2 Corinthians 7

¹Axinn'aka oophentiwa, okhala wira ninniroromela waakhela sooreera iya, nrapihe sonanara sothene s'erutthu ni sa erooho, niphavelaxaka oreera wahu murima woomalela n'umuttittimiha Muluku.

²Munivahe nipuro mmurimani mw'anyu, khaavo a nyuwo omutthekenly'ahu, nave khaavo omunanarin'haahu ni khaavo onveehaly'ahu.

³Nkinlavula siiso wira nikhale akumi vamosa, wala nikhwaase vamosa.

⁴Miyo kinnoororomelani nyuwo vanci-ene ni kinniittottopa vanci-ene mwaha wa nyuwo. Moohaawani mothene kosareya ohakalala, kotepa otteliwa murima.

⁵Okhala wira vaphiyaly'ahu oMasetonia, khinaamumunle nnakhala vakhaani, ohiya vo, naahihaawa mwa sothene, owana-wana n'atthu akina ni woova wa mmurimani.

⁶Tthiri Muluku Yoowo onaalipiha atthu oowoceya tonikurununxe murima vaphiyaly'awe Tito,

⁷khaanikurununxe murima n'urwa wa Tito paahi, nave-tho mwaha wa mulipiheryo ovahiw'awe ni nyuwo, onihimeeryaka ihaali sanyu, ni wunla wanyu, n'ukhoomalela wanyu mwaha wa miyo, siiso muhincererya otteeliwa waka murima.

⁸Vaakhanle wira kaahooripihani murima mwaha w'epaphelo yoolepenly'akani vano nkinrukunuwa murima kinamwi kaarukununwe murima koonaka wira epaphelo ele yahooripihani murima okathi vakhaani,

⁹vano kinnitteeliwa murima, kahiyo mwaha wo woripihani murima, nto okhala wira oriipiwa wanyu murima ohoorukunuxani murima, tthiri oriipiwa wanyu murima okhumme wa Muluku, wa epantte ahu khaniwiirin'heni etthu yootakhala.

¹⁰Okhala wira oriipiwa murima onikhuma wa Muluku onniphwanyiha orukunuxa murima oniruuha woopowa, nave khunimuruuhela mutthu osikula, nto oriipiwa murima onikhuma moolumwenkuni onniphwanyiha orukunuxa okhwa.

¹¹Mooneke itthu Muluku soruuhenly'aweni n'uriipiwa wanyu murima waakhumme wa Muluku, nyuwo mookhalela nthiti nuulupale ophuka mwaha owo, muhiisaakiha siiraly'anyu, moonanariwa ni sootakhala, moomoova Muluku, nave muhinkheliwa ni miyo, munnithokorerya, sothene iyo nyuwo muhooniherya wira khamurina mulattu.

¹²Vano naari koolepenleni epaphelo ele nkiinre mwaha w'ole otthenke, nnakhala mwaha w'ole otthekeliwe, kilepenle wira onithokorerya w'anyu wooneye eriyari anyu, ohoolo wa Muluku.

¹³Tivo, ninkhal'ahu oolipihiwa murima mwaha woonikurunuxa w'anyu murima, nave ninnitteeliwa murima vanci-ene mwaha wotteeliwa murima wa Tito, okhala wira munep'awe waahisivelihiwa ni nyuwo othene.

¹⁴Tthiri, miyo kaaittottopale-ene n'etthu wa Tito, mwaha wa nyuwo nkuuliwe muru, ohiya vo, sothene soohimeenry'ahuni n'ekeekhayi, nave-tho wiittottopa wahu ohoolo wa Tito ohooneya okhala w'ekeekhayi.

¹⁵Vano-tho ophenta wawe onnitepa wuncerereya vanci-ene wa nyuwo, uupuwelaka wiiwelela wanyu nyuwo othene, siisaale simwaakhenly'anyu ni nttittimiho ni woova.

¹⁶Kinnitteeliwa murima okhala wira kinniwerya woororomelani nyuwo mwa sothene.