Psalms 48

¹KŨNENEHA, nĩ Jehova nĩ wa kũgoocwo mũno kũu arĩ, itũũra-inĩ rĩa Ngai witũ, o kũu kĩrĩma gĩake kĩamũre.

²Kĩo nĩ gĩthaka mũno mũtũũgĩrĩre wakĩo; gĩkenagĩrũo nĩ thĩ yothe, kĩrĩma kĩu gĩa Zayuni, kĩu kĩĩ mwena wa gathigathini, o kĩo gĩtũũro kĩa Mũthamaki ũrĩa mũnene.

³Kũu nyũmba-inĩ ciakuo cia ũnene Ngai nĩemenyithanĩtie atĩ nĩwe rĩangĩro iraya na igũrũ.

⁴Amu-rĩ, athamaki nĩmaagĩĩturanĩire, makĩhĩtũka rũtere marehanĩte othe hamwe.

⁵Magĩkĩĩonera, na ihinda o rĩu makĩgega, makĩmaka mũno, rĩrĩ rĩngĩ magĩũka o makĩũra.

⁶O hau-hau nĩ kũinaina maaitĩkire kũinaina; makĩnyitwo nĩ ruo, ta rũa mũndũ mũka aagwata kũrũmwo.

⁷Wee-rĩ, no taguo ũtũmaga marikabu iria cia Tarashishi ithuthĩke nĩ rũhuho rũrĩa ruumaga na irathĩro.

⁸O ta ũrĩa twanaigua, noguo tuonete itũũra-inĩ rĩa Jehova mwene mbũtũ cia ita, o kũu gĩtũũro kĩu kĩa Ngai witũ: we Ngai nĩegũkĩrũmia gĩtũũre ho tene na tene.

⁹Ũtugi waku, Ngai, nĩtũtaranĩtie ũhoro waguo twĩ thĩinĩ wa hekarũ yaku.

¹⁰Ũguo rĩĩtwa rĩaku rĩtariĩ, Ngai, noguo ngumo yaku ĩigana o nginya ituri cia thĩ; guoko gwaku kwa ũrĩo-rĩ, kũiyũire o ũthingu.

¹¹Kĩrĩma gĩa Zayuni ta nĩgĩkene, aa mwarĩ wa Juda nĩmagĩcanjamũke, nĩ ũndũ wa matuĩro macio maku.

¹²Ceeraceerai Zayuni, o na mũgĩgũtũnganĩrie; ta gerai icũĩro ciakuo ndaihie na igũrũ.

¹³Rũmbũiyai mũno ũrĩa kũirigĩtwo, na mũroranie nyũmba ciakuo cia ũnene; nĩ getha mũkeraga rũciaro rũrĩa rũĩ thutha.

¹⁴Amu Ngai ũcio nowe Ngai witũ tene na tene; nĩwe ũrĩtũtongoragia nginya hingo ĩtagathira.