Luke 20

¹Nihiku nimosa Yesu aaniwiixuttiha atthu mpaani mwa Muluku ni analaleerya Ehapari Yooreera. Vano yaahirwa makhulupale makina vamosa ni mahumu,

²nto yaahimukoha wira: ?Munihimeerye owerya oniiran'anyu itthu iya. T'ani oovahaleni owerya iwo?

³Yesu aahiwaakhula wira: ?Ni miyo-tho kinimookohani etthu emosa.?

⁴Kileeleni: ?Opatiso wa Yohani waakhumme vai? Wa Muluku wala w'atthu??

⁵Awo yaahikelela ovaanela mukina ni mukhw'awe, ehimyaka wira: Naakhularu wira ti wa Muluku, owo onoonikoha wira xeeni nihimukupaly'ahu Yohani.

⁶Nave naakhularu wira owerya w'atthu, atthu othene anoonivonyakasa maluku, okhala wira vannihimmwa wira Yohani Mpatisa aari profeta.

⁷Awo yaahimwaakhula wira: Khaninsuwela waakhumm'aya.

⁸Vano Yesu aahahimeerya wira: ?Ni miyo-tho nkinoleelani owerya oniiran'aka itthu iya.?

⁹Numala, Yesu aahahimeerya atthu nlikanyiho nla iiraka: Mulopwana mmosa aahiphatteya miri sa ewuva, ematta eyo aahaahiyerya alimi akina wira elimeke. Numala aahirowa mukwah'awe khuviriha weiwo mahiku manci-ene

¹⁰vaaphiyaly'aya okathi woohepha, aahimuruma murumeyi awe mmosa w'alimi awo wira awo alive epantte ya mihokorokho sawe. Nto awo yaahinvara murumeyi uwo, khummana ni khumoomola ahinvahale etthu.

¹¹Nto mwaneene ematta aahimuruma murumeyi mukina nave n'uwo-tho yaahimmana, yaahinveeha, khumoomola ehinvahe etthu.

¹²Aahaarumihela-tho murumeyi mukina aneeraru, nto awo yaahinvulaliha nave-tho khumoomola.

¹³Vano mwaneene ematta aahiira: ?Kiire exeeni vaava? Kinrowa waarumihela mwan'aka onimphent'aka vanci-ene. Vekeekhayi Owo anoomuttittimiha.?

¹⁴Nto alimi awo vaamoonaly'aya yaahihimeeryana wira: ?Ola tunrowa ohalana ematta ela! Nrowe nimwiive, ematta ekhale yawihu.?

¹⁵Vano yaahimurowana ota w'ematta, khumwiiva. Atthu siisa, tthiri mwaneene ematta ontthuna owiiriha exeeni?

¹⁶Owo onimoorwa, ni onoowiiva atthu awo, ematta eyo aahiyerye atthu akina. ?Atthu yiiwakaru moolumo ala yaahiira: ?Muluku ahitthunihe wiiraneiya siiso!?

¹⁷Nto Yesu aahaawehexexa atthu khwaakoha iiraka: Weeso enihimya exeeni eyo elempwe wira: Nluku n'arihaly'aya alipa-ooteka empa nookhalihiwa nluku ninlipiha emp'eyo?

¹⁸Aahihimya-tho wira: ?Othene ale anrowa omorela vasulu va nluku nla animuntakaseya n'ale anrowa omoreliwa ni nluku nla onoothatuwa ntthupi.?

¹⁹Awiixuttihi a Ikano ni makhulupale a anamukuttho yaaniphavela onvara Yesu okathi-ene yoowo, okhala wira yaanisuwela oratta-ene wira nlikanyiho nlo n'ahimya yaawo, nto khuhinvara maana yaaniwoova atthu.

²⁰Tivo yaahikelela omulupattha Yesu, yaahaaruma anamahottela wira yiipakeke okhala anaxariya, wira amphwanyane Yesu ekiiswa wira anvare ni yaanvahererye wa makhulupale ni wa Kuvernatoro.

²¹Awo yaahimukoha wira: ?Mwiixuttihi n'osuwela wira sothene sinihimy'anyu n'iye siniixuttih'anyu ti s'ekeekhayi ni khamunimuthanla mutthu muttharihelaka makhalelo awe, nto muniixuttiha n'ikeekhayi ephiro ya Muluku.

²²Nto munleele etthu emosa: Hiyo niliveke wala nihiliveke mposito wa mwene Kesar??

²³Yesu asuwelaka woothererya waya, nto aahahimeerya wira:

²⁴Mukooniherye va musurukhu mmosa wa maluku. Elatarato ela va ni nsina nla va nlempwe vaava ti nawani? Awo yaahaakhula wira: ?Ti na Kesar!?

²⁵Nto Yesu aahiwiirela wira: Weeso, munvaheke Kesar ekhanle ya Kesar, munvaheke Muluku ekhanle ya Muluku.

²⁶Siiso khiyaawenrye onvara ni moolumo awe ohoolo w'atthu othene, vano waakhula wawe wahaatikiniha vanci-ene, khumaala.

²⁷Asatukhi akina yaahirowa okumana ni Yesu. Awo annihimya wira atthu ookhwa khanihihimuwa, tivo vaamukohaly'aya, wira:

²⁸Mwiixuttihi, Monse oonihiyerya yoolempwa wira mulopwana akhwa khumuhiya mwaar'awe ahimuyaranne mwaana, munn'awe mulopwana owo ohaana omuthela naamukhwel'uwo, wira amuyarele mwaana ole okhwiiye.

²⁹Vano yaahikhala axinna athanu n'anli. Ole oopacerya aahimuthela mwaar'awe, khukhwa ahiyaranne mwaana.

³⁰Vottharelana a n'enli

³¹numala a neeraru, n'akina yaahimuthela muthiyana owo mpakha a nethanu n'enli. Othene aya yaahimuthela ni othene aya yaahikhwaasa ehiyaranne mwaana.

³²Numala aahikhwa muthiyana owo.

³³Nto vano nihiku noohihimuwa, muthiyana owo onrowa okhala mwaara awani, maana oothanu n'enli aya yaahimuthela?

³⁴Yesu aahiwaakhula wira atthu a olumwenk'ula annithelana ni annithelihana.

³⁵Nto ale onaaphwanela ophiya olumwenku onoorwa ni ohihimuwa mookhwaani, awo khanthela hata khanthelihiwa.

³⁶Tthiri awo anlikana n'ankelo, vano nto khanikhwa-tho. Awo aana a Muluku, akhalaka aana a ohihimuwa.

³⁷Vano, alipa-ookhwa anohihimuwa tthiri, hata Monse onnisuweliha alavulaka mwaha wa mwiri wa miiwa waavarela, owo onniwiihana Apwiya Muluku a Aparahaamu, Muluku a Isakhi ni a Yakope.

³⁸Owo kahiyo Muluku a'tthu ookhwa nto t'atthu akumi. Tivo mwa yoowo atthu othene aakhalana ekumi.

³⁹Nto yaahikhala awiixuttihi akina a Ikano yaamuhimenrye wira: ?Mwiixuttihi, moohimya oratta-ene!?

⁴⁰Numala, khaavo-tho aawerya omukoha etthu ekina.

⁴¹Nto Yesu aahaakoha wira: ?Vaniireya sayi vahimmwaka wira Kristu osuulu wa Taviti??

⁴²Nwehe wira Taviti mwaneene oohimya mulivuruni ya Masaalimo wira: Apwiya yaahahimeerya Apwiy'aka wira: Kilaathini moono aka w'olopwana,

⁴³mpakha miyo waapweha awanan'inyu vathi va inawu s'anyu.

⁴⁴Vano, vakhala wira Taviti onnimwiitthana Kristu Pwiy'awe, onikhala sayi osuulu awe?

⁴⁵Atthu othene enwiriyanaka, Yesu aahahimeerya awiixutti awe wira.

⁴⁶Mwiipasoope n'awiixuttihi a Ikano! Wasivela wettakasa ewanre-ene ikuwo soorekama, n'ukhomasiwa mmuthukumanoni. Annithanla mapuro oottittimiheya mpaani moothukumana, ni mapuro oosuwanyeya muniirani.

⁴⁷Awo annilya mmatthokoni mwa atthiyana anaamukhweli yoothereryaka n'upisiha mavekelo. Nto Muluku onimwaahukhumu vanci-ene.