2 Corinthians 4

¹Siiso sirin'ahu mutek'ola ntoko sivahiw'ahu n'ureera w'awe murima, khannooceela,

²ohiya vo, nookhootta itthu seiyo soowuuliha muru siniiriwa ni mwiitiho, khanneetta niphavelaka olavilavi hata ohonona masu a Muluku, nto niniitumererya mmansihu wira atthu othene anisuweleke va maithoni va Muluku, yooniheriwaka n'ikeekhayi.

³Nto Ehapari ahu Yooreera enlaley'ahu, nlelo yakhala-ru yookhuneeliwa ti yawaya ale anrimeela, yaawo ari ookhuneeliwa,

⁴atthu awo oohaamini muluku a vathi-va oottiyela miruku saya wira muthuko w'Ehapari yanttittimiho na Kristu ehaamwaleeleke, yoowo t'uri oolattana ni Muluku.

⁵Okhala wira khanniilaleya mmansihu, nto nimmulaleya Kristu ntoko Pwiya nave hiyo na ipottha sanyu, mwaha wa ophenta wa Kristu.

⁶Maana Muluku yoowo tuhimmye wira: Mweepiphini munimwaarya-mo muthuko, ti yoowo onaarya mmurimani mwahu wira aamwaleele ankhili a nttittimiho na Muluku, owiitho wa Kristu.

⁷Tthiri muhakhu owo ninsuka mmwaapuni w'oloko, wira owerya wuulupalexa okhala wa Muluku ni ohikhale wawihu.

⁸Mwa itthu sothene hiyo ninnivelavelihiwa nto khannihaawa ninnihaaxiwa nto khannooceya,

⁹ninnilupatthiwa, nto khaninnyanyaliwa, ninnikhala ooyevihiwa nto khanimpweteya.

¹⁰Mahiku othene ni mapuro othene ninnikuxa mweerutthuni mwahu okhwa wa Yesu wira ekumi ya Kristu yooneye-tho mweerutthuni mw'ahu.

¹¹Okhala wira hiyo nri akumi, okathi wothene ninkhala oovahereriwa wookhwani mwaha wa Yesu, wira ekumi ya Yesu yooneye-tho mweerutthuni mw'ahu enkhwa.

¹²Siiso okhwa iwo onnivara muteko aya mwa hiyo, nave ekumi ennivara muteko aya mwa nyuwo.

¹³Tthiri miyo kinnikhalana munepa yoowo mmosaru woowaamini, ntoko silempw'aya wira: Siiso-tho hiyo nihaamini tivo-tho valavunl'ahu.

¹⁴Noosuwela wira ole aahihimunxe mookhwaani Apwiya, onoonihihimuxa-tho hiyo vamosa ni Yesu ni onoononiherya vamosa ni nyuwo.

¹⁵Okhala wira itthu sothene sinkhala mwaha w'ophentiwa wanyu, wira mahala yincerereye siiso atthu anci-ene amuxukhuruku Muluku wira attittimihiweke Muluku.

¹⁶Tivo vahinoocey'ahu, ohiya vo naari omutthu ahu w'ota wunttaka, siiso omutthu ahu wa muhina onnuluuliwa nihiku ti nihiku.

¹⁷Maana soonihaaxa sahu sooveya sinniniphwanyiha nttittimiho nuulupale, ovikana itthu sothene sinooneya,

¹⁸khannithokorerya itthu sinooneya nto ninthokorerya iye sihinooneya, okhala wira itthu sinooneya khasinlekela, nto itthu sihinooneya sinnikhala voohimala-tho.