1 Corinthians 16

¹Vano, wa soovaha soowakhaliherya atthu ooreera murima nyuwo-tho nvaheke ntoko sirummy'aka ikerexa sa oKalasia.

²Khula ettiminku, mutthu ti mutthu a nyuwo, asukeke nipuro naya, vate vawe, ntoko sinwery'awe ophanya wira sihiiriwe soovaha oathi onrw'aka.

³Nto kaphiya vale, kinimwaaruma atthu orowa oYerusalemu n'ipaphelo wira yaaroihele soovaha sanyu.

⁴Vaareerelaka wira ni miyo kirowe, anoorowa ni miyo.

⁵Kinoorowa okumana ni nyuwo, kimanle-ene ovira oMasetonia.

⁶Nave kinuupuwela wira kinookhala ni nyuwo, nave-tho enoovira eyiita yothene, wira mukihoole memmo miyo kinrow'aka ovira.

⁷Maana nkintthuna woowehani naanaano va kinivir'aka, nto kinniroromela wira kinookhala ni nyuwo okathi mukina.

⁸Tthiri, kinookhala w'Efesu mpakha niira na Pentekosite.

⁹Okhala wira kootthukuleli mukhora muulupale w'ovara muteko, nave alipa ookivaanyiha khareere waatta.

¹⁰Vano Timotiyo arowa wa nyuwo, mmoone wira akhale ni nyuwo ahoova etthu okhala wira owo onnivara muteko w'Apwiya siisaale-tho sinivar'aka miyo.

¹¹Tthiri ahikhale ontthuna omuthanya, nto mmuhooleke ni murettele, wira arwe akumane ni miyo, maana miyo n'axinn'ihu ninninwehererya yoowo.

¹²Mwaha w'Apoolo kaahimutumererya vanci-ene wira arowe vamosa n'axinna okumana ni nyuwo nto veekeekhayi owo khaatthunne orowa iwo naanaano va, onimoorwa okathi woophwanelela.

¹³Mulipeleleke, ni mukhale oolipa mu waaminini mukhale ookhoomala ni mwiilipiheke.

¹⁴Itthu sothene siniir'anyu mwiireke n'uphenta.

¹⁵Vano kinnoovekelani axinn'aka wira (munnimusuwela Sitefana n'amusi awe owo mulipa a w'Akhaiya ni wira yaahiivahererya mmans'aya muteko woowarumeela atthu ooreera murima),

¹⁶wira nyuwo-tho nwiiweleleke atthu siisa, n'ule othene onikhaliherya muteko ni namuteko.

¹⁷Kinnitteeliwa murima n'urwa wa Sitefana ni Fortunato ni w'Akhaiko okhala wira awo aamaliha yeeyo yoohaleelihani.

¹⁸Maana awo aariiriha munep'aka ni wawinyu. Tthiri, mwaasuweleke-tho atthu ntoko yaala.

¹⁹Ikerexa sa w'Asia sinnookhomasani. Sinnookhomasani nyuwo vanci-ene mw'Apwiya, Akila ni Prisila, vamosa n'ikerexa eri vate vaya.

²⁰Axinna othene annookhomasani, mukhomasaneke mukina ni mukhw'awe n'ipeco yooreera.

²¹Miyo Paulo, kinnilepa nkhomaso nintata n'aka.

²²Akhala ohinaaphenta Apwiya akhale ootakhalihiwa, Apwiya animoorwa?

²³Mahala a Apwiya Yesu, akhale ni nyuwo.

²⁴Ophenta w'aka okhale ni nyuwo othene, mwa Kristu Yesu. Amen!