John 13

¹Nihinathi ophiya niira na Paasikha, Yesu ahisuwela wira waahiphiya okathi awe w'okhuma olumwenk'ula, arowaka w'Atiithi. Yoowo, aaphentale atthu awe yaari mulaponi, ohaphenta mpakha wookiseryani.

²Yesu aly'aka n'awiixutti awe, Satana aahimukela Yuta Isikariyoti, mwaana a Simoni wira anvarihe Yesu.

³Yesu aanisuwela wira Atiithi yaahinvahererya itthu sothene mmatatani mwawe. Aanisuwela-tho wira aakhumme wa Muluku, ni wira aamuhokolowela wa yoowo.

⁴Okathi uwo aahivenya vaaly'awe, aahirula malay'awe, aahikuxa etuwalya khutthukela muyuununi.

⁵Vano ahiitthela maasi mpasiyani, khupacerya orapiha inawu s'awiixutti awe, khinapuputtha n'ituwalya yaatthukenlyawe muyuununi.

⁶Amphwanyakaru Simoni Petru, owo aahimukoha wira: ?Pwiya, nyuwo mumphavela okirapiha inawu miyo??

⁷Yesu ahimwaakhula wira: Etthu kiniiraka, nyuwo khamunsuwela naanaano va: Munrowa osuwela ohoolo onkelelahu.

⁸Petru ahithipelela, iiraka: Nnaari! Hata mano khamunrapiha inawu saka! Yesu ahimwaakhula wira: Miyo kahoorapiheni-ru, khamumphwanela okhala ni miyo!

⁹Vano Simoni Petru ahimwiirela: Pwiya, weeso kahiyo inawu-ru paahi: Mukirapihe matata ni muru!

¹⁰Yesu ahimwaakhula wira: Ole orampe, khamphavela orapihiwa ohikhanle orapihiwa inawu paahi, tthiri owo ooreerihiwa. Vano nyuwo mooreerihiwa nto kahiyo othene anyu.

¹¹Yesu aanimusuwela ole aarowa onvariha, tivo vahimmyawe wira: ?Khamureerihiwe othene anyu.?

¹²Vamalin'haawe orapiha inawu saya, ahitthikela owara malay'awe, khukilaathi nto, khwaahimeerya wira: Nyuwo moosuwela ewirenlyakani?

¹³Nyuwo munkiirela Mwiixuttihi ni Pwiya: Mwiraka siiso, khamunvonya.

¹⁴Vano, ntoko miyo korapihalyaakani inawu.

¹⁵Tthiri miyo kihoovahani nthonyeryo, wira ni nyuwo-tho mwiireke ntoko siwirenlyakani.

¹⁶Kinoohimeryani ekhweli wira: Khaavo murumeyi okhanle muulupale onvikana Pwiy'awe, nnakhala mulipa-oorummwa muulupale onvikana ole omurumme.

¹⁷Nyuwo mwasuwela-ru itthu iya, munookhala ooreeriwa mweettelaka-ru seiya.

¹⁸Miyo nkinoohimyani othene anyu: Maana kinnasuwela ale yathanlaly'aka. Vano ehaana omaliheriwa ele elempwe wira: ?Ole onlya ni miyo, ookirukunuwela.?

¹⁹Itthu iya, miyo kinoohimeryani naanaano vaava, sihinatthi wiraneya, wira okathi sinrowaya wiraneya, mwaamini wira miyo t'ule onkhala.

²⁰Kinoolelani ekhweeli wira: Ole onimwaakhela ontthunaka omuruma, onikakhela miyo: Vano ole onkakhela miyo, onnimwakhela ole okirumme.

²¹Vaamanlyawe ohimya itthu iya, Yesu aahiriipiwa murima vanci-ene, khwaahimeerya awiixutti awe ni wilipiha wira: ?Kinoohimeeryani ekhweeli wira: Mmosa a nyuwo onookivariha.

²²Awiixutti awe yaahipacerya owehana, maana khiyaamusuwela owo Yesu aamuhimyawe.

²³Mwiixutti mmosa, yole Yesu amphentexawe, aakilaathale vakhiviru ni Yesu.

²⁴Simoni Petru aahimukwata, khumwiirela: ?Mmukohe onimuhimyawe.?

²⁵Mwiixutti uwo ahiphiterya vatthirima va Yesu, khumukoha wira: Pwiya, t'ani yoowo?

²⁶Yesu ahimwakhula wira: Ole kinrowaka orerya yoolya vakhaani, kinvaha, ti yoowo. Nto aahikuxa yoolya, aahirerya, khunvaha Yuta mwan'awe Simoni Isikaryoti.

²⁷Yuta vaminryawe yoly'eyo, Satana ahimukela. Yesu ahimwiirela: Etthu emphavel'anyu, mwire naanaano va.

²⁸W'atthu yaari vaavale, khaavo aasuwenle etthu yaamwirelenlyawe siiso.

²⁹Yuta t'asuka murupa wa musurukhu: Tivo akina yanyiherya wira Yesu aamurumme orowa othuma etthu yaaphaveliwa oniirani, wala orowa waavaha musurukhu alipa-ooh'awa.

³⁰Vano Yuta vaalyiyawe yooly'eyo, aahikhuma naanaano-ru, okathi-ene yoowo waari ohiyu.

³¹Yuta vakhumalyawe-vo, Yesu aahihimya wira: ?Okathi ula va, Mwaana a Mutthu oottittimihiwa.? Nave ?Muluku oottittimihiwa mwa Yoowo.?

³²Okhala wira Muluku oottittimihiwa mwa Yoowo, Muluku mwaneene onoomuttittimiha-tho mwa Yoowo, amuttittimihaka voohipisa.

³³An'aka, nlelo kinookhala ni nyuwo okathi vakhaani. Nyuwo munookiphavela: Vano kinoohimeeryani nyuwo-tho yeeyo yaahimenryaaka aYuta wira: ?Nipuro kinrowaaka, nyuwo khamunwerya ophiya.?

³⁴Kinoovahani nikano na naanaano: Mphentaneke mukina ni mukhw'awe. Siisale miyo kophentalyakani, siiso-tho nyuwo muhaana ophentana mukina ni mukhw'awe.

³⁵Atthu othene anoosuwela wira mwa awiixutti aka, mwaaphentanaka mukina ni mukhw'awe.

³⁶Simoni Petru ahimukoha wira: ?Pwiya, munrowa vayi?? Yesu ahimwaakhula wira: Iwo onrowaka, nyuwo khamunwerya okitthara naanaano va: Munookitthara ohoolo onkelelahu.

³⁷Petru, aahimukoha wira: Pwiya, kihinweryelani woottharani naanaano vaava? Miyo koolikanana ovaha ekumi aka mwaha wa nyuwo.

³⁸Yesu ahimwaakhula wira: Tthiri moolikanana ovaha ekumi anyu mwaha wa miyo? Kinoolelani ekhweeli wira: Muthupi ohinatthi wiipa, nyuwo munookiruna imaara tthaaru!