John 10

¹Yesu aahahimeerya atthu wira: Kinoohimeeryani ekhweeli wira: Ole oniira akelaka munsisini muri ipwittipwitthi, khuhiyavira vamukhora, khiyatupha nipuro nikina, owo nawiye, mulavilavi.

²Vano, ole onvira vamukhora t'ukhanle makampusi a ipwittipwitthi.

³Mulipa oolipelela mukhora onnimuhulela yoola. Ipwittipwitthi sinnisuwela nsu nawe nave owo onniihana ipwittipwitthi siri sawawe, khula emosa nsina naya, khukumiherya vate.

⁴Numala okumiha ipwittipwitthi sawe sothene, onnihoolela, n'iyo sinnimutthara ottuli, okhala wira sinnisuwela nsu nawe.

⁵Vano khasinimutthara mutthu sinimutikhinaya: Ohiya vo, sinomutthyawa, maana khasinsuwela nsu na mutthu ootikiniha.

⁶Yesu aahahimeerya nlikanyiho nla: Vano awo khiyaasuwela etthu yaleel'awe.

⁷Tivo Yesu ahaahimeerya-tho wira: Kinooleelani ekhweeli wira: Miyo ka mukhora wa ipwittipwitthi.

⁸Othene ale arwiye miyo kihinatthi, anawiiye n'alavilavi. Vano ipwittipwitthi khisaawiiwelenle.

⁹Miyo ka mukhora ole onkela aviraka mwa miyo, onimoopowa. Owo onookela, onookhuma, onoophwaya yoolya.

¹⁰Nawiiye onrweela wiiya ni wiiva n'upwetexa paahi. Miyo kirwiiye wira atthu ekhalane ekumi, ekumi ehinimala.

¹¹Miyo ka makampusi ooreera murima. Makampusi ooreera murima onnileva ekumi awe mwaha wa ipwittipwitthi sawe.

¹²Namuteko ohikhanle makampusi nave ipwittipwitthi sihikhanle sawawe, aweha mwiici orwaaka onnihiya, khuyatthyawa. Vano mwiici onnivara ni onnimwarya-mwarya.

¹³Namutek'owo onnitthyawa okhala wira namuteko onlipelela oliviwa ni khoniwehaweha ipwittipwitthi.

¹⁴Miyo ka makampusi ooreera murima: Miyo kinnisuwela ipwittipwitthi saka, n'iyo sinnikisuwela,

¹⁵ntoko Atiithi sinkisuwelaya ni ntoko miyo kinaasuwelaka Atiithi. Miyo kinnileva ekumi aka mwaha wa ipwittipwitthi saka.

¹⁶Kokhalana-tho ipwittipwitthi sikina sihikhanle nikoto nenla: Seiyo-tho kihaana othukumanya. Iyo sinimwiiwa nsu naka: Siiso ninrowa okhalaka nikoto nimosa ni makampusi aya mmosa.

¹⁷Atiithi annikiphenta: Nave miyo kinnileva ekumi aka, wira kikuxe-tho ekumi yeeyo.

¹⁸Khaavo onwerya okaakha ekumi aka: Ti miyo mwaneene kinleva votthuna waka. Miyo kookhalana owerya w'oleva emuki aka nave kookhalana owerya w'okuxa-tho yeeyo. Ti siiso sirummwaka n'Atiithi.

¹⁹Ayuta yaahivanyihana-tho mwaha wa moolumo ala.

²⁰Anci-ene a yaawo yaanihimya wira: ?Ola ori ni munepa wootakhala ni onkhwa anepa. Munimwiiwelela-ni?

²¹Akina yaanihimya wira: ?Mutthu ori ni munepa wootakhala khanlavula siisa. Khino munepa woothakala onoowerya waatthukula maitho alipa-oohoona??

²²Mahiku ene yaawo, oYerusalemu naahikhala niira n'otthapeliwa empa ya Muluku. Yaari eyiita.

²³Yesu aaneetteetta mpaani mwa Muluku, niphiryo na Salomoni.

²⁴Ayuta yaahimurukurerya, khumwiirela wira: ?Munnikhuwa mpakha lini? Nyuwo mwaari Kristu, munihimeerye oratta-ene, muhinikhuwe.?

²⁵Yesu aahiwaakhula wira: ?Miyo kihohimeeryani: Nyuwo khuhaamini. Miteko sinvaraaka mwa nsina n'Atiithi, sinnikikhalela onamoona.?

²⁶Nto nyuwo khamunaamini, okhala wira khamuhiyo ipwittipwitthi saka.

²⁷Ipwittipwitthi saka sinniiwa nsu naka: Miyo kinnisuwela seiyo, n'iyo sinnikitthara.

²⁸Miyo kinnivaha seiyo ekumi ehinimala: Tivo khasinrimela-tho. Khaavo onrowa okaakha seiyo mmatatani mwaka.

²⁹Ele Atiithi ekivahaly'aya ti yuulupale ovikana sothene, nave ele eri mmatatani mw'Atiithi khaavo onwerya owaakha.

³⁰Miyo n'Atiithi nri mmosaru.

³¹Ayuta yaahitthikela-tho ottotta maluku wira empwexakase.

³²Vano Yesu ahaahimerya wira: ?Miyo kowoniheryani miteko sinci-ene soreera, sinrwa w'Atiithi: Mwa miteko seiyo t'uvi ontthunanyu okivonyerya maluku??

³³Ayuta yaahimwaakhula yiraka: Hiyo khinnoovonyeryani maluku mwaha wa muteko anyu wooreera, nto mwaha w'onveeha Muluku: Tthiri nyuwo mwa mutthu, munniipaka omuluku.

³⁴Yesu aahaakhula wira khilempwale muliivuruni mw'anyu mwa ikano wira: ?Miyo koohimya nyuwo mwa amuluku??

³⁵Vakhala wira owo aahiwiihana amuluku atthu yale yalaleeriwe masu a Muluku, Soolempwa khasinootha.

³⁶Votepa miyo: Muluku ookireeriha, khukiruma orwa molumwenkuni-mu. Nto nyuwo munihimerya-ni wira miyo kininveha Muluku, kiiraka: ?Miyo ki Mwaana a Muluku??

³⁷Miyo kaahivareke miteko s'Atiithi aka, muhikaaminiki.

³⁸Nto kaavaraka seiyo, hata muhikaaminiki miyo mwaamini soowiira, wira musuwele wira Atiithi ari mwa miyo ni miyo kiri mw'atiithini khuhiyakaamini, mwaaminiki ni miyo kiri mwa Atiithi.

³⁹Ayuta yaahiphavela-tho onvara. Vano Yesu aahitthyawa mmatatani mwaya.

⁴⁰Yesu ahihokolowela-tho ekhopela ekina ya muro Yortani weiwo Yohani aapatis'awe khalayi, khukhala weiwo.

⁴¹Atthu anci-ene yaanirowa okumana n'uwo, ehimyaka wira: Veekeekhayi Yohani khiirale nnakhala ethoonyeryo emosa, nto sothene saahimaly'awe mwaha wa yoola saari s'ekeekhayi.

⁴²Nto, mapuro awo, atthu anci-ene yaahimwaamini yoowo.