John 6

¹Numala itthu iya Yesu aahilapuwela ekhopela ekina ya nratta n'oKalileya, nenlo niihaniwa-tho nratta n'oTiperiyate.

²Muttiithi muulupale w'atthu waanimutthara, okhala wira yaanoona ithonyeryo siir'awe, aavonihaka aretta.

³Yesu aahiwela vamwaako, khukilaathi vaavo n'awiixutti awe.

⁴Niira n'aYuta, niihaniwa Paasikha, naahikhuveela.

⁵Yesu, aahivenxa muru khoona muttitthi muulupale w'atthu orwaaka okumaana ni yoowo. Vano aahimuhimeerya Filipe wira: Ninrowa othuma vayi yoolya, wira atthu ala othene elye?

⁶Ahimuhimeerya siiso, aphavelaka omweehererya Filipe: Maana yoowo aanisuwela oratte-ene satthun'awe wira.

⁷Filipe aahimwaakhula wira: Musurukhu wa itenariyo miloko miloko miili khumphiyerya othumela yoolya yowaavoha atthu.

⁸Mwiixutti awe mukina, iihaniwa Antere, munn'awe Simoni Petru, aahimuhimeerya wira:

⁹Ookhala va mwammiravo, orina mikatthe mithanu n'ihopa piili ixikhaani. Nto siniphiyerya-ni w'atthu owaatha siisa?

¹⁰Yesu ahiira: ?Mwaaleele atthu wira ekilaathi vathi.? Nipuro nenlo munyepu khiwareere. Atthu yaahikilaathi: Alopwana paahi yaahanle ophiya imiya miloko mithanu.

¹¹Yesu aahikuxa mikatthe iyo, aahimuxukhuru Muluku, khwaakawela atthu awo yaakilanthe. Aahaakawela-tho siiso ihopa. Awo yaahikhuura mpakha waaphiyerya vaatthun'aya.

¹²Othene vaavonne aya, Yesu ahiwiirela awiixutti awe: ?Muttottele mapattuxa ahanle, wira ehirimeele etthu.?

¹³Awo yaahittottela, khusariha ittanka muloko ni piili, mapattuxa yahanle ya mikatthe iyo mithanu.

¹⁴Vano atthu voonaly'aya ethonyeryo Yesu yiiraly'awe, yaahihimya wira: V'ekeekhayi, ola ti profeta yoole ontthuna orwa moolumwenkuni.

¹⁵Yesu vaasuwenly'awe wira atthu yaanuupuwela omukuxa wira emuhele omwene, aahivenya-vo, khurowa-tho omwaako mekh'awe.

¹⁶Nsuwa ntthekuwaka, awiixutti awe yaahikhuruwela orattani,

¹⁷yaahikela mukalawani, khiyalapuwela okhopela, erowaka oKafarnawu. Vailaka, Yesu iira nlelo ahirwiye okumana ni yaawo.

¹⁸Nratta naahisareya mawimpi mwaha w'epheyo yoopa n'ikuru.

¹⁹Vettihaly'aya ekalaw'eyo mpakha ikilomo thanu wala thanu na mmosa, yaahimoona Yesu eettaka vasulu va maasi, aattamelaka ekalawa nto awo yaahoova.

²⁰Vano Yesu aahahimeerya wira: Muhoove! Ti miyo!

²¹Awo yaahimwaakhelela oratta-ene mukalawani. Naanaanoru, ekalawa yaahiphiya okhopela, nipuro naarowaya.

²²Muttitthi w'atthu wahanle ekhopela ekina ya nratta, vaxiyaya, wahoona wira yaahanle ekalawa emosa paahi. Atthu yaahisuwela wira Yesu khapakhinre mukalawani vamosa n'awiixutti awe: Awiixutti yarowanse meekhaya.

²³Vano, ikalawa sikina, sikhumaka oTiperiyate, saahiphiya nipuro nenlo atthu naakhuuraly'aya mikatthe Yesu aamuxukhunrw'awe Muluku.

²⁴Atthu awo, voonalyaya wira Yesu khakhanle-wo, nnakhala awiixutti awe, yaahikela-tho ikalawa saya, khurowa oKafarnawu, emphavelaka Yesu.

²⁵Vamphwanyalyaya, ekhopela ekina ya nratta, yaahimukoha, yiiraka: Mwiixuttihi, mphiyale lini nno?

²⁶Yesu aahiwakhula wira: ?Kinoohimeeryani ekhweeli wira: Nyuwo khamunkiphavela mwaha wa ithonyeryo soonaly'anyu. Munikiphavela mwaha wa yoolya sikhuuraly'anyu, nvona.

²⁷Muhivareleke muteko mwaha wa yoolya enintta, nvareke muteko mwaha wa yoolya enikhala, envaha ekumi ehinimala, yeeyo Mwaana a Mutthu entthun'awe woovahani, okhala wira Muluku mwaneene oohela mwa yoowo ekanyeryo awe.

²⁸Vano atthu yaahimukoha wira: ?Niireke exeeni wi nivare miteko sa Muluku??

²⁹Yesu aahiwaakhula wira: Muteko wa Muluku t'ula: Omwamini yoowo Muluku omurummy'awe.

³⁰Awo yaahimukoha-tho wira: Nto nyuwo, ethonyeryo xeeni eniiraanyu, wira hiyo noone, wira niwaaminini? Nyuwo muniira miteko xeeni?

³¹Axitiith'ihu yaahilya emana moothakoni, ntoko silempw'aya wira: ?Ahaavaha okhuura olya yoolya erwiye wirimu.?

³²Yesu aahiwaakhula wira: Kinooleelani ekhweeli wira: Kahiyo Monse oovahaleni yoolya enkhuma wirimu. Atiithi aka t'anovahani yoolya y'ekeekhayi, enkhuma wirimu.

³³Yoolya enivahaawe Muluku t'ile enkhuruwa wirimu, enaavaha atthu ekumi.

³⁴Vano atthu ale yaahimwiirela: Pwiya, mahiku othene munivaheke yoolya ene yeeyo!

³⁵Yesu aahahimeerya wira: Miyo ka yoolya y'ekumi. Ole onkirweela khanrowa-tho ovoliwa etala: Ole onkaamini khanrowa-tho ovoliwa ntthona.

³⁶Nto miyo kihoohimeeryani wira: Nyuwo mokoona, nto khamunkaamini.

³⁷Ole kivahiw'aka n'Atiithi onimoorwa wa miyo nave ole onrwa wa miyo hata mano nkinimurihela ota.

³⁸Veekheekhayi, miyo nkikhurunwe wirimu wira kiireke otthuna waka: Kikhuruwenle wira kiireke otthuna wawe Ole okirumme.

³⁹Vano, otthuna wawe Ole okirumme ti nno: Wira ahikirimeele mutthu w'ale akivahaly'awe, nto kahihimuxe mookhwaani nihiku nookiserya.

⁴⁰Tthiri, etthu entthun'aya Atiithi t'ila: Mutthu ti mutthu onoomoona Mwaana, onoomwaamini yoowo, akhalane ekumi ehinimala. Vano miyo kinoomuhinimuxa mookhwaani nihiku nookiserya.

⁴¹Vano aYuta yaanimwaapa Yesu, mwaha wo wira: ?Miyo ka yoolya ekhurunwe wirimu.?

⁴²Awo yaanihimya wira: ?Nto ola kahiyo Yesu, mwaana a Yosefe? Hiyo ninnasuwela atiithi awe n'ame awe. Vano onihimya sayi wira: ?Miyo kikhurunwe wirimu??

⁴³Yesu aahiwaakhula wira: ?Muhaapeke yenyuru!?

⁴⁴Khaavo onwerya orwa wa miyo, ahithanliwe n'Atiithi akirumme: Vano miyo kinoomuhihimuxa mookhwaani nihiku nookiserya.

⁴⁵Maprofeta yaahilepa wira: ?Atthu othene animwiixuttihiwa ni Muluku.? Othene ale aniwiiwa Atiithi ni aniixuttihiwa ni yaawo, animoorwa wa miyo.

⁴⁶Eyo khenihimya wira ookhala owoonne Atiithi, maana owoonne paahi, t'ule orwiye wa yaawo.

⁴⁷Kinooleelani ekhweeli wira: Ole onikaamini, ookhalana ekumi ehinimala.

⁴⁸Miyo k'eyoolya envaha ekumi.

⁴⁹Axitiith'inyu yaahilya emana moothakoni, numala khukhwaasa.

⁵⁰Ela ti yoolya enikhuruwa wirimu, wira ole onrowa olya y'ela ahirimeele.

⁵¹Miyo ka yoolya ekumi, yeeyo ekhurunwe wirimu: Mutthu ontthuna olya yoolya ela onookhala voohimala-tho. Vano yoolya enrowaka ovaha t'irutthu aka, yeeyo entthunaka ovahererya wira atthu othene ephwanye ekumi.

⁵²Vano aYuta yaanivanyihana, yiiraka: ?Onwerya sayi ula onivaha erutthu awe wira nikhuureke??

⁵³Yesu aahahimeerya wira: Kinooleelani ekhweeli wira: Mwaahikhuureru erutthu ya Mwaana a Mutthu, nave mwaahiwuryeru ephome awe, khamunkhalana ekumi.

⁵⁴Ole onkhuura erutthu aka ni onwuurya ephome aka, ookhalana ekumi ehinimala: Vano miyo kinoomuhihimuxa mookhwaani nihiku nookiserya.

⁵⁵Tthiri, erutthu aka ti yoolya y'ekeekhayi, ephome aka ti yoowurya y'ekeekhayi.

⁵⁶Ole okhuura erutthu aka ni onwurya ephome aka, onnikhala mwa miyo, ni miyo kinnikhala mwa yoowo.

⁵⁷Atiithi yaawo arina ekumi, yaawo takirumme nave miyo kookhalana ekumi mwaha wa yaawo. Siiso-tho ole onikhuura erutthu aka onookhalana ekumi mwaha wa miyo.

⁵⁸Ela yoolya ekhurunwe wirimu: Yoolya ela khinlikana n'ile yaalyaly'aya axitiith'inyu, khukhwaasa. Ole onlya yoolya ela onookhalana ekumi ehinimala.

⁵⁹Yesu aahihimya itthu iya axuttihaka mpaani moothukumana, oKafarnawu

⁶⁰Awiixutti awe anci-ene vaamwiiwaly'aya Yesu yaahihimya wira: ?Masu ala aatepa orika. T'ani onwerya wiiwa yaala?

⁶¹Vano Yesu osuwelaka mmurimani mw'awe, wira awiixutti yanaapa mwaha wa masu awo, aahaakoha wira: Masu aka annookwattulihani?

⁶²Mankhi, mwamoona Mwaana a Mutthu awelaka wirimu, weiwo waary'awe khalayi?

⁶³Erooho tinivaha ekumi: Erutthu khina muteko. Vano masu koohimenryakani ti erooho ni ti ekumi.

⁶⁴Nto, variyari vanyu aakhala-vo akina ahinaamini. Tthiri Yesu, okhuma woopaceryani, aanasuwela yaawo yahaamini, ni aanimusuwela ole aarowa onvariha.

⁶⁵Yesu ahaahimeerya-tho wira: ?Ti vaavo miyo koohimenryakani wira khaavo onwerya orwa wa miyo kihivahiwe n'Atiithi.?

⁶⁶Okhuma nihiku nlo, awiixutti awe anci-ene yaahimuhiya, khuttharuwa wettana.

⁶⁷Vano Yesu aahaakoha awiixutti awe muloko nanli, iiraka: ?Khino nyuwo-tho muntthuna okihiya??

⁶⁸Simoni Petru aahimwaakhula wira: Pwiya, hiyo nintthuna orowa wa pani? Nyuwo mookhalana masu anivaha ekumi ehinimala.

⁶⁹Nave hiyo ninnaamini, ni noosuwela wira nyuwo mwa ooreera murima a Muluku.

⁷⁰Yesu aahiwaakhula wira miyo nkoothanlaleni nyuwo, muloko n'anli? Nave mmosa a nyuwo, Satana.

⁷¹Yesu aamuhimya Yuta, mwan'awe Simoni Isikaryoti: Okhala wira Yut'owo, mmosa a muloko nanli, t'arowa onvariha.