John 15

¹Miyo ka mwiri weekeekhayi wa mukhacu: Atiithi aka mulipa-oolima.

²Iritta sothene siri mwa miyo, sihiniima mihokorokho, Atiithi anniikittha: Vano iritta sothene siniima mihokorokho, awo annireeriha wira sitepeke wiima.

³Nyuwo mooreerihiwa ni masu kolaleryakani.

⁴Mukhale mwa miyo ni miyo kinookhala mwa nyuwo, siisale eritta ehinwery'aya wiima mihokorokho meekhaya, ehikhanle va mwirini, siiso-tho nyuwo khamuniima mihokorokho mwaahikhaleke mwa miyo.

⁵Miyo ka mwiri, nyuwo mwa iritta. Ole onkhala mwa miyo, nave miyo kikhalaka mwa yoowo, owo onniima mihokorokho sowaatta. Tthiri, mwahikhale mwa miyo, khiivo enwery'anyu wira.

⁶Akhala mutthu ohinikhala mwa miyo onooriheliwa ota, alikanyihiwaka n'eritta ehiniima, ni onimuuma, nto onoottottiwa oriheliwe vamooroni ovyeeke.

⁷Nyuwo mwakhala mwa miyo, nave masu aka yakhala mwa nyuwo, nvekeleke etthu p'itthu entthunanyu: Munoovahiwa.

⁸Nttittimiho n'Atiithi aka ninnisuweliwa mwaha wa mihokorokho nyuwo siniim'anyu, nave nyuwo munookhala awiixutti aka.

⁹Ntoko Atiithi akiphentalyaya, ni miyo kihophentani siiso. Mukhaleke moophentani mwaka.

¹⁰Mwettelaka soruma saka munookhala moophentani mwaka, ntoko miyo kineettelaka soruma s'Atiithi, kinikalaka moophentani mwaya.

¹¹Kinoohimeeryani itthu iya wira otteeliwa waka murima okhale-tho wawinyu, otteeliwa wanyu murima omalele.

¹²Nikano kinoorumakani ti nla: Mphentaneke mukina ni mukhw'awe ntoko miyo koophentalyakani.

¹³Khaavo orina niphento n'ulupale ninvikana nla: Mutthu ovaha ekumi awe mwaha w'apatthani awe.

¹⁴Nyuwo munookhala apatthani aka, mweettelakaru itthu kinoorumakani.

¹⁵Nkiniwiirelani-tho arumeyi aka, maana arumeyi khansuwela siniirawe Pwiy'aya. Vano kiniwiirelani apatthani aka, okhala wira kihoosuwelihani sothene siwiiwalyaka Atiithi.

¹⁶Khamuhiyo nyuwo mukithanlale miyo: Ti miyo koothanlaleni nyuwo. Miyo kihoothanlani wira murowe mwiireke sooreera, sooreera sanyu sikhaleke mahiku othene. Wira, etthu p'itthu enavekelanyu Atiithi ni nsina naka awo animoovahani.

¹⁷Etthu enoorumaakani t'ila!: Mphentaneke mukina ni mukhw'awe.

¹⁸Atthu a vathi-va yoonyokhakani, musuwele saana wira apacenrye okinyokha miyo.

¹⁹Nyuwo mwaari atthu a vathi va, atthu awo a vathi va yamoophentani ntoko akhw'aya. Vano okhala wira nyuwo khamuhiyo atthu a vathi-va, mwaha wo woothanlani, tivo atthu awo a vathi va anoonyokhayani.

²⁰Muupuwele nuulumo nle koohimenryakani wira: ?Khaavo murumeyi okhanle muulupale onvikana pwiy'awe.? Ale yakilupantthe miyo, animoolupatthani-tho nyuwo: Ale yeettenle masu aka, animweettela-tho moolumo anyu.

²¹Vano awo anrowa owiirelani sothene iya mwaha wa nsina naka, okhala wira khanimusuwela ole okirumme.

²²Miyo kihaariiye ni kihaalavunle ni yaawo, awo nnakhala mano khiyaakhalana etampi. Nto vano, kharina nlevelelo na itampi saya.

²³Ole onkinyokha miyo, onanyokha-tho Atiithi.

²⁴Miyo kihiirale miteko vamaithoni vaya seiyo sihiiriwe ni mutthu mukina, awo khiyaakhalana etampi, nto vano ahoona miteko iyo siiraly'aka nave nlelo annikinyokha miyo n'Atiithi.

²⁵Nto aamaliheriwa masu alempwe mukanoni mwaya, wira: ?Awo yaahikinyokha vahimulattu.?

²⁶Vanrwawe Mulipa-ookhaliherya ontthunaka worumihelani ni nsina n'Atiithi, Erooho y'ekeekhayi enkhuma w'Atiithi, owo onookikhalela onamoona, okhala wira mookhala ni miyo okhuma woopaceryani.

²⁷Nyuwo-tho munookikhalela onamoona, okhala wira mookhala ni miyo okhuma woopaceryani.