John 14

¹Yesu aahahimeerya awiixutti awe wira: Muhiriipiwe murima. Mmwaamini Muluku: Mukaamini miyo-tho.

²Owannyaya Atiithi aka, khareere-wo mapuro ookhala. Vahaakhanle siiso, nkoohimeeryani. Miyo kinrowa olokiha nipuro nanyu.

³Miyo karowa ni khuulokiheryani nipuro, kinoohokolowa ni kinimookuxani, wira vaavo miyo kinrow'aka okhala ni nyuwo-tho mwakhale vaavo.

⁴Vano weiwo onrowaka, nyuwo moosuwela ephiro-ene.

⁵Tome aahiira: ?Pwiya, khaninsuwela onrowaanyu. Niwerye sayi osuwela ephiro-ene yeeyo??

⁶Yesu aahimuhimeerya wira: ?Miyo k'ephiro n'ekeekhayi n'ekumi; khaavo onrowa w'atiithi ahivinre mwa miyo.?

⁷Nyuwo mwakisuwenle, mwamwaasuwela-tho Atiithi aka. Vano-tho, okhuma okathi yoola, nyuwo muhaasuwela Atiithi, hata muhaaweha.

⁸Filipe ahimwiirela: ?Pwiya! Nooniheryeni Atiithi! Vaavo vanooniphiyerya.?

⁹Yesu aahimwaakhula wira: Nyu Filipe! Kokhala mahiku manci-ene siisa ni nyuwo: Ninlelo khamunkisuwela? Ole okoonne miyo, owoonne Atiithi. Vano nyuwo munihimya sayi wira: ?Nooniheryeni Atiithi??

¹⁰Khamunaamini wira miyo kiri mw'Atiithi ni wira Atiithi ari mwa miyo? Masu kinoohimeryakani kahiyo awaka: Atiithi, ankhala mwa miyo, t'anvara miteko saya mwa miyo.

¹¹Mukaaminiki kaahimyaka wira miyo kiri mwa'Atiithi ni wira Atiithi ari mwa miyo. Mwahaamini masu aka, mukaamini mano mwaha wa miteko siniiraka.

¹²Kinoolelani ekhweeli wira: Ole onikaamini, nave owo-tho onoovara miteko sinvaraaka: Hata onoovara suulupalexa ovikana iya, maana miyo kinrowa w'Atiithi.

¹³Vano etthu p'itthu enrowanyu ovekela mwa nsina naka, miyo kinoowirelani, wira Atiithi ettittimihiwe mwa Mwaana

¹⁴Mwaakivekelaka etthu p'itthu mwa nsina naka, kinoowirelani.

¹⁵Mwaakiphentaka miyo, munimweettela soruma saka.

¹⁶Vano miyo kinimwaavekela Atiithi, yoovaheni Mulipa-ookhaliherya mukina, wira akhaleke ni nyuwo mahiku othene.

¹⁷Erooho y'ekeekhayi eyo, khanwerya waakhela atthu a vathi va. Okhala wira khanoona, nnakhala khanisuwela. Vano nyuwo munnisuwela, okhala wira eri ni nyuwo, ni enrowa okhalaka mwa nyuwo.

¹⁸Nkinoohiyani ntoko ikwaasuni: Kinoohokolowa, kookuxeeni.

¹⁹Woohala okathi vakhaani, atthu a elapo ya vathi va khanrowa okoona-tho. Nto nyuwo munookoona okhala wira miyo ka ekumi ni nyuwo munrowa okhala akumi-tho.

²⁰Nihiku nenlo, munoosuwela wira miyo kiri mw'Atiithi, ni wira nyuwo muri mwa miyo, nave miyo mwa nyuwo.

²¹Ole onaakhela ikano saka oneettela, yoowo t'onikiphenta. Vano ole onikiphenta onoophentiwa n'Atiithi: Ni miyo kinomphenta, kinimwiisuweliha wa yoowo.

²²Yuta mukina omuhiya mwan'awe Isikaryoti, aahimukoha wira: Pwiya, exeeni entthunanyu wisuweliha wa hiyo paahi, ohikhanle w'atthu othene?

²³Yesu ahimwaakhula wira: Akhala mutthu onikiphenta, onimweettela masu aka, ni atiithi anoomphenta yoowo nave miyo n'atiithi ninrowa okhala mwa yoowo.

²⁴Ole ohinikiphenta, khaneettela masu aka. Masu muniiw'anyu, kahiyo awaka: T'awaya Atiithi akirumme.

²⁵Kinoohimeeryani itthu iya, nlelo kikhalaka ni nyuwo.

²⁶Vano Mulipa-ookhaliherya, Erooho Yooreera, Atiithi anrowaaya woovelelihani mwa nsina naka, eyo enoowiixuttihani itthu sothene, enoowupuxeryani sothene sohimenryaakani.

²⁷Kinoohiyeryani murettele: Kinoovahani murettele aka. Murettele kinoovahakani khuhiyo murettele anvah'aya atthu a vathi va. Muhiriipiwe murima ni muhoove.

²⁸Muhiiwa sohimenryakani wira: ?Miyo kinoorowa ni kinootthika kikhale ni nyuwo.? Mwaakiphenta, mwamutteeliwa murima mwaha w'orowa miyo w'Atiithi: Maana Atiithi t'alupale okivikana miyo.

²⁹Kinnoohimeeryani itthu iya naanaano va, sihinathi okhumelela, wira okathi oniiraneyaya, mwaamini.

³⁰Okhuma olelo, nkinlavula-tho vanci-ene ni nyuwo, okhala wira muulupale a olumwenk'ula ohanle orwa. Nto owo kharina etthu ni miyo;

³¹vano vanreerela wira atthu othene a elapo ya vathi esuwele wira miyo kinnaphenta Atiithi, ni wira kinneetta ntoko Atiithi sikirummyaya. Venyani, nrowe!