1 Corinthians 14

¹Mutthareke ophenta ni mwiilipiherye ke ophavela soovahiwa sa muroohoni, vanci-enexa yoovahiwa yoolaleerya.

²Tthiri ole onlavula ilavulelo sootikiniha khonaalavulela atthu, ohikhanle omulavulela Muluku, maana khaavo onsuwela enihimy'awe ni muroohoni onnihimya soowipithihiwa.

³Nto ole onlaleerya masu a Muluku onlavula n'atthu wira aalipihe, aatumereryaka ni aalipihaka murima.

⁴Ole onlavula ilavulelo sootikiniha oniikhoomaliha mmans'awe, nto ole onlaleerya onlipiha ekerexa.

⁵Miyo kaatthuna wira nyuwo othene mulavuleke ilavulelo sootikiniha, nto kaatthunexa wira mulaleeryeke, maana ole onlaleerya ti muulupale onvikana ole onlavula ilavulelo sootikiniha nave-tho oreera waya owo otaphulenle wira ekerexa yaakhele olipa.

⁶Tthiri vano axinn'aka, miyo karwa wa nyuwo, kilavulaka ilavulelo sootikiniha kinrowa woophwanyihani exeeni, kaaholeeleni-ru, muhina mwa yoowuupuweleliwa wala muhina mwa osuwela, wala muhina mwa olaleerya nnakhala muhina mwa mwiixuttiho?

⁷Siiso hata itthu sihirina okumi w'oruma ntoko niphenta wala xittaattha saahivirikaneke marumelo, enrowa osuweliwa sayi vakhala wira eyo enoompwa ni nipetta wala ni xittaattha?

⁸Maana nlope naruma voohisuwanyeya, t'ani ontthuna wiilikanyiherya wira arowe okhottoni?

⁹Siiso-tho nyuwo mwaahilavuleke moolumo aniiweya nto enrowa osuweliwa sayi etthu enihimy'anyu? Maana munrowa okhalaka ntoko munlavulela musulu.

¹⁰V'ekeekhayi moolumwenkuni-mu khareere malavulelo, varokhaalaru siiso mwa yaawo khiyaavo elavulelo ehinihimya etthu.

¹¹Nto miyo kaahisuweleke elavulelo ya mutthu onkilavuliha kinookhala namurwi wa mutth'ule onkilavuliha n'uwo onookhala namurwi wa miyo.

¹²Siiso-tho nyuwo, okhala wira mumphavela soovahiwa sammunepani, mphaveleke okelela ohoolo wira mulipihe ekerexa.

¹³Tivo ole onlavula ilavulelo sootikiniha avekeleke wira aweryeke otaphulela.

¹⁴Maana miyo kaavekelaka n'ilavulelo sootikiniha, erooho aka tinvekela nto osuwela waka onihala ohiimal'etthu;

¹⁵vano nto kintthuna wira exeeni? Kinanvekela ni munepa nave-tho kinanvekela ni osuwela waka, kinaamwiipa ni erooho nave-tho kinaamwiipa ni osuwela.

¹⁶Nave-tho nyuwo mwaavekelaka ni erooho paahi, ole ohinsuwela ontthuna wira sayi amen mwamaliha ovekela owo ahisuwelaka enihimy'anyu.

¹⁷Tthiri nyuwo veekeekhayi munnivekela oratta-ene, nto owo mukina khonlipihiwa.

¹⁸Kinnimuxukhuru Muluku aka, okhala wira kinnilavula ilavulelo sinci-ene wovikanani nyuwo othene.

¹⁹Siiso nto kintthunexa olavula mukerexa moolumo mathanu n'usuwela waka, nave-tho wira kiwerye waixuttiha akina, vahikhanle olavula moolumo imiya miloko muloko a ilavulelo sihinisuweliwa.

²⁰Axinn'aka muhikhaleke anamwane moosuwelani, nto mukhaleke anamwane n'itthu sootakhala ni mukhaleke atthu aalupale moosuwelani.

²¹Mulivuruni mwa ikano sa Monse moolempwa-mo wira: ?Kinimwaalavulela atthu ala muhina mwa iyano s'atthu akina nto hata siiso khanrowa okiiwa, anihikya t'Apwiya.?

²²Siiso ilavulelo ti ethoonyeryo, kahiyo w'ale ari aKristu, nto w'ale ahikhanle aKristu, vano olaleerya kahiyo ethoonyeryo y'atthu oohaamini, ethoonyeryo y'atthu oowaamini.

²³Tthiri ekerexa yothene yathukumana nipuro nimosa, nto othene khiyalavula ilavulelo sootikiniha, vano yakela-mmo atthu ahinsuwela wala atthu ahikhanle aKristu, khanrowa ohimya wira munikhwaasa anepa?

²⁴Vano othene anyumwaalaleeryaka nto khuvolowa-mmo mutthu mukina oohaamini wala mutthu oohisuwela, owo onnivaanyihiwa mwa sothene ni onnilamuliwa mwa sothene.

²⁵Vano sinrowa osuwanyeya itthu sivithiwe va murimani vawe, nto siiso owo uuramihaka owiitho wawe mpakha vathi onoomukokhorela Muluku ahimyaka eriyari y'atthu wira veekeekhayi Muluku ori variyari vanyu.

²⁶Vano-nto niireke exeeni axinn'aka? Mwathukumana vale mukina ookhalana nsipo, mukina ookhalana mwiixuttiho, mukina ookhala yoowupuwela, mukina ookhala ilavulelo, mukina ookhala otaphulela ilavulelo. Sothene iya sinniiriwa wira mulipihaneke.

²⁷Akhala mikina onlavula ilavulelo sootikiniha, alavuleke ilavulelo piili, woovikaniha ilavulelo tthaaru orowa ohoolo, nto akhale mutthu ootaphulela

²⁸Nto aahikhale mutthu ootaphulela akhale amaanle-ene mukerexa ni alavuleke ni murim'awe, vamosa ni Muluku.

²⁹Nave maprofeta elavuleke etthu enihimy'aya.

³⁰Vano mukina okilanthe wamurweela yoowupulula, ole oopacerya amaaleke.

³¹Okhala wira othene anyu munoowerya olaleerya, mmosa mmosa, wira othene anyu mwiixutte ni mukhale ookurunuxiwa murima.

³²Nave minepa sa maprofeta siniwiiwelela maprofeta yaawo,

³³Okhala wira Muluku kahiyo Muluku oowakanyerya, ta murettele ntoko mwa ikerexa sothene s'atthu ooreera murima.

³⁴Mukerexa athiyana ekhaleke oomaala, okhala wira awo khantthunihiwa olavula, nto ekhaleke oowiiwelela, nave-tho ntoko sinirum'aya ikano sa Monse.

³⁵Yaaphavelaka wiixutta etthu ekina yaakoheke axiiy'aya owaani, okhala wira wa muthiyana etthu yoowuliha muru olavula mukerexa.

³⁶Khino masu a Muluku akhumme wa nyuwo? Wala awo arwiiye wa nyuwo mekhiinyu?

³⁷Akhala mutthu onuupuwela okhala profeta wala mutthu a erooho, asuwele wira itthu soolepenly'akani ti sooruma s'Apwiya.

³⁸Nave akhala mutthu oohisuwela ela, ahisuweleke.

³⁹Tivo axinn'aka mphaveleke ni wiilipiha olaleerya, nave muhikhottihe olavuliwa ilavulelo.

⁴⁰Sothene siiriweke voophwanelela ni wiiwanana.