2 Corinthians 8

¹Nave-tho axinn'aka nintthuna woosuwelihani mahala a Muluku yaavahaly'awe aKristu a ikerexa sa oMasetonia,

²okhala wira awo ahooniherya otteeliwa w'aya murima wuulupale eriyari ya mixankiho sinci-ene n'uhaawa, nave othoiwa waya wuulupale woosareya muhakhu n'uvaha w'aya.

³Maana miyo kinnakhalela onamoona wira yaahivaha ntoko saawery'aya ni hata ovikaniha saawery'aya ni murim'aya wothene,

⁴awo yaahinivekela vanci-ene mahala oowiiraka mpantta muteko wo wakhaliherya atthu ooreera murima.

⁵Nto awo yaahivara muteko woovikaniha vaaweherery'ahu, nave-tho yaahiivahererya w'Apwiya numala khwiivahererya wa hiyo, vootthuna wa Muluku,

⁶nave nihalaka omuruma Tito mwaha wookhala taapacenrye, siiso-tho amaliherye mutek'ola wa mahala eriyari anyu.

⁷Nto okhala wira nyuwo muhooniherya othaaciri wanyu mwa itthu sothene, hata moowaaminini, wa masu, n'usuwela, n'uthokorerya wothene, n'uniphenta wanyu siiso-tho mukhaleke mahala manci-ene.

⁸Kahiyo kinlavula siiso ntoko yooruma, nto kiniirela wira koonexexe oreera waya murima atthu akina n'uphenta w'anyu w'ekeekhayi,

⁹tthiri munnisuwela mahala a Apwiya Yesu Kristu, yoowo aarokhala-ru thaaciri, aahipaka mulipa oothoiwa mwaha wo woophentani nyuwo, wira mwaha woothoiwa wawe ookhaliheni athaaciri.

¹⁰Vano mwaha w'etthu ila, kinnoovahani muruku aka, tthiri nyuwo akina okhuma mmwaisana mpacenry'anyu kahiyo ovara paahi mutek'ola hata-tho otthuna, t'etthu enoophwanelani nyuwo.

¹¹Vano mphaveleke omaleliha muteko opacerihiwe, wira siisaale soonihenry'anyu wiivahererya wotthuna, siiso mmalelihe-tho nvahaka vanwery'anyu.

¹²Tthiri akhala mutthu onvaha ni murim'awe wothene, owo onnaakheleliwa ntoko sirin'awe nave voohikhala ntoko ele ehinwery'awe.

¹³Khivamphaveliwa wira nyuwo muhaleke nvela'velaka, mwaha wo wakhaliherya akhw'inyu, nto wira othene anyu mulikaneke.

¹⁴Vano okathi ula okhalana w'anyu onookhaliherya othoiwa w'aya awo, siiso nyuwo mwathoiwa awo animookhaliheryani nto siiso muntthuna olikanaka othene.

¹⁵Ntoko silempw'aya wira: Ole ohantte sinci-ene, khahalanne etthu, vano ole ohantte vakhaani, khiivo yaamuhaleenle.

¹⁶Kinnimuxukhuru Muluku, yoowo ohenle mmurimani mwa Tito othokorerya omosa-ru kirin'aka mwaha wa nyuwo,

¹⁷okhala wira owo oothuna yaanvekenly'ahu ni ohooniherya owuupuwelani vanci-ene, khuvenya vootthuna w'awe arowaka wa nyuwo.

¹⁸Nto vamosa ni yoowo nihooveleelihani munn'ihu mukina y'ole onttottopeliwa n'ikerexa sothene mwaha woolaleya w'awe Ehapari Yooreera.

¹⁹Ohiya vo, owo oothanliwa n'ikerexa wira onihooleke onikhaliheryaka mutek'ola wa mahala hiyo ninvar'ahu, wa nttittimiho n'Apwiya yaawo ni wira nooniherye otthuna w'ahu wooreera,

²⁰Siiso ninsyaka wira atthu akina ahinihimyane mwaha wa muhakh'ula munci-ene onaakheleliwa ni hiyo,

²¹tthiri etthu ennuukhula ti ovara muteko ahu oratta-ene, kahiyo vamaithoni v'Apwiya paahi, hata-tho va maithoni v'atthu.

²²Vamosa ni yaawo nihooveleelihani munn'ihu mukina omoonn'ahu imaara sinci-ene n'inamuna athokoreryaka oratta-ene mutek'ola, tthiri vano onnitepa othokorerya mwaha wo wokupalini nyuwo vanci-ene.

²³Vano Tito mpatthani aka ni onivaran'aka muteko wa nyuwo, nave axinn'ahu akina ti arummwa a ikerexa ni ti nttittimiho na Kristu.

²⁴Tthiri mooniherye ophenta w'anyu va maithoni va ikerexa sothene, ni wiittottopa w'aka mwaha wa nyuwo, vamaithoni v'atthu awo.