Luke 24

¹Ettiminku vasiisu-ene, athiyana yaahirowa omahiye, ekunxe-ene makhura oowunkhela yeetetenly'aya.

²Vano yaaphwannye nluku n'attiyelaniwe nikhuku nipirikixeliwe-ene ota.

³Yaahikela-mo khuhiphwanya-mo murutthu w'Apwiya Yesu.

⁴Awo yaahitikinihiwa n'uvelavela. Okathi-ene yoowo, alopwana anli yaaheemela vakhiviru vaya, ewanre-ene ikuwo soowaarya.

⁵Attiyana awo, yaahoova vanci-ene khuurama mpakha vathi, vano alopwana awo yahahimeerya wira: Omphavelani mutthu mukumi eriyari yaalipa-ookhwa?

⁶Khaamo-mu, owo oohihimuwa. Khamunuupuwela nlelo itthu soohimeenry'aweni akhalaka oKalileya,

⁷Nyuwo khamunuupuwela vahimyal'awe wira: ?Mwaana a Mutthu ohaana ovahereriwa mmatatani mwa atakhali ni wira ohaana okhomeliwa vamwikimanyo wira mmurottoni mwaya ahihimuwe.?

⁸Tthiri awo yaahuupuwela moolumo awo yaahimaly'awe Yesu.

⁹Yaahikhuma omahiye, khurowa wahimeerya itthu iye sothene arummwa ale muloko ni mmosa n'atthu akina othene.

¹⁰Athiyana awo aari: Maria Matalena, Yohana ni Maria ame awe Yakopo, nave-tho athiyana akina yaari ni yaawo, yanaleela arummwa itthu seiya.

¹¹Nave arummwa yaahoona moolumo aathiyana awo okhala oohisuwanyeya; tivo khiyaakupanli.

¹²Vano nto, Petru aahivenya khupacerya otthimaka arowaka omahiye, nuuphiya aahuurama, khuweha esanta-ru, numala aahihokolowela owaani atikinihiwe-ene n'itthu saakhumelenle.

¹³Nihiku-nene nenlo, awiixutti anli yaarowa muttetthe wiihaniwa Emawusi, woorakamelana n'oYerusalemu vakhiviiru ni ikilomo muloko ni piili.

¹⁴Arowasaka siisaale yaanivaanela mwaha wa itthu sothene saakhumelenle.

¹⁵Evaanelaka siiso, Yesu maneene aahiwaattamela, khuyarowa ni yaawo.

¹⁶Nto awo owiitho wahaariipa, khuhiyamusuwela.

¹⁷Vano Yesu aahaakoha iiraka: ?Exeeniyo enivaanel'anyu yenyuru mweettaka, ni xeeni munriipiw'anyu murima??

¹⁸Mmosa a yaawo nsina nawe Keleofa, aahimwaakhula iiraka: Nyuwo paahi muri muletto oYerusalemu vahinsuwel'anyu itthu siiraneiye mahiku ala?

¹⁹Vano owo aahikoha wira: Ekhumelenle exeeni? Awo yaahakhula wira: Itthu simukhumelenle Yesu muNasareti, yoowo aari profeta oowerya wa soowiira ni wa moolumo vamaithoni va Muluku ni ohoolo w'atthu othene.

²⁰Makhulupale ahu a anamukuttho ni makhulupale ahu aanvahererya wira alamuliwe wiiviwa ni khumukhomela vamwiikimanyo.

²¹Nave hiyo n'aroromela wira yoowo t'arowa oowoopola atthu a Isarayeli! Nto ohiya itthu iya sothene olelo va aavira mahiku mararu viiraneiy'aya itthu iya.

²²Ekeekhayi wira athiyana akina a mmulokoni mwahu aanitutuxa, okhala wira olelo vaasiisu-ene, awo yaahirowa omahiye;

²³Nave khuhiphwanya-wo murutthu awe. Numala, yaahirwa onihimeerya, wira ahaakhumelela ankelo, khwaahimeerya wira owo mukumi.

²⁴Akhw'ihu akina yaahirowa omahiye nave khuphwanya sothene ntoko athiyan'awo saahimaly'aya, nto Yesu khiyaamoonne.

²⁵Vano Yesu aahahimeerya wira: ?Nyuwo mw'atthu oohikhalana ankhili, ni atthu oopisa waamini sothene seiye maprofeta saahimyaly'aya!

²⁶Nto Kristu khaaphwanenle ohaawa iya sothene, wira akele munttittimihoni mwawe??

²⁷Vano aahataphulela itthu saamuhimya yoowo mwa Soolempwa sothene, okhuma iliivuru sa Monse n'iliivuru sa maprofeta othene.

²⁸Okathi vaaphiyaly'aya muttetthe waarow'aya, Yesu aahiikhaliha ntoko mutthu aarowa ottai-wene.

²⁹Nto awo yaahimukhanyereriha weemela emuhimeeryaka wira: ?Mukhale ni hiyo okhala wira nsuwa nihanle okela vahanle wiila. Yesu aahikela mpaani khukhala ni yaawo.?

³⁰Okathi vaakilanthy'awe, aahikuxa mukatthe, khureeriha, numala aahimeya khwaavaha.

³¹Okathi yoowo maitho aya yaahaatthukuwa khumusuwela Yesu, nave owo aahilakaseya.

³²Vano awo yaahihimeeryana yaaworu yiiraka: ?Khinoona murim'ahu oniviha vaanilavulih'awe mphironi anitaphulelaka soolempwa??

³³Naanaanoru, yaahivenya khuhokolowela oYerusalemu, yaahaaphwanya weiwo arummwa muloko ni mmosa ethukumanne-ene n'akhw'aya,

³⁴awo yaahahimeerya wira: ?V'ekeekhayi Apwiya aahihimuwa! Aamukhumelela Simoni!?

³⁵Vano, awo yaahiwaalikelela itthu saakhumelenle mphironi, n'inamuna yaamusuwenly'aya Yesu waakawan'aya mukatthe.

³⁶Elavulaka siisaale, Yesu mwaneene aahikhumelela variyari vaya khwaahimeerya wira: ?Murettele okhale ni nyuwo.?

³⁷Yaahitikinihiwa ni woova, okhala wira yuupuwela wira aari munepa.

³⁸Nto Yesu aahahimeerya wira: ?Exeeni eniwuukhulani, munuupuwel'anyu itthu seiyo mmurimani mwanyu?

³⁹Moone matat'aka n'inawu saka. Ti yomi-ene. Kivareeni ni mukiwehe, munepa khurina erutthu nnakhala makhuva ntoko sinoon'anyu sirin'aka.?

⁴⁰Ahimyaka siiso, aahiwooniha matata ni inawu sawe.

⁴¹Nto mwaha wotteeliwa waya murima, n'utikinihiwa waarin'aya khiyaawerya okupali! Tivo Yesu aahaakoha wira: ?Mookhalana va etthu enlyiwa?.?

⁴²Awo yaahimunnya nipattuxo n'ehoopa yowoxiwa, nnihepepe nimosa n'oravo.

⁴³Yesu aahikuxa khukhuura, awo emoonaka.

⁴⁴Yesu aahahimeerya wira: Muupuwele itthu soohimeenryaakani, kikhalaka ni nyuwo, saahaana wiiraneya sothene Silempwe sikihimyaka miyo, muliivuruni mwa ikano sa Monse, ni muliivuruni sa maprofeta ni sa masalmu.

⁴⁵Numala aahaatthukula ankhili aya wira esuweleke Soolempwa,

⁴⁶ni aahahimeerya wira: ?Ti siiso silempwaly'aya wira Kristu aahaana okhwa, ni wira mmurottoni mwaya ohihimuweke mookhwaani,

⁴⁷ni wira mwa nsina nawe, yaahaana olaleeriwa mwaha woorukunuxa murima n'uleveleliwa itampi atthu a maloko othene, okhuma oYerusalemu.

⁴⁸Nyuwo mwaanamoona a itthu iya.

⁴⁹Miyo ki mwaneene kinimoorumihelani ole Atiithi aamulaihenry'aya. Nyuwo muhaleke mmuttettheni m'oYerusalemu, mpakha waakhela owerya ontthuna w'okhuruwelani okhumaka wirimu.?

⁵⁰Numala Yesu aahaarowana awiixutti awe ota wa muttetthe, mpakha okherekhere w'oPetaniya. Weiwo aahivenxa matata khwaareeriha.

⁵¹Aareerihaka siisaale, aanaahiya khuyawelihiwa wirimu.

⁵²Awo yaahimukokhorela, khuhokolowela oYerusalemu asareiye-ene otteeliwa murima,

⁵³okathi wothene yaakhala mpaani mwa Muluku emuttottopelaka yoowo.