2 Corinthians 10

¹Miyo Paulo mmansaka, kinnoovekelani mwaha w'omaala n'ureera murima wa Kristu, miyo veekeekhayi kiniireliwa oowiiyeviha okathi kinikhal'aka eriyari anyu, nto kaahikhale eriyari anyu ki nawuumihe murima wa nyuwo.

²Ayo, miyo kinnoovekelani wira muhikikhanyererye okhala nawuumihe murima kaphiya wa nyuwo, koolikanana olipiha murim'aka n'ale akoothenrye ehimyaka wira mweettelo ahu w'omutthu paahi.

³Okhala wira kinamwi keettaka mweerutthuni nto khaninwanela mwaha w'omutthu.

⁴Maana ikapwitthi sahu sinwanan'ahu kahiyo s'erutthu, nto ikapwitthi sa owerya wa Muluku, wira nipwexakase ipa soolipexa hiyo nikhwelihaka soohimmwa soowootha.

⁵Ni wiisoona wothene oniwanana n'usuwela wa Muluku ni onitthukwa muupuwelo wothene w'atthu omwiiwelela Kristu,

⁶ni koolikanana wira kaahukhumu ale othene ahiniiwelela, vaava wiiwelela w'anyu oniir'aya omalelihiwe.

⁷Nweheke itthu muttharihelaka enamuna sinooney'aya. Akhala mutthu onikupali mmans'awe wira ori mwa Kristu, uupuwele-tho mmurimani mw'awe wira, siiso owo siry'awe a Kristu, nave-tho hiyo n'atthu a Kristu.

⁸Okhala wira, miyo katepa wiittittimiha mwaha wa owerya w'ahu weiwo Apwiya anivahaly'aya wira noolipihekeni nave ohiya wopwetexani, nkinrowa wuuliwa muru,

⁹wira kihaanyiheriwe owoopopihani muhina mwa ipaphelo.

¹⁰Tthiri vannihimmwa wira ipaphelo s'awe ti soolipa ni ti soowali, nto okhala wawe ni hiyo ti woohilipalipa ni elavulelo awe khenloka.

¹¹Ole onihimya siiso uupuwela ela, wira khasinvirikana itthu sinlep'aka mpapheloni, kikhalaka ottai-wene, n'iye sintthun'aka wira, kikhalaka ni nyuwo.

¹²Okhala wira khanintthuna wiilikanyiha wala wiisaanyiherya okhala ntoko ale aniilaleya mmans'aya, maana anniiphima axineene ni mphimelo aya anniilikanyiha mmans'aya n'ulolo aya.

¹³Tthiri hiyo khanniittittimiha mmans'ihu ovikaniha mweeryo, nto ninnittittimiha mukano wo wettiherya yoowo Muluku othanly'awe, nave yoowo oniphiya wa nyuwo.

¹⁴Okhala wira khantumphe mikano s'ahu, nto hiyo naahikhala araaci ophiya wa nyuwo, tthiri vano noophiya wa nyuwo-tho vamosa n'Ehapari Yooreera ya Kristu,

¹⁵khanniittottopa woovikaniha mweeryo wa miteko s'ahu sivariwe n'atthu akina, nave ninniroromela wira waamini w'anyu waancerereyaka nnootepa wuunnuuwihiwa eriyari anyu muhina mwa mukano wo wettiherya,

¹⁶wira naalaleerye Ehapari Yooreera atthu a ilapo sikina, nihitthunaka wiittottopa muhina mwa miteko sivariwe mmukanoni mw'atthu akina.

¹⁷Tthiri, ole oniittottopa, aittottopeke mwa'Apwiya.

¹⁸Okhala wira khonttottopeliwa mutthu oniittottopa mmansawe, nto onttottopeliwa t'ule onttottopeliwa n'Apwiya.