2 Corinthians 1

¹Miyo Paulo, murummwa a Yesu Kristu n'utthuna wa Muluku, ni munna Timotiyo, ninnoolepelani nyuwo Ekerexa ya Muluku yeeyo enikhala oKorinto, vamosa n'atthu ooreera murima anikhala elapo yothene ya w'Akhaiya.

²Mahala akhale ni nyuwo ni murettele onikhuma wa Muluku Tiith'ihu ni wa Pwiya Yesu Kristu.

³Attottopeliwe Muluku, Tiithi awe Pwiy'ahu Yesu Kristu, Tiithi a othunku ni Muluku a okurunuxa murima wothene.

⁴Yoowo t'oninlipiha moohaawani mwahu mothene wira niweryeke waakurunuxa murima hiyo nivahiw'ahu ni Muluku.

⁵Tthiri siisaale ohaawa wunci-ene wa Kristu onooney'aya mwa hiyo, siiso-tho okurunuxiwa wahu murima onikhala woowaatta muhina mwa Kristu.

⁶Nto, naahaawaka nniirela olipihiwa ni woopowa w'anyu, naakhalaka oolipihiwa, nave-tho nniirela olipihiwa w'anyu, weiwo oniweriha nyuwo nweryaka ovilela sohaawa imosa-ru seiyo hiyo-tho sinoon'ahu.

⁷Ororomela w'ahu mwa nyuwo ori woolipa, nisuwelaka wira siisaale sinihaaw'anyu, siiso munookurunuxiwa murima.

⁸Axinn'aka hiyo khanintthuna wira muhisuwele okhumaly'aya soohaawa saaniphwannye elapo ya w'Asia, ti vo soohaawa iyo saahivikana ikuru s'ahu, mpakha ohikhalana muroromelo hata w'ekumi ahu.

⁹Nto siiso mwa hiyo mmansihu naahikhalana nlamulo na okhwa, wira hiyo nihiiroromeleke mmansihu, vano nimuroromeleke Muluku yoowo oniwerya waahihimuxa alipa ookhwa,

¹⁰Owo tonaakihenrye ni ononaakiherya okhwa iwo wootepaxa wunnuwa, ninniroromela mwa yoowo wira nlelo onaamunaakiherya,

¹¹nave-tho nyuwo munikhaliheryaka ni mavekelo anyu munivekelelaka hiyo, wira mwaha wa sooreera sinci-ene seiyo niireliw'ahu, atthu anci-ene emuxukhuruku Muluku mwaha wa hiyo.

¹²Maana nttittimiho n'ahu tinla: Onamoona w'ankhili ahu, wira n'ureera murima voomalela ni wa othunku wa Muluku kahiyo n'usuwela w'atthu, nto moolumwenkuni-mu ninnikhala vanci-enexa variyari vanyu wa mahala a Muluku.

¹³Okhala wira khinoolepenleni etthu ekina, sihikhanle seiyo sinsom'anyu ni sinsuwel'anyu oratta-ene, ni kinniroromela wira ohoolo munoosuwela sothene oratta-ene.

¹⁴Nave-tho ntoko sisuwenly'anyu nyuwo okathi mukina, wira hiyo na nttittimiho nanyu, siiso-tho nyuwo mwa-nttittimiho nahu nihiku ninrw'awe Pwiy'ahu Yesu.

¹⁵Kaaminiki siiso, kaahitthokolela opacerya wooxekuryani, wira koophwanyiheni oreeriwa wa neenli,

¹⁶ni kinoovira owannyu, kirowaka oMasetonia nave kaatthikaka oMasetonia kinimoorwa okumana ni nyuwo ni wira kihooliwe ni nyuwo kaarowaka oYuteya.

¹⁷Khino kitthokolelaka siiso, miyo nkuupuwenle saana? Wala sootthokolela saka kitthokolenle ntoko erutthu, munuupuwela wira miyo kinihimya ayo ni nnaari okathi omosa-ru?

¹⁸Ohiya vo okhala wira Muluku toororomeleya, moolumo ahu ninlavul'ahu wa nyuwo kahiyo ayo ni nnaari.

¹⁹Okhala wira Yesu Kristu, Mwaana a Muluku, Yoowo alaleiwe ni hiyo mwa nyuwo, eyo p'iyo, ni miyo ni Silvano ni Timotiyo khiwaakhanle ayo ni nnaari, nto mwa Yoowo waari ayo.

²⁰Maana anatiri, a Muluku othene mwa yoowo anaakhuleliwa wira ayo, tivo-tho mwa yoowo nniir'ahu Amen, wira attittimihiweke Muluku mwa hiyo.

²¹Nto ole onnilipiherya vamosa ni nyuwo mwa Kristu ni onithanlale, ti Muluku.

²²Yowo-tho tontthinttye mmurimani mw'ahu, ni khunivaha neemexeryo na Erooho.

²³Tthiri miyo, kinnivahererya ekumi aka wa Muluku wira ti namoona, wira kiwuureleni nyuwo, nlelo nkihitthikenle-wo oKorinto,

²⁴Kahiyo wira nimphavela okhala axineene waamini w'anyu, nto okhala wira ninvara muteko vamosa ni nyuwo maana moolipiherya waamini w'anyu.