1 Corinthians 15

¹Axinn'aka kinniwuupuxeryani Ehapari Yooreera yolaleenryaakani, y'eyo-tho yaakhenly'anyu, nave y'eyo-tho munkhalel'anyu nthiti weettela.

²Mwa y'eyo-tho nyuwo munnoopowa, mweettelaka-ru masu awo ntoko siisaale soolaleenryaakani, mwaahiire-ru siiso munaamini mahala.

³Opacerya wene, miyo kihoovahereryani y'eyo-tho yaakhenly'aka wira: Kristu okhwenle itampi s'ahu, ntoko silempw'aya,

⁴ni wira aahivithiwa ni khuhihimuwa mookhwaani mmurottoni mwaya ntoko silempw'aya.

⁵Ni aahimukhumelela Sefa numala aahaakhumelela arummwa muloko nanli.

⁶Numala aahooniwa ekwaha emosa n'axinna yaavikanne miloko miloko mithanu mwa yaawo nlelo akhala nave-tho akina anoorupa.

⁷Numala aahooniwa ni Yakopo, numala aahooniwa n'arummwa othene.

⁸Vano wookiseryani, numala othene, nave-tho aahooniwa ni miyo, ntoko mutthu oyariwe okathi ovinre-ene.

⁹Okhala wira miyo kiri mwamukhaani wavikana arummwa othene, nkiniphwanela witthaniwa murummwa, maana koolupattha Ekerexa ya Muluku.

¹⁰Nto mwa mahala a Muluku miyo kiri ntoko sikhanly'aka, ni mahal'awe okivahaly'awe nkivahiwe siiyo, ohiya vo, koovara muteko munci-ene waavikana arummwa yaawo othene.

¹¹Nto kikhale miyo wala akhale yaawo ti siiso silaleny'ahu ni ti siiso nyuwo saaminny'anyu.

¹²Vano vaalaleiwaka wira Kristu oohihimuwa mw'alipa ookhwa, nto xeeni akina mwa nyuwo ohimyaka wira khiwaavo ohihimuwa w'alipa ookhwa?

¹³Nave waahikhanle ohihimuwa w'alipa ookhwa, weeso-tho Kristu khahihimunwe.

¹⁴Vano Kristu ahahihimunwe, olaleya wahu ti weethiru ni waamini wanyu ti w'ethiru.

¹⁵Nave siiso-tho hiyo nimphwanyiwa okhala anamoona oowootha a Muluku. Okhala wira nnihimya sa Muluku, wira oomuhihimuxa Kristu, yoowo tthiri ohihimunwe, vakhala wira veekeekhayi alipa ookhwa khanihihimuwa.

¹⁶Vakhala wira alipa ookhwa khanihihimuwa nave-tho Kristu khahihimunwe,

¹⁷Nave Kristu ahahihimunwe, waamini wanyu ti w'ethiru nto nlelo munikhala mutampini mwanyu.

¹⁸Nave-tho ale anrupa mwa Kristu, ari oorimeela.

¹⁹Hiyo ekumi ahu ila naamuroromelaka-ru Kristu paahi, hiyo ninkhala oohasuwa wavikana atthu othene

²⁰Nto veekeekhayi Kristu oohihimuwa eriyari y'alipa ookhwa, owo khukhala mulipu woopacerya mw'ale anrupa.

²¹Siisaale okhwa sirwiiy'aya mwa mutthu mmosa siiso-tho ohihimuwa w'alipa ookhwa orwiiye mwa mutthu mmosa.

²²Okhala wira ntoko atthu othene sinkhw'aya mw'Atamu, siiso-tho atthu othene anoohihimuxiwa mwa Kristu.

²³Tthiri khula mmosa n'ukathi awe, Kristu turi oopacerya, numala ale ari a Kristu nihiku ninrw'awe.

²⁴Numala ophiyeke woomaleloni, vaavo vanrow'awe onvahererya omwene Muluku Tiithi, numala wapwetexa makhulupale othene n'ikuru sothene n'uwerya wothene.

²⁵Maana Kristu ohaawa okhala mwene mpakha waapweha awanani awe vathi va inawu sawe.

²⁶Nwanani onrowa okiserya opwetexiwa ti okhwa.

²⁷Okhala wira itthu sothene vathi-va inawu s'awe vano vaahimmwaka wira sothene soopwehiwa vathi va inawu s'awe, veekeekhayi ole ompwehenrye khunikhala-mu muhina.

²⁸Nave itthu sothene apweha-ru vathi nave-tho Mwaana yoowo onimwiipweha vathi v'Ole onvaherenrye itthu sothene wira Muluku akhale othene mwa sothene.

²⁹Vaari siiso, anrowa wira exeeni ale anipatiseriwa mwaha wa yaawo?

³⁰Nave-tho xeeni hiyo nniir'ahu itthu soowoopiha okathi wothene?

³¹Axinn'aka, miyo kinnilaphela wira khula nihiku kinnookhwa, kinniittottopa mwaha wa nyuwo mwa Kristu Yesu Pwiy'ahu.

³²Ntoko mutthu koowana w'Efesu n'inama soowali, kinipwanya exeeni? Vakhala wira alipa ookhwa khanihihimuwa nilyeeke niwuryeke okhala wira meelo nnimookhwa.

³³Muhootothiwe soovanelo soonanara ohonona makhalelo ooreera.

³⁴Mulipeleleke n'ixariya, nave muhittheke, okhala wira atthu akina kharina osuwela wa Muluku, kinihimya siiso wira kiwuuliheni muru.

³⁵Vano akhala akina ankoha wira: ?Alipa-ookhwa anihihimuwa sayi? Ni anrowa orwaana erutthu xeeni??

³⁶Nyuwo mw'alolo, yeeyo enaal'anyu khenimela yaahipacerye-ru okhwa,

³⁷nave okathi munaal'anyu, khamunaala erutthu yeeyo enrowa omela, nto munaala epyo paahi ntoko y'etriku wala epyo ekina.

³⁸Vano Muluku onnivaha erutthu ntoko sintthun'awe, nave khula epyo, erutthu aya.

³⁹Kahiyo erutthu y'atthu, nave ekina erutthu ya inama, ekina erutthu ya ihopa nave erutthu ekina ti ya ipalame.

⁴⁰Nave-tho sookhala irutthu sa wirimu n'irutthu sa vathi va siiso nto nookhala nttittimiho na wirimu, ni nttittimiho na vathi va.

⁴¹Wookhala waarya wa nsuwa, waarya okina ti wa mweeri, waarya okina ti wa itheneeri, okhala wira waarya wa khula etheneeri onnivirikana.

⁴²Nave-tho ohihimuwa w'alipa ookhwa tuniirey'aya siiso, enaaliwa erutthu enrowa wuntta enrowa ohihimuwa erutthu ehinrowa wuntta,

⁴³enaaliwa yootteettheya, enahihimuwa yoolipa.

⁴⁴Enaaliwa erutthu yoophattuwana, ni enihihimuwa erutthu ya muroohoni. Vakhala wira yookhala erutthu yoophattuwana, nave-tho yookhala erutthu ya muroohoni.

⁴⁵Tthiri ti siiso silempwaly'aya wira: Mutthu oopacerya Atamu opakiwe mwa erooho ekumi. Nave Atamu ookiserya owo erooho onivaha ekumi.

⁴⁶Nto kahiyo enipacerya erutthu yammunepani enipacerya erutthu yoophattuwana, ottuli waya enarwa erutthu ya muroohoni.

⁴⁷Mutthu oopacerya a vathi-va ta vatthayani, mutthu a nenli, Pwiya ta wirimu.

⁴⁸Siiso mutthu oopacerya saary'awe a vatthayani siiso-tho atthu a vathi-va anlikana ni yoowo. Inamuna siry'awe mutthu a wirimu, siiso-tho atthu a wirimu ari siiso.

⁴⁹Siiso sinrwan'ahu moneyeryo wa mutthu a vatthayani, siiso-tho ninrowa orwaana moneyeryo w'ule a wirimu.

⁵⁰Vano axinn'aka kinoohimeeryani wira erutthu n'iphome khiiniwerya waakhela omwene wa Muluku, hata etthu yoowuntta khiniwerya waakhela ohintta.

⁵¹Moone wira kinooleelani esiiri, kahiyo wira hiyo othene ahu ninrowa orupa, nto hiyo ninrowa otatuxiwa.

⁵²Naanaanoru ntoko waaphila, okathi ninrow'aya orumihiwa nlope nookiserya, okhala wira nlope nlo ninrowa oruma, nave alipa ookhwa anrowa ohihimuwa oohintta, nave hiyo ninrowa otatuxiwa.

⁵³Tthiri vanniphaveleya wira erutthu ahu ila enintta eware erutthu ehinikhwa.

⁵⁴Vano okathi erutthu ahu ela enintta vanrow'aya oara erutthu ehinintta n'ila ekhwa vanrow'aya owara erutthu ehinikhwa sii anrowa omaliheriwa n'uxinttiwa

⁵⁵Nyuwo okhwa, oxintta wanyu ori vayi? Nyuwo okhwa owerya wanyu ori vayi?

⁵⁶Owerya wa okhwa, etampi nave ikuru s'etampi ikano.

⁵⁷Nimuxukhuruku Muluku, yoowo onnivaha oxintta mwa Pwiy'ahu Yesu Kristu.

⁵⁸Tivo, axinn'aka kinoophent'akani, mukhale oolipa, oohittikinyeya, mukhaleleke nthiti ovara muteko w'Apwiya, musuwelaka wira muteko munaavarel'anyu Apwiya kahiyo wa mahala.