2 Corinthians 13

¹Ela ekwaha ya neeraru enrowaka okumana ni nyuwo. Mulattu wothene ophukiweke ohoolo w'atthu anli wala araru.

²Kahaahimeerya ekwaha yaarw'aka nave kinnitthikela-tho waahimeerya ekwaha ya neenli, vano kinaahimeerya kihikhanle ni yaawo, kinaahimeerya ale yaatthenke n'atthu akina othene wira kahokolowela-tho nkinaalevelela,

³nyuwo mumphavela osuwelaxa aari Kristu onlavula mwa miyo, Owo kahiyo oohilipa mwaha wa nyuwo, ohiya vo Owo t'owerya mwa nyuwo.

⁴Maana veekeekhayi okhomeliwe vamwiikimanyo n'uhilipa w'awe, nto vano okhala mukumi mwa owerya wa Muluku. Okhala wira hiyo-tho n'atthu oohilipa mwa yoowo, nave ninnikhala mwa yoowo wa nyuwo moowerya wa Muluku.

⁵Mwiikohe nyuwo mmansinyu vakhala wira veekeekhayi muri moowaminini, mwiiwehe nyuwo mmansinyu. Wala munnisuwela wira Yesu Kristu ori mwa nyuwo? Vaahikhale siiso, vano nyuwo muri ookhoottiwa.

⁶Nto kinniroromela wira munnisuwela wira khanikhoottiwe.

⁷Hiyo ninninvekela Muluku wira nyuwo muhiir'etthu yootakhala, kahiyo hiyo nimphavela wooneya oohikhoottiwa nto nimphavela wira nyuwo mwiireke sooreera, hata nikhalaka atthu ookhoottiwa.

⁸Okhala wira hiyo khaninwerya ovirikanya ekeekhayi vahikhanle ovarela muteko ekeekhay'iyo.

⁹Maana hiyo ninnitteeliwa murima okathi hiyo ninkhal'ahu oohilipa, nave nyuwo munikhal'anyu oolipa, t'iy'eyo ninvekelel'ahu, wira mutepeke oreera murima.

¹⁰Tivo, kinnoolepelani itthu iya, kihikhalaka ni nyuwo wira kakhala wa nyuwo, kihoottaruxeni n'uwali kittharihelaka owerya kivahiw'aka n'Apwiya wira koolipiheni, nave nkivaheriwe woomwarya'mwaryani.

¹¹Vano, w'axinna akina, koorowa-vo! Mutepeke oreerelana murima, mulipihaneke murima, mwiiwananeke, mukhaleke ni murettele, nave Muluku mwaneene ophenta ni murettele onookhala ni nyuwo.

¹²Mukhomasaneke mukina ni mukhw'awe n'epeeco yooreera. Atthu othene ooreera murima annookhomasani

¹³Mahala a Apwiya Yesu Kristu, n'uphenta wa Muluku ni Waataana ni Erooho Yooreera okhale ni nyuwo othene.