John 4

¹Vano, okathi Apwiya vaasuwenly'aya wira mafarisi yaahiiwa vahimmwaka wira Yesu. Aanikhalana ni aanaapatisa awiixutti anci-ene onvikana Yohani.

²Nave, Yesu yoowo, khapatisa atthu awiixutti awe ti yapatisa.

³Vasuwenlyawe wira ahooneleliwa, Yesu ahivenya oYuteya, ahokolowelaka oKalileya.

⁴Nto aahaana ovira elapo y'oSamariya.

⁵Ekwah'awe yeeyo, ahiphiya muttetthe mmosa w'oSamariya, wihaniwa Sikari, wattamenle ematta, Yakope yanvahalyawe Yosefe, mwan'awe.

⁶Weiwo, yaahikhala ehime ya Yakope. Yesu, akhulumunwe-ene weetta, aahikilaathi mukhitte mw'ehim'eyo. Waari othana eriyari.

⁷Vano, muthiyana mmosa aoSamariya aahirwa orika maasi. Yesu aahimwirela: ?Mukivahe maasi oowurya.?

⁸Okathi uwo awiixutti awe yaaronwe omuttettheni othuma yoolya.

⁹Vano muthiyan'owo aoSamariya aahimwirela: Vaniiraneya sayi nyuwo muYuta, khiyakivekela maasi miyo, kiri muthiyana aoSamariya? Okhala wira aYuta khiyaatthunana n'aSamariya.

¹⁰Yesu aahimwaakhula wira: ?Mwaasuwenle sovaha sa Muluku ni mwaamusuwenle ole oniwirelani. ?Mukivahe maasi kiwurye?, nyuwo ti mwatthuna onvekela. Owo aamovahani maasi a ekumi.

¹¹Muthiyan'owo aahimwirela: Pwiya, nyuwo khamurina y'orikana maasi: Ehime ti yoowixa. Maasi awo makumi mphwannye vayi?

¹²Atiithi ihu Yakope aanithipela ehim'ela: Awo mmansaya yaawurya vaava, vamosa n'an'aya n'inama saya. Khino nyuwo muri muulupale onvikana Yakope?

¹³Yesu aahimwaakhula wira: ?Othene ale anwurya maasi ala, nnimwavola-tho ntthona.?

¹⁴Nto ole onrowa owurya maasi kintthunaka onvaha, khanvoliwa-tho ntthona. V'ekeekhayi, maasi anrowaaka onvaha, anookhala mwa yoowo ephattuwelo ya maasi ankhuma mpakha ekumi ehinimala.

¹⁵Muthiyan'owo aahinvekela Yesu wira: ?Pwiya, kivaheni maasi ene yaawo, wira kihivoliwe-tho ntthona, kihirweele-tho orika vaava.?

¹⁶Yesu aahimwirela: ?Rowani mwawiihane aiy'anyu, murwaane vaava.?

¹⁷Muthiyan'owo aahimwaakhula wira: ?Miyo nkirina iy'aka.? Yesu aahimuhimeerya wira: ?Moohimya saana wira: ?Nkirina iy'aka.? ?

¹⁸Okhala wira mwaahitheliwa n'alopwana athanu. Nave ole orinanyu vano, kahiyo awinyu. Siiso moohimya ekeekhayi!

¹⁹Muthiyana ahimuhimeerya wira: ?Pwiya, kinoona wira mwa profeta.?

²⁰Axitiith'ihu yaanimukokhorela Muluku vamwaako vaava: Vano nyuwo aYuta munihimya wira nipuro n'omukokhorela Muluku t'oYerusalemu paahi.

²¹Yesu aahimwaakhula wira: ?Nyuwo muthiyana, mukaamini miyo: Onoophiya okathi ohinrowaanyu waakokhorela Atiithi, nnakhala vamwaaako va, hata oYerusalemu.?

²²Nyuwo a aSamariya munnimukokhorela Muluku muhimusuwelaka; vano hiyo, aYuta, ninnimusuwela onimukokhorel'ahu, okhala wira woopowa onikhuma w'aYuta.

²³Nto onoophiya okathi nave okathi-ene woophiya oniir'aya alipa ankokhorela ekeekhayi vanrow'aya waakokhorela atiithi a muroohoni ni mw'ekeekhayi, okhala wira atiithi anaaphavela aniira siiso wira akhale alipa oowakokhorela.

²⁴Muluku Erooho, nave alipa animukokhorela Yoowo amukokhoreleke muroohoni ni mw'ekeekhayi.

²⁵Muthiyan'owo aahimuhiimeerya wira: ?Miyo koosuwela wira Moopoli, oniihaniwa Kristu, ohanle orwa. Arwa vale, onoonisuweliha sothene.?

²⁶Yesu aahimwaakhula wira Kristu owo, ti miyo kinlavula ni nyuwo.

²⁷Okathi yoowo, awiixutti awe yaahiphiya, yaahitikinihiwa: Vano khaavo amukon'he wira: Munlavulela-ni n'uwo?

²⁸Vano muthiyana ahihiya muno awe, khurowa omuttettheni, anaahimeerya atthu wira:

²⁹Nrowe mwamoone mulopwana okihimenrye sothene siiralyaka. Khino yoowo Moopoli?

³⁰Atthu awo yaahivenya omuttettheni, erowaka okumana ni Yesu.

³¹Vano-nto awiixutti awe yaanimuthipelela, yiirakha: Mwiixuttihi, lyaakani!

³²Owo aahiwaakhula wira: ?Miyo kokhalana yooly'aka, nyuwo muhinsuwelaanyu.?

³³Vano awiixutti yaanikohana, yiiraka: ?Khino orokhala omuruhenle yoolya??

³⁴Yesu aahahimeerya wira: Yooly'aka miyo, weettela otthuna wawe ole okirumme n'umaliherya miteko sawe.

³⁵Nyuwo munihimya wira: Sihanle miyeeri mixexe ophiya okathi woohepa. Nto miyo kinoohimeeryani wira nwehe oratta-ene imatta, maana mihokorokho soottokottha wira sihempwe.

³⁶Mulipa oohepha onnilinviwa, onathukumanyerya muhokorokho awe wekumini ehinimala wira mulipa oohepha otteeliweke murima vamosa ni mulipa oowaala.

³⁷Tthiri vaavo enniiraneya ekano ele enihimya wira: ?Onaala mukina, mukina anahepha.?

³⁸Miyo kihoorumani wira muhephe ele muhaalaly'anyu, akinaku avanry'aya muteko, nto nyuwo moovolowa mmutekoni mwaya.

³⁹ASamariya anci-ene a muttetthe owo yaahimwaamini Yesu, mwaha wa moolumo a muthiyan'ole, aahimy'awe wira: ?Owo ookihimeerya sothene siiralyaka.?

⁴⁰Vano, aSamariy'awo yaronwe okumana ni Yesu. Yaahinvekela wira akhale ni yaawo. Yesu ahikhala weiwo mahiku manli.

⁴¹Vano atthu anci-ene yaahimwaamini mwaha wa masu awe,

⁴²enamwiirela muthiyan'owo wira: Vano kahiyo mwaha wa masu anyu paahi nnaminaahu: Hiyo mmansihu nomwiiwa. Vano noosuwela wira veekeekhayi owo Moopoli a atthu othene.

⁴³Vavinryaya mahiku manli, Yesu aahivenya iwo, arowaka oKalileya.

⁴⁴Yesu mwaneene aahihimya wira: ?Profeta khanakheliwa oratteene mulaponi mwawe.?

⁴⁵Vano, vaaphiyaly'awe muttetthe w'oKalileya, atthu a oKalileya yaahimwaakhelela, okhala wira yaahoona itthu sothene owo siiraly'awe oYerusalemu, okathi wa niira na Paasikha, nenlo atthu awo naarowenly'aya.

⁴⁶Yesu aahiphiya-tho oKana w'oKalileya, weiwo wathatunxawe maasi, khukhala eviinyu. Muttetthe owo aahikhala mukhulupale a mwene, aarina mwan'awe mwamulopwana aawereiwa oKafarnawu.

⁴⁷Vaiwalyawe wira Yesu aahiphiya, oKalileya, akhumaka oYuteya, aahirowa okumana ni yoowo, khunvekela wira arowe oKafarnawu, anvonihe mwan'awe aahala okhwa.

⁴⁸Yesu aahimuhimeerya wira: ?Mwahooneke miiriirya ni sootikiniha, nyuwo khamunaamini.?

⁴⁹Mukhulupale owo aahimuthipelela, iiraka: ?Pwiya, murwe, mwan'aka ahinathi okhwa?

⁵⁰Yesu ahimwiirela: ?Murowe: Mwan'inyu mukumi!? Mulopwan'owo ahaamini masu yaamuhimenryawe Yesu, khuvenya, arowaka owaani.

⁵¹Eettaka siisale, aahikumana n'arumeyi awe, yaarwa omuhimeerya wira: ?Mwan'inyu mukumi!?

⁵²Owo aahaakoha iiraka: ?Ovonne okathi xeeni?? Awo yaahimwaakhula wira: ?Nsana, ovinre, ene othana eriyari, eretta ti yaamuhiyalyaaya.?

⁵³Vano, tiithi ule aahisuwela wira waari okathi yoole Yesu waamuhimenryawe wira: ?Mwan'inyu mukumi.? Tivo ahaamini, owo vamosa n'atthu othene a vatthokoni vawe.

⁵⁴Ela ti ethoonyeryo yanenli Yesu yiiraly'awe, vahokolowaly'awe oYuteya, arowaka oKalileya.