Psalms 138

¹NĨNGŨGŨCOKERIA ngatho na ngoro yakwa yothe, ngũkũinĩra ngĩkũgoocaga ngai ciothe irĩ o ho.

²Ngũinamĩrĩra njerekeire hekarũ yaku theru, njokerie rĩĩtwa rĩaku ngatho nĩ ũndũ wa ũtugi waku, na tondũ wa wĩhokeku waku o naguo, amu nĩ kũnenehia ũnenehetie uuge waku kũrĩ maũndũ marĩa mangĩ ma rĩĩtwa rĩaku mothe.

³Mũthĩ o ũrĩa ndetanire, wee nĩwanyamũkĩirie; nĩwanyũmĩrĩirie nĩ kũnjĩkĩra hinya ngoro.

⁴Athamaki othe a thĩ nĩ ngatho magagũcokeria, wee Jehova, rĩrĩa magakorũo maiguĩte ciugo iria kanua gaku kaanoiga.

⁵Ĩĩ-ni, nĩ kũina makaina, magane ikĩro cia Jehova, nĩ gũkorũo riri wa Jehova nĩ mũnene.

⁶Nĩ ũndũ, o na gwatuĩka Jehova e igũrũ mũno, nĩaroraga mũndũ mũhoreri; ĩndĩ, ũrĩa mwĩtũũgĩria, akamũmenyera o kũraya.

⁷O na ingĩtuĩka wa gũthiĩrĩra mĩnyamaro-inĩ, wee ndũngĩaga kũrurumũkagia muoyo wakwa; marakara ma thũ ciakwa, nĩũkamatambũrũkĩria guoko, guoko gwaku kwa ũrĩo nĩkuo gũka’honokia.

⁸Jehova-rĩ, maũndũ makwa nĩakamakindĩra: ũtugi waku, Jehova, nĩ wa tene na tene; wĩra wa moko maku-rĩ, ndũkanaũtiganĩrie.