2 Corinthians 9

¹Vano, mwaha wa soowakhaliherya atthu ooreera murima khivamphaveleya woolepelani.

²Okhala wira kinnisuwela oratta-ene oreera w'anyu murima, miyo kiniittottopa mwaha wa nyuwo vamaithoni v'atthu a oMasetonia, kaahimeery'aka wira atthu a w'Akhaiya ahiilikaniha okhuma mmwaisana nave othokorerya w'anyu onnalipiherya atthu anci-ene.

³Vano kihoorumihelani axinn'ihu awo wira nttottopelo n'ahu mwaha wa nyuwo nihivaanyiwe mwaha w'etthu ila, wira siisaale saahimmy'aka wira mukhale oowiilikaniha,

⁴wira siiso atthu a oMasetonia yaarowa okhala etthu yoonuuliha muru wira nihiire hata nyuwo munrowa wuuliwa muru, mwaha wo wororomelani nno.

⁵Tivo kihuupuwela wira etthu yoophwanelela waruma axinna wira ehoole erowaka wa nyuwo, wira ethukumanyerye soovaha sanyu iyo sihimmy'anyu, soovaha iyo saphwanyiwa silikanne-ene, sinoothonyerya wira nvan'he ni murim'anyu wothene nave voohikhala n'ukwathuwa.

⁶Kinnihimya etthu ila wira: Ole onaala vakhaani nave-tho onoohepha vakhaani siiso, nave onaala vanci-ene nave-tho onoohepha vanci-ene siiso.

⁷Khula mutthu akhaliheryeke voottharihela ele eri vamurimani v'awe, kahiyo ni murima omuriipale-ene wala wohikhala mwaha w'othoiwa, okhala wira Muluku onimphenta ole onivaha murima omutteenle-ene.

⁸Muluku onniwerya wosarihani n'itthu sothene sa mahala, wira okathi p'ukathi mukhalaneke sothene sooreera.

⁹Siiso silempw'aya wira: ?Ohaakawela sooreera s'awe alipa oohaawa, exariy'awe enikhala ya mahiku othene.?

¹⁰Vano, yoowo onaavaha epyo ale anaala ni yoolya ale avoliwe, nave-tho onoophiyeriha ni onimwincererya eyaalelo anyu nave onimwincererya mihokorokho sa xariy'anyu,

¹¹muthaacirihiwaka nyuwo mwa sothene, wa mahala othene, siiso atthu anci-ene anoomuxukhuru Muluku mwaha wa soovaha nyuwo munaaveleelih'anyu muhina mwa hiyo.

¹²Okhala wira mutek'ola w'okhaliherya, kahiyo wira onimaliha othoiwa w'atthu ooreera murima paahi, onvareliwa-tho wira awo etepeke omuxukhuru Muluku,

¹³awo yoonaka oreera wanyu murima mwaha wa mutek'ola awo anrowa omuttottopela Muluku mwaha wo wiwelela wanyu ni weettela w'anyu Ehapari Yooreera ya Kristu ni mwaha wootaphuwa w'anyu murima weiwo munaakhaliheryan'anyu y'awo n'akina othene,

¹⁴awo animoovekelelani, animoophentani vanci-ene, n'uwerya wuulupale wa mahala a Muluku ari mwa nyuwo.

¹⁵Nimuxukhuruku Muluku mwaha wa soovaha s'awe sihinromoleya!