Psalms 139

¹JEHOVA, gũ’thuuthuuria nĩũ’thuuthuurĩtie, ũgakĩ’menya.

²Wee nĩũmenyaga ũhoro wakwa, gũikara thĩ o na gũũkĩra; ũkoragwo ũkũũraine itaranio ciakwa ũrĩ o kũraya.

³Ũthũngũrũraga kũgenda gwakwa o na gũkoma, ũgakĩmenya ikĩro ciakwa o ciothe.

⁴Amu gũtirĩ kiugo kĩngĩkinya rũrĩmĩ-inĩ rũakwa, gĩtamenyekete nĩwe kĩrĩ gĩothe, wee Jehova.

⁵Nĩ kũ’hingĩrĩria ũ’hingĩrĩirie na thutha o na mbere, na ũgatũũra o ũnjigĩrĩire guoko.

⁶Ũmenyi ũigana ũũ nĩ wa magegania, nĩ kũngĩra ũngĩrĩte; ũrĩ o igũrũ igũrũ, ndũngĩkinyĩrĩka nĩ niĩ.

⁷Ingĩkĩgera na kũ, njũranwo na roho waku? kana ingĩkĩũrĩra na kũ, ’thenge ũthiũ-inĩ waku?

⁸Ingĩhaica ndonye o kũu igũrũ, wee nĩkuo ũrĩ; ingĩara ũrĩrĩ wakwa kwa ngoma, ningĩ ũrĩ o kuo.

⁹Ingĩoyana na mathagu ma ũtheri gũgĩkĩa, mandware ngatũũre o gĩturi kĩa iria rĩrĩa inene-rĩ,

¹⁰O na ndĩ o kũu, no guoko gwaku kũngĩndwaraga, guoko gwaku kwa ũrĩo no gũikare o kũ’nyitĩte.

¹¹Ingiuga atĩrĩ, Nduma nĩyo ĩgũkĩ’humba, ũtheri ũyũ ũ’thiũrũrũkĩirie ũgĩtuĩke ũtukũ;

¹²O na nduma nayo, harĩ wee ti nduma kũrĩ, ũtukũ-rĩ, ũcangararaga o ta mũthenya; nduma na ũtheri no ũndũ ũmwe harĩ wee.

¹³Amu kinya o higo ciakwa nowe waciũmbire; wee nĩwe wandathĩkanirie ndĩ nda ya maitũ.

¹⁴Nĩndagũcokeria ngatho, tondũ mũũmbĩre ũrĩa nyũmbĩtwo nĩ wa magegania o marĩa me kĩmako; mawĩko maku-rĩ, nĩ ma magegania mũno; niĩ mwene nĩnjũĩ ũguo o wega.

¹⁵Mahĩndĩ makwa kũhithara matiakũhitharĩire rĩrĩa ndakũmbĩirũo hitho-inĩ, na ngĩramwo na wara mũnene ndĩ o nguruĩ ya thĩ.

¹⁶Maitho maku no maanyonaga hĩndĩ ĩo ndarĩ o kĩongero, na matukũ mothe nĩmaandĩkĩtwo thĩinĩ wa mbuku yaku, matukũ o marĩa ndatarĩirũo, na matarĩ maragĩa, o na ũmwe.

¹⁷Itaranio ciaku, Mũrungu, ĩ itikĩrĩ na bata mũno harĩ niĩ! ĩ mũigana wacio nĩ mũnene atĩa!

¹⁸Ingĩtua gũcitara, nĩ nyingĩ gũkĩra mũthanga: ningĩ ndahĩndũka, ndĩ o ro ho hamwe nawe.

¹⁹Na arĩ korũo, Ngai, andũ arĩa aaganu wamoraga! gĩtiganei na niĩ, aiti-thakame aya!

²⁰Amu makũng’athagiria o moingumanitie; thũ ciaku-rĩ, igwetaga rĩĩtwa rĩaku tũhũ.

²¹Githĩ ndingĩthũũra acio magũthũire, wee Jehova? acio magũũkagĩrĩra, githĩ ndingĩira ngoro nĩo?

²²Gũthũũra ndĩmathũũrĩte o biũ; ndĩmageranagĩria na thũ ciakwa.

²³’Thuuthuuria, Mũrungu, ũmenye ngoro yakwa; ngeria, ũmenye maũndũ marĩa ndĩrathugunda,

²⁴Wone kana thĩinĩ wakwa nĩhagĩĩte na njĩra ya kwĩreherere kĩeha, ũkĩndware o na njĩra ĩrĩa itarĩ gĩturi.