John 1

¹Wopaceryani naari Nsu, Nsu nlo naari ni Muluku nave Nsu nlo naari Muluku.

²Wopaceryani, Nsu naari ni Muluku.

³Ni Nsu nenlo, Muluku t'opattuxannyawe itthu sothene: Voohikhala nenlo, khiivo epattuxiwe, yipattunxe.

⁴Nsu naari ephattuwelo y'ekumi ni ekum'ila ehaaruuhela muthuko atthu.

⁵Muthuk'owo onnimwaleela mweepiphini vano epiph'iyo khuhaakhelela.

⁶Aahikhala mulopwana mmosa aarummwe ni Muluku, nsina n'awe Yohani.

⁷Owo aarweenle okhalela onamoona muthuk'owo wira atthu othene yiiraka onamoona awe yaamini.

⁸Yohani uwo kahiyo aari muthuko owo aarweenle okhalela onamoona muthuk'owo.

⁹Nsu nlo, Muthuko w'ekeekhayi, muthuko yoowo orwiiye moolumwenkuni, khwaamwaleela atthu othene.

¹⁰Nsu naari moolumwenkuni: Ni Nsu nenlo, Muluku t'opattuxannyawe olumwenku. Vano atthu a moolumwenkuni-mu khiyaasuwenle Nsu.

¹¹Nsu narwenle awaya: Vano atthu aya annikhootta waakhelela.

¹²Nto, othene ale yaakhenle, yaale anamini nsina naya, Nsu naahaavaha owerya w'okhala aana a Muluku.

¹³Awo khayariwe ni mutthu, nnakhala otthuna wa w'erutthu, hata otthuna wa mutthu: Ayariwe ni Muluku.

¹⁴Vano, Nsu nihiipaka erutthu, khukhala ni hiyo, nisareiye-ene mahala ni ekeekhayi, nave hiyo nihoona nttittimiho naya, siisaale nttittimiho na Mwaana mmosa-ene a Atiithi.

¹⁵Yohani aahimukhalela onamoona yoowo, ahimyaka wira: Ola ti y'ole miyo aamuhimmy'aka wira: Ottuli waka onimoorwa yoowo ori oopacerya, okhala wira miyo kihinatthi okhala owo iira okhanle-ene.

¹⁶Okhala wira othene ahu ninnaakhela sooreera s'awe voomalela ni mahala mahal'ene.

¹⁷Maana ikano sivahiwe mwa Monse, nto mahala ni ekeekhayi sirwiye mwa Yesu Kristu.

¹⁸Khaavo otonko omoona Muluku. Mwaana mmosa-ene, ori mw'Atiithi, t'omusuwelin'he yoowo.

¹⁹Ola onamoona wa Yohani okathi makhulupale a aYuta vaarummy'aya alipa a mukuttho n'aLevi akina orowa omukoha Yohani wira aari ti pani?

²⁰Nto Yohani aahihimya oratta-ene wira: Miyo nkihiyo Kristu.

²¹Vano yaahimukoha-tho wira: Nto mwa pani? Nyuwo mwa Eliya? Owo aahaakhula wira: Nkihiyo. Nyuwo mwa Profeta? Owo aahaakhula wira: Nnaari.

²²Vano atthu awo yaahimwiirela wira: ?Nanso, nyuwo mwa pani? Naahimeerye exeeni ale anirumme? Nyuwo mmansinyu muniisirela pani?

²³Yohani khwiira: Miyo ka nsu nawe ole onikhuwela moothakoni, iiraka: ?Mookolele ephiro y'Apwiya.? Ntoko sihimaly'awe profeta Yesaya.

²⁴Nave awo yaarummwe yaari a w'afarisi.

²⁵Awo yaahitthikela omukoha yiiraka: Nanso, munapatiserya-ni atthu, muhikhanle Kristu, wala Eliya, nnakhala profeta?

²⁶Yohani aahiwakhula, iiraka: Miyo kimpatisa ni maasi: Vano eriyari anyu ookhala-vo yoowo ohinimusuwelanyu.

²⁷Owo onrwa ottuli waka. Nto miyo nkimphwanela hata otaphula mikhoyi sa iisantaalya sawe.

²⁸Itthu iya siireiye oPetaniya, okhopela wa muro Yortani, weiwo Yohani apatisawe-wo

²⁹Mmeloni mwaya, Yohani aahimoona Yesu arwaaka okumana ni yoowo, khwahimeerya atthu wira: Mmoone, ola Mwaapwittipwitthi a Muluku, onttipiha itampi s'atthu.

³⁰Ola ti y'ole miyo aamuhimy'aka wira ottuli waka onimoorwa yoowo ori oopacerya, okhala wira miyo kihinatthi okhala owo iira okhanle-ene.

³¹Miyo nkaamusuwela nto wira owo osuweliwe n'atthu a Isarayeli ti vo miyo vampatis'aka ni maasi.

³²Yohani aahimukhalela Yesu onamoona, iiraka: Miyo kihoona Erooho ya Muluku okhuruwaka wirimu ntoko epompa, khweemela vasulu vawe.

³³Vano miyo nkamusuwela, nto ole okirumme opatisa ni maasi t'ukileenle wira: Ole onrow'anyu omoona Erooho emukhuruwelaka ti yoowo onipatisa ni Erooho Yooreera.

³⁴Tthiri miyo v'ekeekhayi kihoona, tivo, vanlaley'aka wira: ?Owo Mwaana a Muluku.?

³⁵Mmeeloni mwaya Yohani aari-tho n'awiixutti awe anli,

³⁶Vaamoonaly'awe Yesu aviraka aahiira: ?Mmoone, ola mwapwittipwitthi a Muluku.?

³⁷Awiixutti awo anli, vaiwalyaya moolumo ala, yaahimutthara Yesu.

³⁸Yesu, arukunuwaka, aahiwoona emuttharaka, khwaakoha wira: Mumphavela-ni? Awo yaahaakhula, wira: Rabbi, munkhala vai?

³⁹Yesu aahiwiirela: Murweke, moone. Awo yaahirowa, khoona nipuro nakhalawe, khukhala ni yoowo nihiku nenlo, naari nsuwa nootthekuwa.

⁴⁰Owo aahipacerya omphwanya munn'awe Simoni, yoowo aamuhimeenry'awe wira: Noomphwanya Mesiya.

⁴¹Antere yoowo aapacenrye orowa omphwanya Simoni, munn'awe, khumuhimeerya wira: Nomphwanya Mesiya!

⁴²Vano Antere aahimurowana Simoni wa Yesu. Yesu aahinwehexexa, khumwiirela: Nyuwo mwa Simoni, mwaana a Yohani: Vano munrowa wihaniwaka Kefa.

⁴³Mmeeloni mwaya, Yesu aahuupuwela orowa oKalileya. Vano aahimphwanya Filipe, khumwiirela: ?Mukitthare.?

⁴⁴Filipe owo aari a oPetisaita, muttetthe w'Antere ni Petru.

⁴⁵Filipe aahimphwanya Nataneyeli, khumuhimeerya wira: ?Nomphwanya yoole Monse omuhimmyawe muliivuruni mwawe, yoowo-tho maprofeta amulaleiyaya. Ti Yesu, mwaana a Yosefe, a oNasareti.

⁴⁶Natanayeli aahihimya wira: ?ONasareti wookhala wokhumelela'wo etthu yooreera?? Filipe aahimwaakhula wira: Murwe, moone.

⁴⁷Yesu, vamoonalyaawe Natanayeli attamelaka, aahihimya sa yoowo wira: Ola va mwIsarayeli aekeekhayi: Mwa yoola khuuvo-vo wootha.

⁴⁸Natanayeli aahimukoha Yesu, iiraka: ?Mukisuwenle sayi?? Yesu aahimwaakhula wira: ?Miyo kaahiwoonani vale vaaryanyu mukhitte mwa mpheera?, Filipe ahinatthi owiihanani.

⁴⁹Vano Natanayeli aahimuhimeerya wira: ?Mwiixuttihi, nyuwo mwa Mwaana a Muluku! Nyuwo mwa Mwene a Isarayeli!?

⁵⁰Yesu aahimwaakhula, wira: ?Nyuwo munnaamini, maana kihohimeeryani wira: Miyo kahiwoonani vaaryanyu mukitte mwa mpheera?? Vano, munimoona-tho itthu suulupalexa ovikana iya.

⁵¹Yesu ahihimya-tho wira: Kinooleelani ekhweeli wira: Munimoona erimu ehuleiye-ene ni ankelo a Muluku ewelaka ni emukhuruwelaka Mwaana a Mutthu.