2 Corinthians 3

¹Khino nimpacerya-tho waamini mmansihu? Wala nookhalana muhaleeliho nto wowooveleeliheryani nyuwo ipaphelo sikina soowaaminiha atthu akina wala soowaaminihani nyuwo?

²Nyuwo mwa epaphelo ahu elempwe mmurimani mwahu, esuweliwe ni esommwe n'atthu othene;

³vano muhooniheriwa wira nyuwo mwa epaphelo ya Kristu epacereiye muhina mwa hiyo, ehilempwe n'etinta, nto elempwe ni Erooho ya Muluku a ekumi, khilempwe vamapaweni a maluku, eyo elempwe mmurimani.

⁴Nave ninnikhalana nroromelo nlo wa Muluku muhina mwa Kristu,

⁵kahiyo wira hiyo ninwerya wuupuwela etthu p'itthu mekhihu, n'ikuru s'ahu, owerya w'ahu okhumme wa Muluku,

⁶yoowo t'onivahale-tho ikuru sookhala arummwa a Waataana wa Naanaano, kahiyo a yoolempwa eyo p'iyo murumeyi onruma wiiweleliwa sooxuttiha sa Monse, nto murumeyi a erooho, okhala wira yoolempwa enniiva, nto erooho ennivaha ekumi.

⁷Vaari wira muteko wa ikano silempwe vamalukuni seiyo sinruuha okhwa waahisareya nttittimiho, mpakha atthu a Israyeli ohinawerya oweha owiitho wa Monse, mwaha wa nttittimiho n'owiitho w'awe, weiwo wahaalekenle,

⁸vano muteko wa Erooho khiyaarowa otepaxa wunnuwa nttittimiho!

⁹Maana vakhala wira muteko wa ikano sinruuha otthukweliwa waari wanttittimiho, muteko wa xariya onnitepaxa okhala wanttittimiho.

¹⁰Tthiri veekeekhayi, yeeyo yaari yanttittimiho khalayi, vano kahiyo etthu ohoolo wa nttittimiho n'ulupalexa na naanaano.

¹¹Okhala wira vari etthu yoohilekela y'ari ya nttittimiho, ele ehinvira ennitepaxa okhala ya nttittimiho.

¹²Tthiri nikhalanaka nroromelo siisa, ninnitepa olavula ni wiilipiha.

¹³Nave hiyo khaninlikana ntoko Monse, yoowo aakhuneela owiitho w'awe n'ekuwo, wira atthu a Isarayeli ehoone oratta-ene waamalel'aya ele yahaalekela.

¹⁴Vano ankhili aya aattiyeliwa. Tthiri mpakha olelo va yaasomaka waataana wa Khalayi, ekuwo yeeyo-tho enihala ekhuneeliwe, awo khansuwelihiwa wira mwa Kristu, ennikhala yookhunuliwa.

¹⁵Nto mpakha vano akina yarukunuxa murim'aya mw'Apwiya, ekuwo eyo enikhala yookhuneeliwa murim'aya.

¹⁶Vano, akina yarukunuxa murim'aya mw'Apwiya, ekuwo eyo ennikumihiwa.

¹⁷Tthiri Apwiya ti Erooho, nto vaavo vankhal'aya Erooho, vaavo-tho vaakhala-vo otaphuwa.

¹⁸Vano hiyo othene nikhunuliwa-ene owiitho ninnoona nikhalaka ntoko eloola, nooniheryaka nttittimiho n'Apwiya, ninnikhala ootatuxiwa naakhelaka nttittimiho ninkhuma mwa nttittimiho, nilattanihiwaka ni yoowo ntoko mwa Erooho y'Apwiya.