2 Corinthians 12

¹Vaarerelaka wiivuwiha, vanamwi vahilokaka, kinrowa ohimya sooniheriw'aka ni suupululeliw'aka s'Apwiya.

²Kinnimusuwela mutthu mmosa mwa Kristu, sivinre iyaakha muloko ni xexe awelihiw'awe mpakha erimu ya neeraru (vakhala wira aawelihiwe n'irutthu awe wala ahikhalanne erutthu, nkinsuwela Muluku tonsuwela)

³nave kinnisuwela wira mutth'uwo (akhale n'irutthu awe wala ahikhalanne erutthu, nkinsuwela, Muluku tonsuwela)

⁴aahiwelihiwa oparayisu, nave aahiiwa moolumo ahin'himmwa, yaawo mutthu ohinwery'awe olavula.

⁵Miyo kintthuna wiittittimiha mwaha wa itthu seiyo nkintthuna wiivuwiha mmansaka, ohikhanle mwaha w'ohilipa waka.

⁶Tthiri miyo katthuna wiittittimiha nkinkhala mulolo, okhala wira kaamuhimya ekeekhayi, nto nkintthuna, wira ahikhale mutthu onuukhuwa vanci-enexa ni miyo ovikana itthu sinooneya mwa miyo wala iye sinihimmwa sa miyo.

⁷Vano wira kihiikuxererye mwaha wa itthu suulupale sooniheriw'aka, kooheliwa mwiiwa mw'erutthuni, namuhupi a Satana, wira akimaaneke, wira kihiisoone.

⁸Mwaha yoowo, miyo kaahaavekela Apwiya imaara tthaaru wira ekumihe-vo wa miyo.

⁹Vano, awo yaahikihimeerya wira: Mahal'aka annoophiyeryani, okhala wira owerya onnitepa okathi munikhal'anyu oohilipalipa. Tthiri kinnitthunexa wiittottopa vanci-ene mwaha woohilipalipa waka, wira owerya wa Kristu okhaleke mwa miyo.

¹⁰Siiso, kinnisiveliwa kaahilipalipeke kaathoiwaka, kaalupatthiwaka, kaavelavelaka, kaahaawaka sothene iya mwaha wa Kristu. Okhala wira kaakhalaka oohilipalipa nto vaavo kinnilipa.

¹¹Kinnikhala ntoko mulolo, akikhanyererin'he siiso ti nyuwo. Miyo kaaniphwanela ottottopeliwa ni nyuwo, okhala wira mwa sothene miyo nkihiyo mukhaani aya arummw'anyu awo kinamwi kihiphiyenrye etthu.

¹²Tthiri miteko sinkupaliha wira ka murummwa sookumiheriwa va maithoni v'anyu ni nthiti naka nothene, muhina mwa ithoonyeryo ni miiriirya n'itthu soowerya sootikiniha.

¹³Nto, etthu xeeni mwiireliw'anyu muyevihiwaka ovikana ikerexa ikina, waahikhale-ru mwaha yoole miyo w'ohiwuukhulani? Mukilevelele yoottheka ela.

¹⁴Naanaano va koolikanana orwa wooxekuryani ekwaha ya neeraru, nkinrwa owuukhulani, tthiri kahiyo kimphavela mihakhu s'anyu, nto kinootthunani nyuwo. Anamwane kahiyo tanaathukumanyerya mihakhu atiithy'aya ni amam'aya nto atiith'aya ni amam'aya tanaathukumanyerya mihakhu an'aya.

¹⁵Miyo n'utthuna waka kinrowa wiileva nto nlelo kinimwiileva voomalela mwaha wa erooho anyu. Vano koophentani vanci-ene, nyuwo muntthuna okiphentaka vakhaani.

¹⁶Tthiri vakhala-ru siiso, wira miyo nkaawuukhunleni nto n'ulavi-lavi aka kihoovarani n'ulolo.

¹⁷Khino kihoopuheryani mwaha mw'akina yaawo yaarummy'aka orowa wa nyuwo?

¹⁸Kaahinvekela Tito nave kaahoorumihelani vamosa ni yoowo munn'ihu mukina, vano Tito t'opuhenryeni? Nto owo ni miyo khaneettela erooho emosaru? Khanneetta ephiro emosa-ru?

¹⁹Aakhala atthu anci-ene a nyuwo anuupuwela wira hiyo ninniisaakiha ohoolo w'anyu. Ninlavula mwa Kristu vamaithoni va Muluku, nave nihiira sothene wira mulipihiwe.

²⁰Tthiri, kinoova wira karowa wa nyuwo, nkinrowa woophwanyani ni mweettelo ontthun'aka ni nyuwo-tho khamunrowa okiphwanya ni mukhalelo ontthun'anyu, ni kinnoova ophwanya mwa nyuwo ohiiwanana, nrima, owana-wana, onyokhana, wootheryana, waapanana, wiisoona n'unyakulihana.

²¹Kinnoova wira kitthikelaka wa nyuwo Muluku aka akiyevihe vamaithoni v'anyu, nave kinnoova orowa wunla mwaha w'atthu anci-ene yaawo yaatthenke nave khuhittharuwa soonanara s'aya, sooraruwa ni sootakhala saya siir'aya.