2 Corinthians 6

¹Nave hiyo okhala wira ninvara muteko vamosa n'uwo, nave-tho ninnootumereryani nyuwo wira muhaakhelele mahala nttittimiho na Muluku,

²okhala wira owo onnihimya wira: Miyo koowiwani okathi woophwanela ni kihookhaliheryani nihiku n'owoopoliwa, vano ola t'ukhanle okathi woophwanelela, vano ola t'ukhanle okathi wo woopowa,

³khinimphavela omutthekiha mutthu mwaha w'etthu p'itthu, wira muteko ahu ohiveehiwe.

⁴Ohiya vo, hiyo ninnivahererya mwa sothene ntoko anamuteko a Muluku, nitepaka ovilela moohaawani, moothoiwani, moovela-velani,

⁵nivilelaka omaniwa, n'utthukiwa, mukhottoni, n'uvara miteko soowoma, n'uhirupa, n'utthukwa,

⁶ni wisuumaaliha n'usuwela, n'ulipiha murima, n'ureera murima, mwa Erooho Yooreera, moophentani wohootha,

⁷mwa masu a ekeekhayi, mwa owerya wa Muluku, niphavelaka owana ni wisaakiha n'ikapwitthi sa xariya,

⁸nttittimihiwaka hata nttottopeliwaka, niireliwaka ntoko anawoothe kinamwi kilavulaka ekeekhayi,

⁹niireliwaka oohisuwanyeya nto nisuweliwaka, naanyiheriwaka ntoko atthu ahanle okhwa nto hiyo ninnikhala, niikhalihiwaka ntoko oohukhummwa nto khaniiviwe.

¹⁰Ooriipiwa murima, nto mahiku othene ninnitteeliwa murima, niireliwaka amasikhini nto nathaacirihaka atthu anci-ene, niireliwaka oohikhalana etthu, nto nookhalana sothene.

¹¹Nywo aKorinto, eyano ahu ennitthukuwa nyuwo ni murim'ahu onnitaphuwa.

¹²Khamurina mukano wa hiyo nto soowiira s'anyu nyuwo tisoohenleni mukano.

¹³Vano vookaakhula enamuna emosa-ru (kinoolavulihani nyuwo ntoko an'aka) wira mukitaphulele-tho murim'anyu.

¹⁴Muhiitthukelele ekheero vamosa n'atthu oohaamini, maana opatthani xeeni onikhala eriyari ya exariya n'itampi? Wala waataana xeeni onikhala muthuko n'ipiphi?

¹⁵Wiiwanana xeeni onikhala eriyari ya Kristu ni mutakhali? Wala waataana xeeni onikhala muKristu ni mutthu oohaamini?

¹⁶Wiiraana xeeni onikhala eriyari y'empa ya Muluku n'amuluku a ethiru? Maana hiyo na empa ya Muluku a ekumi, ntoko Owo mwaneene sihimaly'awe wira: ?Kinookhala ni kinimweetta eriyari aya yaawo, kinookhala Muluku aya, nave awo anookhala atthu aka.?

¹⁷Ti vo mukhume eriyari aya, mmwalane ni yaawo, anihimya t'Apwiya, muhikwannye itthu sa mwiikho nave miyo kinoowakhelani,

¹⁸kinookhala Tiithi anyu, ni nyuwo wa miyo munookhala an'aka axilopwana ni an'aka axithiyana. Anihimya t'Apwiya oowerya sothene.