John 5

¹Numala itthu iya, nahiiriwa niira n'aYuta. Yesu aahirowa oYerusalemu.

²Muttetthe owo, vakhiviru ni mukhora wa ipwittipwitthi, naahikhala ntthiya nimosa, naarina maphiryo mathanu. Ntthiya nlo aYuta yiihana ?Petesta.?

³Mphiryo mmo mwaahikhala aretta anci-ene: Alipa oohoona, alipa ootuthunya n'alipa oorakala

⁴Awo yaalipelela otannyeya wa maasi. Tthiri munkelo a Apwiya aanikhuruwela vatthiyani okathi mukinaku, khutannya maasi. Vano, muretta aari muraaci osama mmaasini vaatannyeyaya, anivonihiwa eretta t'iretta yaamuhaaxa.

⁵Aahikhala weiwo mulopwana aamanle iyaakha miloko miraru ni thanu na ttharu awereiwaka.

⁶Yesu, vamonalyawe ampathaleene, ni asuwelaka wira aapacenrye khalayi owereiwa, ahimukoha wira: ?Munnitthuna ovona??

⁷Murett'owo ahimwaakhula wira: ?Pwiya, nkirina mutthu ookirihela vatthiyani, maasi yaapaceryaka otannyeya. Okathi oniipurulelaka mmaasini, mukina onnikhuruwela-mo kihinatthi.

⁸Yesu aahimwirela: ?Nvenye, mukuxe nrepa nanyu, mweetteke!?

⁹Naanaano-ru mulopwan'owo aahikhala mukumi, aahikuxa nrepa n'awe, khupacerya weetta. Vano nihiku nenlo naari esaapatu.

¹⁰Tivo, aYuta yaahimwiirela mulopwan'owo aavonihiwe wira: ?Olelo esaapatu: Khivantthunihiwa ottukhula nrepa nanyu!?

¹¹Owo aahiwaakhula, iirakha: Owo okivonin'he t'okiirenle wira: ?Mukuxe nrepa nanyu, mweetteke!?

¹²Vano, awo yaahimukoha wira: T'ani uwo owirenleni: ?Mukuxe nrepa nanyu, mweetteke??

¹³Ole aavonihiwe khaamusuwenle mutthu-ene, okhala wira Yesu aahikhuma nipuro nlo maana atthu khiyaareere waatta.

¹⁴Okathi mukina, Yesu aahimpwanya mulopwan'owo mpaani mwa Muluku, khumwiirela: Nyuwo moovonihiwa: Nto, muhitthikele-tho wira itampi wira ehookhumeleleni etthu ekina yootepa otakhala.

¹⁵Mulopwan'owo aahirowa waahimeerya aYuta wira Yesu t'anvonin'he.

¹⁶Tivo, aYuta yaahipacerya omulupattha Yesu, mwaha wo wira itthu iya nihiku na saapatu.

¹⁷Vano Yesu aahiwaakhula wira: Atiithi aka annivara muteko mahiku othene: Ni miyo-tho kinnivara!

¹⁸Mwaha wa moolumo ala, aYuta yaahitepa ophavela omwiiva. Okhala wira Yesu khavirikanyihale nihiku na esaapatu paahi: Owo ahihimya-tho wira Tiithi awe Muluku, ni siiso aahiilikanyiha ni Muluku.

¹⁹Vano Yesu ahaalavuliha-tho iiraka: Kinooleelani ekhweeli wira: Mwaana khanwerya wira etthu mekh'awe. Owo onniira itthu siniwonan'awe Atiithi awe yiiraka. Okhala wira sothene Atiithi awe aniiraya, nave-tho Mwaana onniira seiyo.

²⁰Maana atiithi annimphenta Mwaana, ni annimooniherya sothene siniir'aya, nave anomooniherya-tho miteko suulupale ovikana iya wira mutikinihiwe.

²¹Siisale Atiithi anahihimuxaaya atthu ookhwa, enaavaha-tho ekumi, siiso-tho Mwaana onnavaha ekumi ale onaatthunaawe.

²²Nave atiithi khanimulamula mutthu: Awo anvan'he Mwaana owerya wothene w'olamula,

²³wira atthu othene emuttittimiheke Mwaana, siisale sinattittimihaya Atiithi. Ole ohinimuttittimiha Mwaana, khanattittimiha Atiithi, yaawo amurumme.

²⁴Kinoolelani ekhweeli wira: Ole oniiwa masu aka, ni onamwaamini ole okirumme, ookhalana ekumi ehinimala. Owo khanrowa ohukhummwa: Owo oovira mookhwaani, khuphwanya ekumi.

²⁵Kinooleelani ekhweeli wira: Onoophiya okathi, okathi-ene ti yoola: Woophiya tthiri oniiraya atthu akhwiye yiiweke nsu na Mwaana a Muluku. Ale anrowa wiiwa nsu nlo, munookhalana ekumi.

²⁶Ntoko siisale Atiithi siry'aya ephattuwelo y'ekumi tthiri Atiithi mwaneene a ekumi: Siiso-tho awo aanvaha Mwan'aya okhala mwaneene a ekumi.

²⁷Atiithi aanvaha-tho Mwaana owerya woolamula, okhala wira owo Mwaana a Mutthu.

²⁸Itthu iya sihootikiniheni, okhala wira onoophiya okathi oniiraya atthu othene ari mmahiye, yiiwe nsu na Mwaana a Mutthu, ekhume mmahiye.

²⁹Ole ovanre miteko sooreera onoohihimuwa, aphwanye ekumi; vano ole ovanre miteko soonanara onoohihimuwa, aphwanye ehukhumu.

³⁰Miyo nkinwerya wira etthu mekh'aka. Miyo kinnilamula ntoko siniiwaka. Olamula waka ti wa xariya, maana nkimphavela wiira otthuna waka: Kimphavela otthuna wiira w'Ole okirumme.

³¹Miyo kaikhalelaka onamoona wa meekhaka, onamoon'aka kahiyo w'ekeekhayi.

³²Vano, ohaavo mukina onkikhalela onamoona: Miyo koosuwela wira itthu sinihimyawe sa miyo ti s'ekeekhayi.

³³Nyuwo mwahaaruma atthu orowa omukoha Yohani: Owo aahikhalela onamoona w'ekeekhayi.

³⁴Miyo nkimphavela onamoona wa mutthu: Vano kinnilavula siiso wira moopowe.

³⁵Yohani aari muthuko woopattihiwa, waamwaleela atthu: Nyuwo mwahitthuna otteeliwa murima ni muthuko awe okathi vakhaani.

³⁶Nto miyo kookhalana onamoona wuulupale ovikana onamoona wa Yohani, okhala wira miteko Atiithi sikirummyaya ovara, seiyo sinivar'aka, seiyo sinnikikhalela onamoona miyo sooniheryaka wira miyo kirummwale n'Atiithi.

³⁷Nave Atiithi yaawo akirumme, awo mmansaya tanikikhalela onamoona. Nyuwo khamunaiwe nsu naya, hata khamunoone ekhove aya.

³⁸Nave-tho moolumo aya khankhala mwa nyuwo, okhala wira khamummwaamini ole orumaly'aya.

³⁹Nyuwo munnisoma Soolempwa, muupuwelaka wira mumphwanya memmo ekumi ehinimala: Vano ti seiyo sinikikhalela onamoona.

⁴⁰Nto nyuwo khamuntthuna orwa wa miyo, wira mphwanye ekumi.

⁴¹Miyo nkintthuna nttittimiho ninrwa w'atthu.

⁴²Ohiya vo, miyo kinnosuwelani: Nyuwo khamurina mwa nyuwo ophenta wa Muluku.

⁴³Miyo kihorwa mwa nsina n'Atiithi: Vano nyuwo khamunikaakhela. Nto mukina arwa mwa nsina nawe nyuwo munnimwaakhela.

⁴⁴Munwerya sayi waamini, nyuwo munttittimihana yeenyu-ru, ni muhiphavelaka nttittimiho ninrwa wa Muluku?

⁴⁵Vano muhuupuwele wira ti miyo kinrowa woohimyani vamaithoni v'Atiithi. Monse, yoowo onimuroromelanyu, t'unrowa woohimyani.

⁴⁶Maana mwaamwaamini Monse, nave mwankaamini miyo, okhala wira Monse olempe sa miyo.

⁴⁷Vano, nyuwo muhinaamini itthu silempy'awe, muniwerya sayi waamini masu aka?