Psalms 49

¹IGUAI ũhoro ũyũ, inyuĩ iruka ciothe cia andũ; tegai matũ, inyuothe mũtũũraga gũkũ thĩ;

²Gwata inyuĩ andũ o ũguo, na inyuĩ mũrĩ igweta, inyuĩ itonga o na inyuĩ ngĩa, mũkĩigue inyuothe hamwe.

³Kanua gakwa nĩgekwaria ciugo cia ũũgĩ ũrĩa wa ma; mwĩrurumio wa ngoro yakwa-rĩ, ũkuumana na ũtaũku.

⁴Ngũinamĩrĩria gũtũ ndĩĩiguĩre ngerekano; ũhoro ũyũ wakwa mũhumbĩke ngũũhumbũria ngĩinagia kĩnanda kĩa mũgeto.

⁵Nĩ kĩ kĩngĩtũma ndĩĩtigĩre matukũ maakinya marĩa moru, rĩrĩa njigĩrĩirio nĩ waganu wa arĩa mendaga kũndunya gĩikaro,

⁶O arĩa mehokaga ũtonga wao, magakĩĩraha tondũ wa ũrĩa maingĩhĩtie indo?

⁷Gũtirĩ ũngĩhota o na atĩa gwĩkũũrĩra mũrũ wa nyina, atĩ arutĩre Ngai kĩndũ kĩngĩmũkũũra;

⁸(Nĩ gũkorũo ũkũũri wa mĩoyo yao nĩ goro o mũno; no ũtiganwo naguo o nginya tene;)

⁹Gũtingĩhoteka, atĩ nĩguo mũndũ ũcio atũũre o gũtũũra, atarĩ hingo akonana na kuora.

¹⁰Tondũ nĩ kuona akona atĩ andũ arĩa ogĩ no makuaga, gwata kĩrimũ o na ũrĩa kĩnunwa nĩ gũthira mathiraga o hamwe; ũtonga wao magakĩũtiga na andũ angĩ.

¹¹Mbĩrĩra nĩcio ituĩkaga nyũmba ciao cia tene na tene, nocio itũũro ciao nginya njiarũa na njiarũa, o ro acio metanagia ng’ũndũ na marĩĩtwa mao ene.

¹²Andũ-rĩ, matitũũraga, o na me na igweta; mahaana o ta nyamũ, ũrĩa ikuaga.

¹³Ĩo nĩyo njĩra ya arĩa irimũ cia mwĩiganio: nao amarũmĩrĩri nĩmagathagĩrĩria ndeto ciao.

¹⁴Nĩ kwa ngoma merekeirio, o ta rũũru rũa ng’ondu; mũrĩithi wao nĩ gĩkuũ: rũcinĩ magatuĩka a gwathagwo nĩ andũ arĩa arũngĩrĩru; na kĩhũmba kĩao no gĩthirĩrĩkĩre kwa ngoma, akĩrĩ kuo ũtũũro wao.

¹⁵Ĩndĩ muoyo wakwa-rĩ, Ngai nĩ gũkũũra akaũkũũra moko-inĩ ma kũu kwa ngoma; nĩ gũkorũo we nĩwe ũkanjiyũkia.

¹⁶Ndũkanetigĩre, mũndũ aatonga, na riri wa gwake weongerera:

¹⁷Tondũ-rĩ, aakua, ndarĩ kĩndũ agathiĩ nakĩo; riri ũcio wake ndũgaikũrũkania nake.

¹⁸O na angĩtuĩka atĩ rĩrĩa aarĩ muoyo nĩegathagĩrĩria-rĩ, (o nawe, andũ magagĩkũgatha weĩka wega-rĩ,)

¹⁹Gũthiĩ agathiĩ o kũrĩ riika rĩrĩa rĩa maithe, acio matagacoka kuona ũtheri rĩngĩ.

²⁰Andũ-rĩ, o na me na igweta, na ti ataũku, mahaana o ta nyamũ, ũrĩa ikuaga.