Luke 21

¹Yesu attukhulaka maitho, aahiwoona athaciri yaahela soovaha saya nipuro na muhakhu w'empa ya Muluku.

²Aahimoona nave muthiyana mmosa n'amukhweli aari oothoiwa, yoowo aarihenle-mo inoota piili;

³nto Yesu aahahimeerya wira: Kinooleelani ekhweeli wira n'amukhweli ula oothoiwa oovaha voowavikana atthu akina othene.

⁴Tthiri, othene ale arihenle-mo avanhe ihalahala, nto ola moothoiwani mwawe, oovaha sothene saalipan'awe.

⁵Yaahikhala vaavale atthu yaahimya wira empa ya Muluku y'otepa oreera mwaha wa maluku aya oowaarya ni mwaha wootekiwa oratta-ene, ni soovaha saaruuhiwa. Nto Yesu aahahimeerya wira:

⁶Anoophiya mahiku siniiraya sothene iya sinoon'anyu sipwexakasiwe, khaninrowa ohala nluku nnakhala nimosa vasulu va nikhw'aya.

⁷Nto awo yaahimukoha Yesu wira: ?Mwiixuttihi, okathi xeeni sinrow'aya okhumelela itthu iya? Ethonyeryo xeeni enrowa onsuweliha wira sihanle okhumelela??

⁸Owo aahiwaakhula wira: Mwiipasoope ahikhale aniwootothani! Animoorwa atthu anci-ene ni nsina n'aka ehimyaka wira: ?Miyo ka Kristu, ni wira okathi woophiya! Nto nyuwo muhaatthare.

⁹Mwaaiwaka silavuliwaka ikhotto n'unyakulihana w'atthu muhituthuwe, itthu iya sihaana okhumelela toko, nto kahiyo tumala wene.?

¹⁰Yesu ahaahimeerya-tho wira: Maloko makina anoovirikanya maloko makina nave omwene onoovirikanya omwene mukhw'aya.

¹¹Sinookhumelela itetere suulupale n'itala, n'iretta mapuro manci-ene, munimoona itthu sootikiniha nave sinookhumelela ithoonyeryo suulupale wirimu.

¹²Nto sihinatthi okhumelela itthu iya munoovariwa, munoolupatthiwa, munooroihiwa ohoolo wa mamwene ni wa makuvernatoro mwaha wa nsina n'aka;

¹³itthu iya sinimookhumelelani wira mukhale anamoona.

¹⁴Vano muhele mmurimani mwanyu etthu ila, muhiilikanyiherye wiisaakiha

¹⁵okhala wira miyo kinimoovahani moolumo n'usuwela awanan'inyu othene ahinwery'aya ovaanya nnakhala w'akhula.

¹⁶Nyuwo munrowa ovarihiwa n'axitiith'inyu n'aximai anyu n'axin'anyu, n'amus'inyu n'apatthan'inyu. Nave akina wa nyuwo animwiiviwa.

¹⁷Atthu othene animoonyokhani mwaha wa nsina naka,

¹⁸nto nnakhala ekharari emosa ya mmuruni mwanyu khenrowa orimeela.

¹⁹Mukhaleleke nthiti ovilela munimoopola ekumi anyu.

²⁰Okathi munoon'anyu oYerusalemu orukureriwe-ene n'anakhotto, okathi uwo musuweleke wira ohononiwa waya woophiya.

²¹Okathi ene yoowo ale ari elapo y'oYuteya etthyawele omwaako. Ale anrowa okhala mmatta ahihikolowele omuttettheni,

²²okhala wira anrowa okhala mahiku a ehukhumu, wira simaliheriwe sothene sinihimy'aya Soolempwa

²³Mahiku ene yaawo ootakhaliwa athiyana anrowa ophwanyiwa arupanle n'ale anrowa ophwanyiwa yaamwihaka, tthiri onookhala ohaawa wuulupale elapo ela, onanariwa wa Muluku onimwaamorela atthu ala.

²⁴Atthu anci-ene animwiiviwa n'ixoowa akina anookuxiwa erowaniwe ilapo sikina. Nave Yerusalemu onoonyakattiwa n'amalapo mpakha omalela okathi w'amalapo yaawo.

²⁵Aahihimya-tho wira: ?Sinookhala ithoonyeryo vansuwani, vamwerini ni mutheneerini, maloko othene a vathi va anookhala oohaawa ni woova, mwaha w'oruma n'uttikinyeya wa ephareya.

²⁶Atthu anrowa okhwa woova elipelelaka sootakhala sinrowa okhumelela mulaponi mothene, maana ikuru sa wirimu sinoottikinyeya.

²⁷Vano atthu anrowa omoona Mwaana a Mutthu arw'aka mmeekuni n'uwerya wuulupale ninttittimiho.

²⁸Okathi sinrow'aya opacerya okhumelela itthu iya mooneke osulu ni nvenxe muru, okhala wira woopoliwa wanyu woophiya.?

²⁹Yesu aahahimeerya nlikanyiho nla iiraka: ?Mooneke mpheera ni miri sikina sothene.

³⁰Moonakaru sipaceryaka ophuwela makukhu munnisuwela mwaxineene wira eyiita eri yoophiya.

³¹Siiso-tho moonakaru sikhumelelaka itthu iya musuweleke wira Omwene wa Muluku woophiya.

³²Kinoohimeeryani ekhweeli wira itthu iya sothene sinookhumelela atthu a vano ahinatthi omala.

³³Erimu n'ulumwenku sinoomala nto masu aka khanimala!?

³⁴Aahihimya-tho wira: ?Mwiipasoope vanci-ene wira mirima sanyu sihilemeliwe ni soonanara ni soohapala ni soovelaveliha s'ekumi! Ni wira nihiku nlo nihootutuxeni,

³⁵okhala wira nlo ninrwa ntoko ntthavi nnamorela atthu othene ankhala mulaponi mothene.

³⁶Mulipeleleke okathi wothene ni munvekeleke Muluku okathi t'ukathi wira nwerye otthyawa sothene sinrowa okhumelela ni wira nwerye weemela ohoolo wa Mwaana a Mutthu.?

³⁷Yesu aanivira owixuttihaka atthu othana wothene mpaani mwa Muluku, nto ohiyu aanirowa oviriha omwaako wiihaniwa Olivera.

³⁸Atthu othene yaanirowa vasiisu okumaana n'uwo mpaani mwa Muluku, wira emwiiweke.