John 12

¹Mahiku mathanu na mosa nihinatthi niira na Paasikha, Yesu aahirowa oPetaniya, weiwo waaryawe Lasaro, yoowo Yesu aamuhihimuxalyawe mookhwaani.

²Yesu aahivahiwa yoolya. Marta t'amurumela. Nave Lasaro aari mmosa w'ale yakilaathe enalya ni Yesu.

³Vano Maria aahikuxa murinki wa makhura oowunkhela, yiihaniwa ?nardo?, ooreerexa ni oorikexa, khuttikitthela ni makhur'awo inawu sa Yesu, khupuputtha n'ikharari sawe. Mpaani mothene mwahisareya wunkhela.

⁴Vano mmosa aawiixutti awe, iihaniwa Yuta Isikaryoti, yoowo arowa onvariha Yesu, ahiira:

⁵Makhur'ala ahitumiheriwe-ni musurukhu miloko muloko miraru, ekaweliwa alipa-oohaawa?

⁶Owo khaalavula siiso voowathokorerya alipa-oohaawa, nnaari: Owo aari nawiye. Yoowo t'asuka murupa, aniiya musuruku waheliwa-mo.

⁷Yesu ahimuhimeerya wira: Muhiyeni. Ola iinre oopuwelaka nihiku noovithiwa waka.

⁸Alipa-oohaawa munookhalana mahiku othene: Nto miyo nkinkhala ni nyuwo mahiku othene.

⁹Ayuta anci-ene yaahisuwela wira Yesu aari oPetaniya, khurowa weiwo, kahiyo mwaha wa Yesu paahi: Nave yarowenle omoona Lasaro, yoowo Yesu amuhihimuxalyawe mookhwaani.

¹⁰Vano makhulupale a anamukuttho yaahivarihana omwiiva-tho Lasaro,

¹¹okhala wira aYuta anci-ene, mwaha wa yoowo, yaanimwalana ni yaawo, khiyamwaamini Yesu.

¹²Mmeeloni mwaya, muttitthi muulupale w'atthu yarwiye oniirani na Paasikha, vaiwalyaya wira Yesu aanirwa oYerusalemu,

¹³yahiwonyola makukhu a korooro, khuvenya erowaka okumana, ekhuwelaka wira: Avuwihiwe Muluku! Attottopeliwe owo onrwa mwa nsina n'Apwiya! Ni okhanle mwene a Isarayeli!

¹⁴Yesu aahimphwanya mwapuuru, khunwela, ntoko silempwaaya wira:

¹⁵Muhoove, nyuwo mwaana mwa muthiyana a oSiyoni, Mooneke: Mwene anyu onnoorwa, anwenle-ene mwaapuuru.

¹⁶Okathi uwo awiixutti awe khiyaasuwela oratta-ene masu awo. Nto numala Yesu ovolowa munttittimihoni awo tiyuupuwenly'aya wira ti siiso saalempwaly'aya mwaha wa yoowo, nave-tho ti seiyo siirihiw'awe.

¹⁷Vano, atthu othene yaari ni yoowo okathi wamwihanawe Lasaro mmahiye, amuhihimuxaka mookhwaani, yanlaleya etthu ila yoonalyaya.

¹⁸Tivo muttitthi w'atthu vaarowalyaya okumana ni Yesu, okhala wira waahiiwa ethonyeryo eyo yiiralyawe.

¹⁹Vano aFarisi yaahihimeeryana wira: ?Munnoona va, wira khaninwery'etthu? Moone: Atthu othene animutthara yoowo!?

²⁰Mw'atthu yaronwe oYerusalemu omukokhorela Muluku mahiku a niira nle, yaahikhala-vo akereku akina.

²¹Awo yaahirowa olavulana Filipe, aari a muttetthe w'oPetisati elapo y'okalileya, khunvekela wira: Napwiya! Nimphavela omoona Yesu.

²²Filipe ahirowa omuhimeerya Antere: Owaanli aya yaahirowa omuhimeerya Yesu.

²³Yesu aahiwaakhula wira: ?Okathi w'ottittimihiwa Mwaana a Mutthu woophiya.?

²⁴Kinoohimeeryani ekhweeli wira: Epyo ya triku yamorela vathi khuhikhwa, enkhala emosaru yeeyo paahi. Vano epyo yeeyo yakhwa, ennima mihokorokho sinci-ene.

²⁵Ole omphenta ekumi awe, enoomurimeela: Vano ole ohinthokorerya ekumi awe vathi-va, onoosukerya ekumi ehinimala.

²⁶Akhala onthuna okirumeela, akitthareke. Weiwo kinikhal'aka nave-tho murumeyi aka onrowa okhalaka weiwo. Akhala mutthu onikirumeela, Atiithi anoomuttittimiha.

²⁷Vano murim'aka wookiriipa. Kihimye exeeni? ?Tiithi! Mukaakiherye okathi ula w'ohaawa?? Nto, ohaawa wenno kirwenlyaka okathi ula.

²⁸Tiithi, muttittimihe nsina nanyu! Okathi yoowo nsu nahikhuma wirimu, nihimyaka wira: ?Koottittimiha, nave kinoottittimiha-tho.?

²⁹Muttitthi w'atthu w'ari vaavale, wiiwakaru nsu nlo, waahihimya wira: Owo okukutteya! Akina yaanihimya wira: Munkelo t'omulavulinhe!

³⁰Vano Yesu aahahimeerya wira: ?Nsu nla khanirwiye mwaha wa miyo: Nikhumelenle mwaha wa nyuwo.?

³¹Woophiya okathi woolamuliwa olumwenk'ula, ni mukhulupale a elapo ya vathi onimoomoliwa.

³²Vano miyo, katthomeiwa mulaponi, atthu othene animoorwa wa miyo.

³³Alavulaka siisale, Yesu aahithonyerya makhwelo awe.

³⁴Muttitthi uwo w'atthu waahimwaakhula wira: Hiyo ninniiwa nuulumo nihimmwale muliivuruni mwa ikano wira Kristu onookhala mahiku othene. Vano muniwerya sayi ohimya wira Mwaana a Mutthu ohaana othomeiwa? Nave Mwaana a Mutthu ti pani?

³⁵Yesu aahahimeerya wira: Muthuko ori ni nyuwo nlelo okathi vakhaani. Mweetteke munari ni muthuko, wira epiphi ehoophwanyeni. Ale aneetta mweepiphini khansuwela onrowaaya.

³⁶Mukhalanaka muthuko, mwaamini muthuk'owo, wira mukhale anamwane a muthuko. Vaahimyalyawe siiso, Yesu ahivenya-vo, awo khuhimoona-tho.

³⁷Yesu aamwiraru ithonyeryo sinci-ene vamaithoni v'aYuta, awo khiyaamwaamini,

³⁸wira emaliheriwe moolumo ahimyaly'awe profeta Yesaya wira: ?Pwiya, t'ani okupanli ehapari enlaleyahu? Nave owerya w'Apwiya woonihenriwe ni pani??

³⁹Tivo awo khiyaawerya waamini okhala wira Yesaya aahihimya-tho wira:

⁴⁰Muluku ohaakhaliha oohoona, ohuumiha mirima saya. Siiso maitho aya khanoona, mirima saya khasinsuwela: Awo khanrukunuxa mirima. Nto miyo kamwaavoniha.

⁴¹Yesaya ahihimya siiso, okhala wira aahoona nttittimiho na Yesu, khulavula sa yoowo.

⁴²Vano, hata makhulupale manci-ene a aYuta yaahimwaamini, nto mwaha w'aFarisi, khiyaaisoneiha.

⁴³Yaawo waasivelexa ottittimihiwa n'atthu ovikana ottittimihiwa ni Muluku.

⁴⁴Yesu ahihimya arunyaka wira: Ole onikaamini, khanikhaamini miyo; onimwaamini ole okirumme.

⁴⁵Ole onikoona, onnimoona ole okirumme.

⁴⁶Miyo kirwiiye mulaponi-mu ntoko muthuko, wira ole onikaamini miyo ohirimeele mweepiphini.

⁴⁷Akhala mutthu oniiwa masu aka, ohineettela, nkihiyo miyo kinimulavula. Miyo nkirwenle waalamula atthu a elapo ya vathi, kirwenle oowoopola.

⁴⁸Ole onkiruna ahiniiwelela masu'aka, ookhalana mphuki awe: Masu kilaleiyaka t'anrowa omulamula nihiku nookiserya.

⁴⁹Miyo nkilavunle mmansaka. Atiithi akirumme t'akileenle saarowaka ohimya ni olaleya.

⁵⁰Nave miyo koosuwela wira sooruma saya sinniphwanyiha ekumi ehinimala. Tivo, itthu sinlaleyaka kinlaleya siisale Atiithi sikileenly'aya.