Galatians 1

¹Kinoolepelani ti miyo, Paulo murummwa, nkiihaniwe n'atthu wala mwaha w'atthu, masi kiihaniwe ni Yesu Kristu ni Muluku Tiithi, omuhihimunxe Yes'uwo mookhwaani.

²Kinniveleeliha makhomaso aka Ikerexa s'oKalasiya. N'axinna othene arin'aka nno nave annookhomasani.

³Muluku Tiith'ihu, ni Yesu Kristu, Pwiy'ahu, oovaheeni murettele ni oreeriwa.

⁴Yesu Kristu ohiivahererya wiiviwa mwaha wa itampi s'ahu, wira anoopole moolumwenkuni'mu mootakhala munikhal'ahu wira siiso niiwelele saana sintthun'awe Muluku, Tiith'ihu.

⁵Yoowo onimphentel'ahu ovahiwa nttittimiho na mahiku othene! Amen!

⁶Vookitikiniha vanci-ene okhala wira naanaano-ru nyuwo moomuhiya ole aawiitthanneni n'uphenta wa Yesu Kristu nto munatthara ihapari sikina soovirikana.

⁷Kahiyo wira erookhala ?Ehapari Yooreera? ekina, nave ekeekhayi okhala wira akhala atthu akina anooxankihani ephavelaka opahula Ehapari Yooreera ya Kristu.

⁸Atakhaliweke mutthu-ene yoowo onrowa woolaleeryani Ehapari yoovirikana n'ile miyo mmasaka yoolaleery'akani. Hata kaari miyo mmansaka nnakhala munkelo a wirimu!

⁹Kinootthikela emanly'aka ohimya: Akhala onrowa woolaleeryani Ehapari Yooreera enivirikana n'ile yoolaleenry'akani mutthu owo atakhaliweke!

¹⁰Munoona wira kimphavela ottottopeliwa n'atthu ovikana ottottopeliwa ni Muluku? Munoona wira kimphavela waasiveliha atthu? Kaaphavenle siiso, nkaarowa okhala murumeyi a ekeekhayi a Yesu Kristu.

¹¹Axinn'aka, musuwele wira ?Ehapari Yooreera? yoolaleenry'akani khekhumme mmirimani mw'atthu.

¹²Nkaakhelenle hata nkixuttihiwe ni mutthu mukina, Yesu Kristu tokisuwelin'he.

¹³Veekeekayi nyuwo muhiiwa mweettelo aka wa khalayi okathi kiir'aka keettelaka ikano s'aYuta. Moosuwela wira miyo kaanilupattha n'ikuru s'aka sothene Ekerexa ya Muluku, kiphavelaka opwetexa.

¹⁴Kaanirowa ohoolo waavikana anci-ene akina aYuta a eyinnuwelo aka mmeettiheroni n'ulipiherya w'etiini y'aYuta ni meettelo amakhulupaly'aka akhalayi.

¹⁵Nto Muluku, muhina woophenta w'awe ookithanla miyo kihinatthi oyariwa nto khukiitthana wira kikhale murumey'awe. Nave Muluku aatthunne siiso,

¹⁶ookisuweliha Mwan'awe wira miyo kaalaleerye Ehapari Yooreera ale ahikhanle aYuta. Nkaaronnwe onvekela miruku mutthu mukina,

¹⁷hata nkaahokolowenle oYerusalemu wira kakumane n'ale yaari arummwa miyo kihinatthi. Nto kaahivenya kirowaka elapo ya w'Arapia, numala kaahihokolowela oTamasiku;

¹⁸nuuvira iyaakha tthaaru, isumana piili vamosa n'uwo.

¹⁹Nto nkaamoonne murummwa mukina, ahikhanle Yakopo, munn'aya Apwiya.

²⁰Enoolepel'akani ekeekhayi. Muluku onnisuwela wira nkinootha.

²¹Numala kaahirowa elapo y'oSiiriya ni y'oSiliisiya.

²²Muloko w'aKristu waari oYuteya khiyaakisuwelaxa.

²³Yamwiiwa vahimmwaka wira: ?Ole aanilupattha khalayi, vano onnilaleya waamini weiwo opacerya wene aaphavel'awe opwetexa.?

²⁴Nto yaaninvuwiha Muluku mwaha wa miyo.