Luke 22

¹Niira na mikatthe soohiheliwa miropo, nenlo niihaniwa Paasikha n'ari vakhiviiru.

²Makhulupale a anamukuttho n'awiixuttihi a Ikano yaaniphavela enamuna yoomwiiva Yesu, nto yaaniwoova atthu.

³Vano Satana aahimukela Yuta iihaniwa Isikariyoti, aari mmosa aarummwa muloko nanli.

⁴Yuta owo aahirowa ovaanela ni makhulupale a anamukuttho ni makhulupale a empa ya Muluku enamuna yoonvahererya Yesu.

⁵Awo yaahitteeliwa murima vanci-ene, khuvarihana onvaha musurukhu.

⁶Yuta aahitthuna, vano khupacerya ophavelasa okathi w'onvahererya Yesu, atthu ehisuwelaka.

⁷Naahiphiya nihiku na mikatthe s'ohiheliwa miropo nenlo yaahit'aya epwittipwitthi ya Paasikha.

⁸Yesu aahimuruma Petru ni Yohani orowa omuttettheni iiraka: Murowe mwaneeteleele yoolya ya Paasikha wira nilye.

⁹Awo yaahimukoha wira: ?Muntthuna wira neteteele vayi yoly'eyo??

¹⁰Yesu aahiwaakhula wira: Okathi munkel'anyu mmuttettheni munoomphwanya mulopwana mmosa iireiye muno wa maasi, mmutthare yoowo mpakha empa enrow'awe okela.

¹¹Mwamuhimeerye mwaneene etthoko wira: Mwiixuttihi onnookohani wira: Nri vayi nipuro ninrow'aka olya-mo niira na Paasikha vamosa n'awiixutti aka?

¹²Owo onimoothoonyeryani nipuro nuulupale osulu eri mpaani mwawe yolokiheriwa-ene.

¹³Awo yaahirowa, yaahiphwanya ntoko Yesu saahimeenry'awe nto khweeteteela yoolya ya Paasikha.

¹⁴Vaaphiyaly'aya okathi, Yesu aahikilaathi onalya vamosa n'arummw'awe

¹⁵nave khwaahimeerya wira: ?Kaahiphavela vanci-ene omulya ni nyuwo Paasikha ola kihinatthi ohaawa.

¹⁶Tthiri kinooleelani ekhweeli wira nkinimulya-tho Paasikha mpakha vanrow'awe omalelihiwa moomweneni mwa Muluku.?

¹⁷Vano aahikuxa ekoopho, aahimuxukhuru Muluku, yiiraka: ?Mukuxeke, mukawaneke othene anyu.

¹⁸Maana kinoohimeeryani wira nkintthikela-tho owurya eviinyu mpakha vanrw'aya Omwene wa Muluku.?

¹⁹Numala aahikuxa mukatthe, aahimuxukhuru Muluku, aahikawanya mukatthe owo khwaavaha awiixutti awe aahimeeryaka wira: ?Ela erutthu aka, evaheriwe nyuwo. Mwiireke iya mukuupuwelaka miyo.?

²⁰Siiso-tho vaamanly'aya olya, aahikuxa ekoopho khuhimya wira: ?Ekoopho ela ti wataana wa naanaano, olipihiwe n'iphome aka, y'ela emwarexeliwe nyuwo.?

²¹Vano-nto moone wira ole onrowa okivariha, t'ule onlya ni miyo.

²²Vekeekhayi Mwaana a Mutthu onrowa okhwa ntoko silempw'aya, nto ootakhaliwa mutth'uwo onrowa onvariha!

²³Vano awo yaahikelela okohana yaaworu ephavelaka omusuwela t'ani a yaawo aarowa wira etthu ene y'eyo.

²⁴Awiixutti yaaninyakulihana mwaha wo wira ti pani arowa okhala muulupale mwa yaawo.

²⁵Nto Yesu aahahimeerya wira: Mamwene a mulaponi, anaaruma atthu ntoko axineene, ale anaalamula, annitthaniwa atthu ooreera murima ohoolo waya.

²⁶Nto yeenyuru vahiireyeke siiso. Ohiya vo, ole ori muulupale, akhaleke ntoko ti mukhaani nave ole onlamulela aiilikanyiheke ntoko ole onrumeela.

²⁷Tthiri muulupale t'ani? T'ule onkilaathi onalya, wala t'ule onrumeela? Kahiyo ole okilanthe! Tthiri miyo, kinkhala eriyari anyu ntoko murumeyi.

²⁸Ti nyuwo mwaakhalenle nthiti okhala ni miyo okathi wo wehereriwa waka.

²⁹Vano, miyo kinimoovahani Omwene ntoko Atiithi sikivahaly'aya,

³⁰wira mulyeeke nwuryeke vanipuroni vaka moomweneni mwaka ni munookilaathi mwiihiceni wira mulamule maloko muloko ni manli a Isarayeli.

³¹Apwiya yaahihimya-tho wira: Simoni! Simoni! Mwiiwe, Satana oovekela wira aweehereryeni ntoko aniveeriw'aya meele muthokwani,

³²nto miyo kihoovekelelani wa Muluku wira waamini wanyu ohimore. Nave nyuwo mwahokolowela wa miyo, mwaalipihe axinn'inyu.

³³Petru aahaakhula iiraka: ?Pwiya, koolikanana w'ottharani mpakha otthukweliwa ni mpakha okhwa.?

³⁴Nto Yesu aahimulopola iiraka: ?Petru nyu, ohiyu yoola muthupi khaniipa muhikirunne imaara tthaaru.?

³⁵Yesu aahaakoha awiixutti awe wira: Okathi koorumalyaakani orowa muhikunxe murupa hata esaakho nnakhala ixapattho, yaahikhala etthu yoothonweni? Awo yaahaakhula yiiraka: ?Nnaari!?

³⁶Yesu aahahimeerya wira: Nto vano ole orina murupa, akuxeke eettaneke, siiso-tho esaakho akuxeke. Nave ole ohikhalanne xoowa atumihe nlaya nawe omuthume mmosa.

³⁷Kinooleelani wira enrowa omaliheriwa mwa miyo ele elempwe wira: ?Ookhalihiwa ntoko mutakhali. Tthiri sothene silempwe mwaha wa miyo sinrowa omalelihiwa.?

³⁸Nto awo yaahimuhimeerya wira: ?Pwiya akhala va axoowa ala anli.? Nto Yesu aahiwaakhula wira: ?Paahi!?

³⁹Yesu aahivenya khurowa omwaako Oliveira ntoko saalimalenly'awe. Awiixutti awe yaahimutthara.

⁴⁰Vaaphiyaly'aya, aahahimeerya awiixutti awe wira: ?Munvekeleke Muluku wira muhimore mweehereriwaka.?

⁴¹Aahaahiya yaawo khwaarakamela vakhiviru ni imeeturu miloko miraru, khukokhora anavekela iiraka:

⁴²Tiithi, mwatthuna, mukaakiherye ekoopho ela. Nto ehiireye ntoko sintthun'aka miyo, yiireye ntoko sintthun'anyu nyuwo.

⁴³Okathi uwo waahimukhumelela munkelo a wirimu wira omulipihe murima.

⁴⁴Yesu aahiiniwa murima vanci-ene, khuyavekela n'ulipiherya, vano orettheela wawe waanimorela vathi ntoko mattonttoni maalupale a ephome.

⁴⁵Vaamanly'awe ovekela aahivenya khurowa okumana n'awiixutti awe, nto khwaaphwanya erupaka mwaha wooripiwa murima.

⁴⁶Nto aahaakoha wira: Munrupela-ni? Nvenye, nvekeleke wira muhimore mwehereriwaka.

⁴⁷Ninlelo alavulaka siiso, waahiphiya muttitthi w'atthu. Wahooliwa ni Yuta, yoowo aari mmosa a awiixutti muloko nanli. Aahimwaattamela Yesu, wira anvahe epeeco.

⁴⁸Nave Yesu aahimuhimeerya wira: ?Yuta, n'ipeeco teninvarihan'anyu Mwaana a Mutthu??

⁴⁹Okathi voonaly'aya wira yaarowa okhumelela awiixutti ale yaari ni Yesu yaahimukoha yiiraka: ?Pwiya, munnitthuna wira n'aphwateke ni xoowa??

⁵⁰Nto mmosa a yaawo naanaanoru aahikhwasa niyaru noolopwana na murumeyi a mukhulupale a anamukuttho.

⁵¹Nto Yesu aahiwaakhula wira: ?Paahi! Mwaahiye.? Ahimyakaru siiso aahikuxa niyaru na mulopwana owo, khunvoniha.

⁵²Vano Yesu aahahimeerya makhulupale a anamukuttho ni makhulupale a mpaani mwa Muluku ni mahumu yaaronwe onvara, wira: Murwiye va n'axoowa n'ikopo ntoko wira miyo ki nawiiye?

⁵³Mahiku othene miyo kaari ni nyuwo mpaani mwa Muluku, khuhikivara! Nto ula okathi anyu, ni ti waawe ole onruma mweepiphini.

⁵⁴Awo yaahinvara Yesu, khumurowana owanny'awe mukhulupale a anamukuttho. Petru aanimutthara ottuli amurakamelaka.

⁵⁵Atthu akina yaahipattiha mooro vapuwani khukilaathi vaavo anoora. Nave-tho Petru aahikilaathi vamosa ni yaawo.

⁵⁶Okathi uwo, muthiyana mmosa aavara weiwo, vaamoonaly'awe Petru akilanthe-ene vakhiviru va mooro aahinwehexexa yoowo khuhimya wira: ?Nave-tho mulopwana ola aari ni yoowo.?

⁵⁷Petru aahiruna, ahimyaka wira: ?Muthiyana, miyo nkinimusuwela owo!?

⁵⁸N'uvira okathi vakhaani murumeyi mukina aahinwehexexa nave khuhimya wira: ?Nave-tho nyuwo mwa mmosa a y'ale!? Nto Petru aahimwaakhula iiraka: ?Mulopwana, nkihiyo miyo!

⁵⁹Vavinr'aya tho okathi vakhaani aahirwa mukina khulipiherya ahimyaka wira: ?Khanimmwaanyiherya-tho mulopwana ola aari ni yoowo, okhala wira tthiri n'ula-tho muKalileya.?

⁶⁰Nave Petru aahaakhula-tho, iiraka: ?Mulopwana miyo nkinsuwela enihimy'anyu!? Nlelo alavulaka siiso, okathi yoowo muthupi w'ahiipa.

⁶¹Nto Apwiya yaahirukunuwa enwehaka Petru. Vano owo aahuupuwela moolumo yaahimeeriw'awe n'Apwiya wira: Muthupi ohinatthi wiipa olelo, nyuwo munookiruna imaara tthaaru.

⁶²Nto Petru aahikhuma vo, khurowa wunla oriipiwe-ene murima vanci-ene.

⁶³Atthu yamulipelela Yesu yaaninveha ni yaanimmana.

⁶⁴Yaanimukhuneela maitho, yaanimmana owiitho enamukoha wira: ?Omuloherye t'ani oomanne!?

⁶⁵Nave yaanimuruwana ehimyaka moolumo makina manci-ene onanara.

⁶⁶Okathi vaaxiiy'aya makhulupale a aYuta ni makhulupale a anamukuttho n'awiixuttihi a Ikano, yaahithukumana khumukeliha Yesu mpwaro, wira emphuke.

⁶⁷Nto yaahimukoha Yesu yiiraka: Munleele va, nyuwo mwa Kristu? Nto owo aahiwaakhula wira: Miyo kooleelani, khamunkikupali,

⁶⁸ni kookohani khamunkaakhula.

⁶⁹Nto okhuma olelo Mwaana a Mutthu onookilaathi moono woolopwana wa Muluku oowerya-sothene.

⁷⁰Othene aya yaahimukoha wira: Weeso nyuwo mwa Mwaana a Muluku? Yesu aahiwaakhula, iiraka: Ti siiso sinihimy'anyu, miyo ka Mwaana a Muluku.

⁷¹Nto awo yaahiira: Vano nnaaphavelelani-tho anamoona? Hiyano mmansihu n'omwiiwa ele ehimyaly'awe.