John 11

¹Muttetthe wo Pethania aahikhala mulopwana iihaniwa Lasaro, akhala n'axirokor'awe anli: Maria ni Marta.

²Maria owo aarina murokor'awe, ti yoole aamuttikitthenle Yesu makhura oowunkhela khupuputtha inawu n'ikharari sawe.

³Vano axirokor'awe awo yaahiruma ohimeeriwa Yesu wira: ?Pwiya! Ole onimphent'anyu onoowereiwa.?

⁴Vaiwalyawe siiso, Yesu ahiira: Erett'eyo khinimwiiva: Nto enoothonyerya nttittimiho na Muluku wira attittimihiwe-tho Mwaana a Muluku mwaha wa yeeyo.

⁵Yesu aanimphenta Marta ni Maria munn'awe, ni Lasaro.

⁶Vano, vaiwalyawe wira Lasaro anwereiwa, aahilekela mahiku manli nipuro nenlo naryawe.

⁷Vaavinryaya mahiku awo manli, aahahimeerya awiixutti awe, wira: Nrowe, nihokolowele-tho oYuteya.

⁸Awiixutti awe yaahimuhimeerya wira: Pwiya, mahiku ene yala aYuta yaniphavela wopwexakasani ni maluku: Vano muntthuna orowa-tho weiwo?

⁹Yesu aahahimeerya wira: Othana khukhalanne iwoora muloko ni piili? Mutthu eettaka othana, khanikwattuliwa ixa, maana onnoona muthuko onimwaleela elapo.

¹⁰Vano, eettaka ohiyu, onnikwattuliwa, okhala wira khuuvo muthuko mwa yoowo.

¹¹Numala olavula siiso, aahahimeerya wira: Mpatthan'ihu Lasaro, onoorupa: Vano kinrowa onvenxa.

¹²Awiixutti awe yaahimuhimeerya wira: ?Apwiya! Akhala wira onoorupa, onoovona!?

¹³Yesu aahimya okhwa wa Lasaro: Nto awiixutti yaanyiherya wira aahimya orupa wa ikhove.

¹⁴Vano Yesu aahahimeerya oratha-ene wira: Lasaro ohookhwa.

¹⁵Nto kootteeliwa murima mwaha w'ohikhala-wo ni mwaha wa nyuwo, wira mwaamini. Vano, nrowe namoone.

¹⁶Tome, iihaniwa Maphapo, aahahimeerya akhw'awe wira: Ni hiyo nrowe, nakhwe vamosa n'Apwiya!

¹⁷Aphiyaka oPetaniya, Yesu amphwannye Lasaro avithiwe masuri aya.

¹⁸Opetania waahirakamelana n'OYerusalemu ikisiro thanu.

¹⁹Ayuta anci-ene yaahirwa omuxekurya Marta ni Maria, wira yaakurunuxe murima mwaha wa murokor'aya.

²⁰Marta vaiwalyawe wira Yesu ahanle ophiya, ahirowa okumana. Maria ahanle akilanthi-ene owaani.

²¹Marta ahimwiirela wira: ?Pwiya! Nyuwo mwaari vaava, murokor'aka khaakhwa.?

²²Nave-tho koosuwela wira hata naanaano vaava sothene sintthun'anyu onvekela Muluku onimoovahani.

²³Yesu aahimuhimeerya wira: Murokor'inyu onoohihimuwa mookhwaani.

²⁴Marta ahimwaakhula wira: Miyo koosuwela wira onoohihimuwa nihiku n'ohihimuwa nookiserya.

²⁵Yesu ahimuhimeerya wira: Miyo ki ohihimuwa ni ekumi. Ole onikaamini, hata anakhwaru, onookhala-tho mukumi.

²⁶Vano ole orina ekumi, onikaamini miyo, khankhwa-tho. Nyuwo munnaamini etthu ila?

²⁷Owo aahaakhula wira: Ayo, Pwiya! Miyo kinnaamini wira nyuwo Kristu, Mwaana a Muluku, yoowo ontthuna orwa moolumwenkuni-mu.

²⁸Ahimyakaru siiso, Marta ahivenya arowaka omwiihana munn'awe, Marta, khumuhimeerya wiphiini wira: Apwiya ahoorwa, anoowihanani Maria.

²⁹Iiwakaru siiso, Maria ahivenya naanaanoru, khurowa okumana ni Yesu.

³⁰Yesu iira ahiphiyale mmuttettheni: Aari nlelo nipuro nenlo Marta namphwanyalyawe.

³¹Ayuta yaari owaani ni Maria emmaalihaka, vamoonalyaaya emelaka n'ukhuma ni waakuva, yaahimutthara: Yaanyiherya wira aarowa wunla omahiye.

³²Maria, vaphiyalyawe nipuro naari Yesu, amoonakaru, ahikokhora vamettoni-vawe iiraka: Pwiya! Nyuwo mwaari vaava, murokor'aka khaakhwa!

³³Yesu, vamoonalyawe Maria anlaka n'aYuta yaarwanne awe yinlaka, aahiriipiwa murima ni winiwa.

³⁴Numala, aahaakoha wira: Munvithale vayi? Awo yaahimwaakhula wira: Murwe Apwiya, moone.

³⁵Yesu ahinla.

³⁶Ayuta yaahihimya wira: ?Mmooneke siirawe omphenta!?

³⁷Vano akina a yaawo yaahiira: Ola, omutthukunle maitho mulipa-oohoona, khaawerya wira Lasaro ahikhwe?

³⁸Yesu aahiriipiwa-tho murima, khuvenya arowaka omahiye, mahiye awo yaari nikhuku naattiyeliwe nluku vamukhora.

³⁹Yesu ahiira: ?Mukumihe nluku nlo.? Marta murokor'awe Lasaro aakhwiye, aahimuhimeerya wira: Pwiya, onninkha. Ovithiwe masuri.

⁴⁰Yesu aahimwirela wira: Nkohimenryeni wira, mwaamini vale, munimoona nttittimiho na Muluku?

⁴¹Nto naahikumihiwa nluku. Vano Yesu, awehaka wirimu, aahiira: Tiithi, kinnoxukhuruni, maana mookiiwelela.

⁴²Koosuwela tthiri wira mahiku othene munnikiiwelela: Vano kihimmye siiso mwaha w'atthu ala arukurerenrye va, wira yaamini wira ti nyuwo mukirumme.

⁴³Ahimyakaru siiso, aahikhuwela n'ikuru, iiraka: Lasaro, mukhumele ota nno!

⁴⁴Mulipa-ookhw'owo aahikhuma, tthiri, atthukiweene n'ikuwo matata n'inawu, asipheleliweene owitho ni nleeso. Yesu aahiwiirela atthu: Mmutaphule, mmuhiye aroweke.

⁴⁵Ayuta anci-ene, yaarwiye omuxekurya Maria, vonalyaya itthu siiralyawe Yesu, yaahimwaamini yoowo.

⁴⁶Vano akina yaahirowa okumana n'aFarisi, khwaahimeerya itthu siiralyawe Yesu.

⁴⁷Makhulupale a anamukuttho n'aFarisi yaahitthukumana ni makhulupale a aYuta wira evaanele, khwiira: Mulopwan'owo onniira sootikiniha sinci-ene. Niire sayi?

⁴⁸Namuhiya siisa, atthu othene anrowa omwaaminiki: ARoma animoorwa, onaakha emp'ahu ya Muluku, ni elapo ahu.

⁴⁹Mmosa a yaawo, ihaniwa Kaifa, aari mukhulupale a anamukuttho eyakh'eyo, aahahimeerya wira: ?Nyuwo khamunuupuwela etthu!?

⁵⁰Khamunoona wira vanrerela mutthu mmosa paahi aakhwele atthu othene, wira atthu othene ehipweteye?

⁵¹Van'owo khahimmye etthu ila volakelela: Okhala wira aari mukhulupale a anamukuttho eyaakh'eyo, aahileeliwa ni Muluku ohimya wira Yesu aahaana waakhwela atthu a nloko na Isarayeli:

⁵²Nave kahi wakhwela-ru atthu a Isarayeli paahi nto wira aathukumanye vamosa aana a Isarayeli amwara-mwareiye.

⁵³Okhuma nihiku nenlo aYuta yaahiiwanana omwiiva Yesu.

⁵⁴Tivo Yesu kheetta-tho vanlakani elapo y'aYuta: Aahivenya weiwo arowaka elapo yoowattamela woothakoni, muttetthe wiihaniwa Efrayimi, khukhala weiwo vamosa n'awiixutti awe.

⁵⁵Vano Paasikha, niira n'aYuta, aari vakhiviru: Tivo atthu anci-ene yaanivenya ilapo saya, erowaka oYerusalemu Paasikh'owo, ohinatthi ophiya wira ereerihiwe.

⁵⁶Atthu awo yaanimphavela Yesu. Enari mpaani mwa Muluku, yaanikohana yiiraka: Nyuwo munoona sayi? Owo onimoorwa vaniirani va? Wala khanrwa?

⁵⁷Vano makhulupale a anamukuttho n'aFarisi yaahiruma wira, akhala mutthu aasuwela varyaawe Yesu, aahimeerye, wira envare.