2 Corinthians 5

¹Okhala wira noosuwela wira emp'ahu ya vathi va ya muxaxa yakurumuwa, nookhalana empa wa Muluku, yeeyo ehitekiwe ni matata a atthu enikhala voohimala-tho wirimu.

²Nave, ti vo nikhalaka mmuxaxani muumu ninniipulela niphavelaka owarihiwa emp'ahu iyo ya wirimu.

³Maana nawara ekuwo, khaninphwanyiwa nihiwanre etthu.

⁴Tthiri veekeekhayi hiyo ninkhala mmuxaxani-mu, ninniipulela niwereiwaka kahiyo wootthuna oruuhiwa erutthu ila nto voowarihiwa, wira erutthu enikhwa ewariheliwe ekumi.

⁵Nave yoowo onilikanyihenrye eyo ti Muluku mwaneene yowo-tho onivahale hiyo, neemexeryo na Erooho.

⁶Tivo ninkhalan'ahu wiilipiha mahiku othene, nisuwelaka wira nikhalaka mweerutthuni siisa ninkhala nihikhanle w'Apwiya,

⁷okhala wira nneetta mwele moowaamini kahiyo mwaha moowoona.

⁸Vano nookhalana nroromelo ni ninniphavela ohiya erutthu ila wira nakhaleke n'Apwiya.

⁹Tivo hiyo-tho vaniilipih'ahu, hata nikhalaka nnakhala nihikhalaka, wira nimusivelihe yoowo.

¹⁰Okhala wira othene ahu nihaana okhumelela wira niphukiwe ni Kristu, wira khula mutthu aakhele attharihelaka yooreera wala yootakhala yiiraly'awe okathi vaary'awe mweerutthuni.

¹¹Siiso kisuwelaka nttittimiho n'Apwiya ninnakupaliha atthu wira yaamini nave ninnisuweliwa saana ni Muluku nave kinniroromela wira nyuwo-tho n'ankhili anyu munoonisuwela.

¹²Khinimphavela wiikupaliha-tho wa nyuwo akina, ninnovahani nyuwo okathi woowittottopa mwaha wa hiyo, wira mukhalane moolumo oowaakhula ale aniittottopa muhina mwa makhalelo aya, ohiya ni mmurimani.

¹³Okhala wira naari alolo mwaha wa Muluku, nave naari a miruku mwaha wa nyuwo.

¹⁴Maana ophenta wa Kristu onninikhanyereriha, hiyo khusuwela wira: Mutthu mmosa ohaakhwela atthu othene, vano atthu othene ahookhwa mwa Yoowo.

¹⁵Nave Owo ohaakhwela atthu othene wira ale ari akumi ehiikhalele mmansaya, nto emukhaleleke ole aakhwenle ni khuhihimuwa.

¹⁶Vano hiyo, okhuma olelo mpakha ohoolo, khanimmusuwela-tho mutthu ntoko erutthu, nave vakhala wira khalayi naamusuwela Kristu ntoko mwa erutthu, vano khanimmusuwela-tho owo siiso.

¹⁷Vano-nto ole onikhala mwa Kristu onikhala mutthu musya, itthu sa khalayi soovira, sookhumelela itthu sa naanaano.

¹⁸Vano sothene sinikhuma wa Muluku, Yoowo onaataanin'he ni Yoowo, mwaha mwa Kristu ni khunivahererya muteko wowaataaniha,

¹⁹nisuwelaka wira Muluku aari mwa Kristu aataanihaka olumwenku ni yoowo ahaatthokoreryaka atthu ni itampi saya ni khunivahererya hiyo masu owaataaniha.

²⁰Tivo hiyo naanamitthaka mwa nsina na Kristu, ntoko Muluku ontumereryaka hiyo wira: Ninnoovekelani nyuwo mwa nsina na Kristu wira mwaataane ni Muluku.

²¹Yoowo ohisuwenle etampi, owo aahimukhaliha natampi mwaha wa hiyo, wira mwa Yoowo nikhalihiwe atthu a exariya ya Muluku.