirĩri igenyo nĩ ndotono, nĩ njomo, nĩ mũguĩ ũrĩa mũnore.

¹⁹Kwĩhoka mũndũ mũgarũka hingo ya mĩnyamaro no ta igego ituĩku kana kũgũrũ kũgondoku.

²⁰Mũndũ wa gũthuuthĩra ũngĩ wĩ na ngoro nditũ no ta ũrĩa wa kwĩruta nguo rĩrĩa kwĩ heho, kana ta thiki ĩgĩitĩrĩrio igata.

²¹Mũgũthũũri angĩkorũo nĩahũtiĩ, mũhe irio arĩe; na aakorũo nĩanyotiĩ, mũhe maĩ anyue:

²²Amu weka ũguo, nĩ makara me mwaki ũramũhũmbĩrĩra mũtwe, nake Jehova no agĩkũhe ngerenwa.

²³Rũhuho rũrĩa ruumaga na gathigathini rũrehage o mbura, o naruo rũrĩmĩ rũa njukũ rũrehage ũthiũ mũthimbu.

²⁴Nĩ kaba gũtũũra nyũmba igũrũ na nja, koine-inĩ kayo, gũkĩra nyũmba nene thĩinĩ hamwe na mũtumia wa kĩmbĩmbĩ.

²⁵Maĩ mahehu harĩ mũndũ mũnyotu, noguo ũhoro mwega ũtariĩ uumĩte bũrũri mũraya.

²⁶Gĩthima kiunjuge, itherũkĩro ithũkie, noguo mũndũ mũthingu ahaana ũrĩa ũterũmagia harĩ arĩa aaganu.

²⁷Kũrĩa ũũkĩ mũingĩ ti wega, na andũ gwĩtuĩrĩria ũrĩa mangĩĩtĩithia o ene, kĩu ti gĩtĩo.

²⁸Mũndũ ũtahotaga gwatha ngoro yake atariĩ ta mũciĩ mũmomoku na kwaga ũkaaga rũirigo.