Loading Bible Translation
First-time download in progress. This may take a few seconds…
Makhuwa New Testament Wordproject Bible
17 verses
1Tivo miyo kihuupuwela ohirwa-tho wa nyuwo wira kihooriipiheni murima.
2Maana miyo kooriipihani murima, ti pani ontthuna okitteeliha murima ohikhanle yoole miyo omuriipihaly'aka murima?
3Tivo voolepenly'akani siiso, wira miyo karowa wa nyuwo kihiriipiwe murima mwaha w'ale yaakhanle ookitteeliha murima kaaminiki wa nyuwo othene wira otteeliwa w'aka murima t'otteeliwa wanyu-tho nyuwo.
4Okhala wira mwa eriyari yoohaawa wunci-ene ni wiiniwa murima kaahoolepelani epaphelo ela ni maithori manci-ene, nave nkoolepenleni wira mukhale ooriipiwa murima, nto wira musuwele ophenta wuulupale kinoovah'akani.
5Akhala mutthu onimuriipiha murima mukhw'awe, khakiriipihale murima miyo paahi, nto wira miyo ehikiwome mahala-ene, kinnihimya siiso kiwiirelakani yenyu othene,
6ehukhumu enivahiw'awe n'atthu yoophiyerya.
7Nto vano etthu yooreera omulevelela n'omulipiha yoowo, wira owo ahitepe orimeela mwaha wooriipiwa murima vanci-ene.
8Vano kinnoovekelani wira mmooniherye yoowo ophenta w'anyu.
9Tivo kihalaka woolepelani epaphelo ela wira kisuwele wira nyuwo mw'atthu oowiiwelela mwa sothene.
10Ole nyuwo munimulevelel'anyu, ni miyo kinoomulevelela, tthiri veekeekhayi yeeyo miyo kinimulevelel'aka, kinimulevelela mwaha wa nyuwo vamaithoni va Kristu,
11wira nihiweriwe ni Satana, maana noosuwela saana simphavel'awe.
12Vaaphiyaly'aka oTrowati wira kilaleye Ehapari Yooreera ya Kristu, kaahitthukuleliwa mukhora mw'Apwiya,
13nto nkaasiveliwe muroohoni mwaka, maana nkaamphwannye munn'aka Tito, ti vo kaahaalaxerya atthu awo kivinya kirowaka oMasetonia.
14Tthiri mahala a Muluku, yaawo annihoola mooxinttani okathi p'ukathi mwa Kristu, ni mwa hiyo onnooniherya mapuro othene wunkhela w'osuwela w'awe.
15Okhala wira hiyo na muhiriri wooreera wa Kristu ohoolo wa Muluku mwa yaawo owoopowa hata w'ale anrimeela.
16Nto wa akina muhiriri w'okumi onivaha ekumi. Vano t'ani ophwanenle itthu iya?
17Maana hiyo khaninlikana n'atthu akina anci-ene, animpakela nakoso masu a Muluku, ohiya vo, ninlavula sa Kristu n'ikhweeli ntoko a muluku, vamaithoni va Muluku yoowo.