Luke 23

¹Atthu othene yaahivenya khumuroiha Yesu wa Pilato.

²Nto yaahipacerya omootherya yiiraka: Nimphwannye mulopwana ola aahapuxaka atthu ahu, ahimyaka wira ehiliveke mposito wa mwene Kesari, nave-tho isiiraka ti Kristu-Mwene.

³Pilato aahimukoha Yesu wira: ?Nyuwo mwa mwene a aYuta?? Yesu aahimwaakhula iiraka: ?Nyuwo munnihimya.?

⁴Nto Pilato aahahimeerya makhulupale a anamukuttho n'atthu othene wira: ?Nkiniphwanya mulattu womuhukhumu mulopwana ola.?

⁵Nto awo yaahithipelela imaara sinci-ene yiiraka: Musuwele wira owo onnaahapuxa atthu owixuttihaka mulaponi mothene, okhuma oKalileya mpakha nno.

⁶Okathi Pilato vaaiwaly'awe siiso, aahikoha wira: Mulopwana ola muKalileya?

⁷Vaasuwelihiw'awe wira Yesu aakhumme elapo yaalamuleliwa ni Heroti, ahiruma oveleeliwa wa Heroti yoowo aari oYerusalemu okathi-ene yoowo.

⁸Heroti amoonakaru Yesu aahitteeliwa murima vanci-ene okhala wira okhuma khalayi aaniphavela omusuwela, maana aaniiwa silavuliwaka sa Yoowo. Aaniroromela wira Yesu aampaka mutikiniho nnakhala mmosa.

⁹Aahimukoha itthu sinci-ene amuthipelelaka, nto Yesu khaamwaakhunle etthu.

¹⁰Makhulupale a anamukuttho n'awiixuttihi a ikano sa Monse yaanithipelela omootherya Yesu n'ikuru.

¹¹Nto Heroti vamosa n'anakhotto awe yaahimunyohola ni yaaninveeha. Aahinwariha nlaya nowaarya, khuruma orowaniwa wa Pilato.

¹²Nihiku nenlo Heroti ni Pilato yaahipatthanasa, okhala wira ehinatthi okhumelela eyo, awo yaaniwana.

¹³Nto Pilato aahaathukumanya makhulupale a anamukuttho, ni makhulupale, n'atthu othene khwaahimeerya wira:

¹⁴?Mukiruuhenle mulopwan'ola mukihimeeryaka wira onaahapuxa atthu. Nto koomukohexexa ohoolo wanyu, nto nkimphwanyanne mulattu woomulamula mwaha wa itthu sinimuhimyan'anyu.

¹⁵Nnakhala Heroti khaamphwanyanne mulattu, tthiri oomuhokoloxerya-tho wa miyo. Musuwele wira owo khatthenke etthu yoophwanelela wiiviwa.

¹⁶Tivo kinoomuhukhumu, numala kimutaphule.?

¹⁷Okathi wootthapeleliwa niira na Paasikha Pilato aahilimaleliha watthukulela mutthu mmosa ootthukweliwa.

¹⁸Nto atthu othene yaahipacerya okhuwela vamosaru yiiraka: ?Mmwiive Yesu! Muntthukulele Parapa!?

¹⁹Parapa owo aatthukweliwe mwaha w'ekhotto yaakhumelenle mmuttettheni ni mwaha womwiva mutthu.

²⁰Vano Pilato, aphavelaka omutaphula Yesu, aahilavula-tho n'atthu.

²¹Nto muttitthi uwo waanithipelela okhuwela wiraka: ?Mmukhomele! Mmukhomele!?

²²Pilato aahaakoha-tho ekwaha yaneeraru ahimyaka wira: Nto otthenkeni yoola? Miyo nkimphwanyanne mulattu wophwanela okhwa. Tivo kinoomuhukhumu, numala kimutaphuleke.

²³Nto awo yaahithipelela okhuwela evekelaka wira akhomeliwe, onyakula waya waanivira otepaka

²⁴Vano Pilato aahiira wi yiireyeke ele yaavekel'aya:

²⁵Aahaatthukulela mulopwana aatthukweliwe mwaha w'ekhotto ni wiiva ntoko saanvekel'aya, khwaavahererya Yesu wira emwiirihe yaatthun'aya.

²⁶Emuroihaka Yesu yaahinvara mulopwana mmosa a oKirene iihaniwa Simoni, aakhuma omatta, khumukapattiha mwikimanyo, wira amutthariheke Yesu.

²⁷Muttitthi muulupale w'atthu waanimutthara Yesu, nave-tho athiyana akina anci-ene yaanimukhupanyerya, emunlelaka.

²⁸Yesu aahirukunuwa aawehaka, khwaahimeerya wira: Nyuwo athiyana a oYerusalemu, muhikinleleke miyo, mwiisinleleke mmansinyu ni mwanleleke an'inyu.

²⁹Onimoorwa okathi vantthunaya ohimmwa wira: ?Ooreeriwa athiyana ahiniyara n'ale ehinayare n'ale ehinamwaamwihe mwaana!?

³⁰Okathi uwo atthu animwiirela myaako wira: Munimorele hiyo! Ni mattumuxa wira: ?Munikhuneele!?

³¹Tthiri vaniira mwiri mukithi oniirihiwa siisa ankhi mwiri w'owuuma onrowa wiirihiwa exeeni?

³²Nave-tho yaahaarowana alavilavi anli wira yaiviwe vamosa ni Yesu.

³³Vaaphiyaly'aya nipuro niihaniwa Kalvario yaahimukhomela Yesu vamwiikimanyo, yaahaakhomela. Nave alavilavi awo, mmosa moono woolopwana mukina moono woothiyana.

³⁴Yesu aahihimya wira: ?Tiithi mwaalevelele okhala wira khansuwela siniir'aya!?

³⁵Muttitthi w'atthu waaniwehexexa itthu iyo sothene, okathi yoowo makhulupale a aYuta yaanimutheya ehimyaka wira: ?Ola oowoopola atthu akina, aisoopole mwaneene, aari Kristu othanliwe ni Muluku!?

³⁶Nave-tho anakhotto yaaninveeha yoowo, emwaattamelaka yaaninvaha eviinyu yoonyuunya

³⁷nave yaanihimya wira: ?Wiisoopole mmansawo waari mwene a aYuta.?

³⁸Vasulu vamwiikimanyo wa Yesu vaahilempwa wira: ?OLA MWENE A AYUTA.?

³⁹Mulavilavi mmosa wa yaawo yaakhomeliwe vamwiikimanyo aanimuruwana Yesu iiraka: ?Nto nyuwo khamuhiyo Moopoli? Wiisoopole mmansawo ni munoopole hiyo!?

⁴⁰Nto mukina aahinvaanyiha ahimyaka wira: ?Nyuwo khamunimoova Muluku, ni munhaawa mamosaru?

⁴¹Hiyo v'ekeekhayi ninliverya ehukhumu ya miteko sivaraly'ahu, nto ola khatthenke etthu.?

⁴²Numala, aahimuhimeerya wira: ?Yesu, mukuupuwele miyo mwaphiya moomweneni mwanyu!?

⁴³Yesu aahimwaakhula, iiraka: ?Kinoohimeeryani ekhweeli wira olelo vaava munookhala ni miyo oParatiso.?

⁴⁴Wattamelaka othana eriyari yaahikhumelela ewiriphi elapo yothene mpakha iwoora tthaaru.

⁴⁵Nsuwa naahiriipa, ekuwo yuulupale yaari mpaani mwa Muluku yaahikhereya eriyari.

⁴⁶Nto Yesu aahikhuwela vaalupale iiraka: ?Tiithi, mmatatani mwanyu kinnoovahereryani Erooho aka.? Ahimyakaru siiso khukhwa.

⁴⁷Mukhulupale a anakhotto oonakaru saakhumelenle aahimuttottopela Muluku iiraka: ?Vekeekhayi mulopwana ola aari ooreera murima!?

⁴⁸Atthu yaathukumanenle woona itthu siiraneya, numala woona itthu iya, yaahihokolowela owaani emanaka itthirima.

⁴⁹Othene y'ale yaamusuwela Yesu, vamosaru n'athiyana, yaamutthanre okhuma oKalileya yaahikhala weiwo, ehimwaattamenle, ewehexexaka itthu siiraneya.

⁵⁰Aahikhala mulopwana mmosa nsina nawe Yosefe namphuki milattu a elapo ya wArimathaya muttetthe w'oYuteya owo aari mutthu ooreera murima ni a xariya nave-tho aaniwehererya orwa Omwene wa Muluku.

⁵¹Owo khaaiwananne n'itthu saalamunly'aya ni siiraly'aya akhw'awe.

⁵²Aahirowa okumana ni Pilato, khunvekela murutthu wa Yesu.

⁵³Numala aahikuruxa vamwiikimanyo, aahiphapa ni esanta khurowa ovitha munikhukuni n'athimpwe vamwala, memmo nlelo muhaavithiwe mutthu.

⁵⁴Naari nihiku nooweteteela, nave naahanle vakhaani opaceriwa nihiku na esaapatu.

⁵⁵Athiyana yaamutthanre Yesu okhuma oKalileya yaahimutthara Yosefe. Yahoona nikhuku nlo ni khuweha enamuna waiyathiw'aya murutthu wa Yesu.

⁵⁶Okathi vaahokolowenly'aya owaani yaaheteteela makhura oowunkhela ni makhura makina wira yattikitthele murutthu wa Yesu. Nto esaapatu yaahimumula ntoko saarum'aya ikano sa Monse.