Psalms 25

¹Ĩ JEHOVA, ngoro yakwa nĩ na kũu igũrũ kũrĩ wee ndĩmĩroretie.

²Wee, Ngai wakwa, nowe ndĩĩhokete, ndũkanareke njonoke; tiga gũkareka thũ ciakwa ingenerere.

³Ĩĩ-ni, arĩa magwetagĩrĩra wee gũtirĩ ũngĩconoka: arĩa magaconoka nĩ mĩgarũka, ĩrĩa ĩgarũkanaga tũhũ.

⁴Menyithia njĩra ciaku, Jehova; ndutaga ikĩro ciaku, ndĩimenye.

⁵Ndwaragĩra o ũhoro-inĩ waku wa ma, o ũkĩndutaga; nĩ gũkorũo wee nĩwe Ngai mwene ũhonokio wakwa; mũthenya wothe ndindaga njetereire o wee.

⁶Ririkana matha maku, o nayo mĩtuganĩre yaku, Jehova; nĩ amu ndĩrĩ yaaga o kuuma tene.

⁷Ndũkaririkane mahĩtia marĩa ma ũnyinyi wakwa, o na kana mehia makwa ma ũremi: ndirikana kũringana o na ũguo ũtugi waku ũtariĩ, nĩ ũndũ wa wega waku, wee Jehova.

⁸Jehova nĩ mwega, o na nĩ mũrũngĩrĩru: tondũ ũcio, arĩa mahĩtĩtie, nĩarĩmonagĩrĩria njĩra.

⁹Arĩa ahoreri arĩmatwaraga na mĩthiĩre o ĩrĩa ya kĩhooto: acio ahoreri-rĩ, nĩ kũruta arĩmarutaga mũgerere wa njĩra yake.

¹⁰Ikĩro ciothe cia Jehova no cia ũtugi na ũhoro-wa-ma harĩ arĩa marũmagia kĩrĩkanĩro gĩake, na maũira marĩa make, makamaathĩkĩra.

¹¹Ĩ Jehova, tondũ wa rĩĩtwa rĩaku-rĩ, njohera waganu wakwa, amu nĩ mũnene.

¹²Nĩ mũndũ ũrĩkũ mwĩtigĩri Jehova? ũcio-rĩ, nĩwe arĩonagĩrĩria njĩra ĩrĩa aagĩrĩirũo nĩ gũthura.

¹³Ngoro yake nĩĩrĩikaraga o ĩhorereire, nayo mbeũ yake nĩĩkegaĩra bũrũri.

¹⁴Ndundu ya Jehova nĩ ya acio amwĩtigĩri; nĩo arĩmenyithagia kĩrĩkanĩro gĩake.

¹⁵Maitho makwa hingo ciothe marorete o harĩ Jehova, amu nowe wa gũteithũkithia magũrũ makwa wabu-inĩ ya mũtegi.

¹⁶Wĩĩ’hũgũrĩre, ũnginyĩrie wega waku, nĩ gũkorũo ndĩ o nyiki, o na gũthĩnĩka ndĩ mũthĩnĩku.

¹⁷Kũrĩa ngoro yakwa ĩhatĩkĩirũo, mĩaramĩrie, ũkĩnyumie mĩtandiũko-inĩ ĩrĩa ndĩ nayo.

¹⁸Rora mathĩna makwa o na ũrĩa nditũhĩirũo; ũkĩndekere mahĩtia makwa mothe.

¹⁹Rora thũ ciakwa, amu nĩciingĩhĩte, nacio i’thũũrĩte na rũthũũro o rũrĩa rũtarĩ tha.

²⁰Menyagĩrĩra ngoro yakwa, ũkandeithũrage; ndũkanareke njonoke, tondũ nowe nyangĩire.

²¹Wĩkindĩru wa ngoro, o gwata ũrũngĩrĩru-rĩ, maũndũ macio nĩmangitagĩre, amu wee nĩwe njetagĩrĩra.

²²Ĩ Ngai, gĩkũũre Isiraeli, oime mĩnyamaro-inĩ yake yothe.