2 Corinthians 11

¹Miyo waanikisivela wira mukivilele vakhaani n'uhilipa lipa waka iwo. Tthiri nlelo mukivilele.

²Maana kinniwunlelani ehace ntoko siniwunlelaweni Muluku, okhala wira kihootthokihani wira koovahereryeni wa mulopwana mmosa paahi, ori Kristu, ntoko mwali ooreera murima.

³Nto miyo kinnoova wira ntoko enowa saamootonthy'aya Haawa n'ulavi-lavi'aya, siiso-tho ankhili anyu akhale oohapuxiwa, wira muhiye omaala ni oreera murima woomalela ori mwa Kristu.

⁴Nto, veekeekhayi arwa mutthu wolaleeryani Yesu mukina ohikhanle ole oolaleenry'ahuni, wala mwaakupaliki Munepa mukina, ohikhanle ole waakhenly'anyu, wala Ehapari Yooreera ekina envirikana n'ile yaakhenly'anyu y'eyo munnikupali oratta-ene.

⁵Okhala wira miyo nkihiyo mukhaani w'arummw'awo.

⁶Nto, hata miyo kihilavulaka oratta-ene nto nkikhanle siiso moosuwelani, nave mwa sothene, nihoosuwelihani itthu iya wa inamuna sothene.

⁷Miyo, yookhala etthu etthekaly'aka, mwaha wookhala kiiyevihaka, wira nyuwo mukhale oowunnuwihiwa, okhala wira nkoovekenleni etthu koolaleeryakani Ehapari ya Muluku?

⁸Miyo kihaakha ikerexa sikina, kiliviwaka wira kiwerye woorumeelani,

⁹nave waary'aka ni nyuwo kaathoiwaka, nkaanvela-velihale mutthu tthiri okathi yaaruiy'aya axinna yaakhuma oMasetonia yaahikiphwanyiha saakihaleeliha. Nave miyo kahiipasoopa ni kinaamwiipasoopa mwa sothene wira kihoovela-veliheni mw'etthu p'itthu.

¹⁰Ekeekhayi ya Kristu eri mwa miyo, ti vo nttittimiho nla khaavo onrowa okihiiha mulaponi mwa oKresia.

¹¹Kihimenryeni siiso? Mwaha w'ohoophentani? Muluku onnisuwela.

¹²Nto y'eyo eniir'aka nlelo kinrowa wiir'aka wira kikumihe-vo mwaha w'ale amphavela wiittittimiha ehimyaka wira anlikana ni hiyo.

¹³Okhala wira awo kahiyo arummwa a ekeekhayi, awo anamuteko oowootha anniitatuxa wira yooneyeke ntoko arummwa a Kristu.

¹⁴Eyo kahiyo etthu yotikiniha, okhala wira hata Satana onniitatuxa akhalaka munkelo a omwaleela.

¹⁵Tthiri khiivo yootepa, arumw'awe yaaitatuxaka enakhala arummwa a xariya nto emalelo aya enrowa otthariheliwa miteko s'aya.

¹⁶Kinnoohimeeryani-tho wira ahikhale onkuupuwela okhala mulolo, nto muupuwela-ru siiso mukaakele ntoko mulolo wira kitteeliwe murima vakhaani.

¹⁷Sinihimy'aka kahiyo kinihimya ntoko muupuwelo w'Apwiya nto kinlavula ntoko mulolo. Kiroromelaka wiivuwiha weiwo.

¹⁸Tthiri atthu anci-ene annittittimiha mwaha wa itthu s'erutthu, ni miyo-tho kinrowa wiittittimiha.

¹⁹Okhala wira nyuwo murookhala-ru atthu a akhili, munnavilela oratta-ene atthu oohikhana akhili.

²⁰Munnaavilela ale anoorumani ntoko ipottha, ale aniwootothani, ale aniwaakhani sawinyu, ale aniittottopa, ale anoomanani owiitho.

²¹Miyo kinnuuliwa muru ohimya itthu iya, seiyo sinthoonyerya ohilipa waka. Nto w'ile mukina enuumih'awe murima, (kinlavula voohikhalana akhili), ni miyo-tho kookhalana wuumiha murima.

²²Ale a Heperi? Ni miyo-tho ki muHeperi. Ti osuulu w'Aparahaamu? Ni miyo-tho ki osuulu wa Aparahaamu.

²³T'arumeyi a Kristu? (Kinlavula ntoko mulolo). Miyo kootepa, ovara miteko, kootepa-tho otthukweliwa vanci-ene, kootepa omaniwa voohaalikeleya, imaara sinci-ene koovira moowoopiha kinahala okhwa.

²⁴Ayuta yaahikimana imaara thanu, khula emaara ekimanaka imaara miloko mixexe, evukulaka emosa,

²⁵kaahiwaxuliwa n'ikopo imaara tthaaru, kaahivonyakasiwa maluku ekwaha emosa, kaahipittuwa n'ekalawa imaara tthaaru, kaahikhala muhina mw'ephareya nihiku nimosa othana n'uhiyu,

²⁶kaaheetta mwentto imaara sinci-ene, kiphwanyaka soowoopiha sinci-ene sa mmuro, kaaphwanyaka alavilavi anci-ene oowoopiha, atthu oowoopiha a elapo aka, kaaphwanyaka amalapo oowoopiha kiphwanyaka soowoopiha sa mmuttettheni, soowoopiha sa moothakoni, soowoopiha sa mphareya, soowoopiha saarwa w'axinna oowootha,

²⁷kaahivara miteko soolipa ni sooveliha, kaahiviriha ohiyu imaara sinci-ene kihirupaka, kaahivoliwa etala ni ntthona, kahitthukiwa imaara sinci-ene, kaahiriipiwa murima imaara sinci-ene n'uhiwar'etthu.

²⁸Ohiyo itthu ikina yookhala etthu enikilemela mahiku othene, othokorerya ikerexa sothene.

²⁹T'ani ontteettheya, miyo-tho khuhitteettheya? T'ani onttheka miyo kihixanka vanci-ene?

³⁰Kaaphwanelaka wiittottopa, kinimwiittottopela mwaha woohilipalipa waka.

³¹Muluku, Tiithi awe Pwiya Yesu, Yoowo onttottopeliwa mahiku othene, onnisuwela wira nkinootha.

³²Vaaryaka oTamasiko, mukhulupale a mwene Areta aahaathata makwarta vamikhora s'omuttettheni, wira ekivare,

³³nto kaahiheliwa muttankani yuulupale kivirihiwa vaxanelani vaxiri ya muttetthe kikuruxeliwa vathi vano kaahoopowa mmatatani mwa mwene.