John 7

¹Numala itthu iya, Yesu aneetteetta elapo y'oKalileya: Khaatthuna weetteetta oYuteya, okhala wira aYuta yaaniphavela omwiiva.

²Vano, niira n'aYuta niihaniwa niira na maxaxa, nahattamela.

³Axinn'awe Yesu yaahimwiirela: Nvenye va, murowe oYuteya, wira nave awiixutti anyu yoone miteko sinvaranyu.

⁴Maana khaavo oniira aphavelaka osuweliwa, khiyavara miteko sawe wiiphini. Nyuwo, mwiiraka itthu iya, mwiireke mwisuwelihaka w'atthu othene.

⁵V'ekeekhayi, nnakhala axinn'awe khiyaamwaamini.

⁶Vano Yesu ahiwaakhula wira: Okathi aka nlelo khunatthi ophiya. Vano nyuwo, okathi t'ukathi ti wawinyu.

⁷Atthu a vathi-va khana mwaha wo woonyokhani: Nto annikinyoka miyo, maana kinniwoniherya wira miteko saya ti sonanara.

⁸Murowaseke nyuwo, oniirani, Miyo nkinrowa oniiran'iwo, okhala wira okathi aka nlelo khuphinye.

⁹Vaahimenry'awe siiso, aahihala oKalileya.

¹⁰Vano, axinn'awe vaarowalyaya oniiran'iwo, n'uwo-tho aahirowa kahiyo voosuweliwa, nto vohiisoneiha.

¹¹Vaniirani vaavo, makhulupale a aYuta yanimwaavya, yiiraka: ?Nkhi uwo ori woowi??

¹²Mmuttitthini mothene, atthu yanaapa vanci-ene mwaha wa yoowo wiphiini. Akina yaanihimya wira: ?Owo t'oreera murima.? Akina yaanivanya, wira: Nnaari: Owo oniwoototha atthu.

¹³Vano, khaavo aalavula mwaha wa Yesu vanlakani, maana atthu yaaniwoova makhulupale a ayuta.

¹⁴Eriyari ya niira, Yesu aahikela mpaani mwa Muluku, khupacerya owiixuttiha atthu.

¹⁵Makhulupale a aYuta yaahitikinihiwa, khwiiraka: Ola onsuwela sayi vanci-ene siisa, ahisomme?

¹⁶Yesu ahiwaakhula, wira: Mwiixuttiho aka khuhiyo wawaka: Onkhuma wa Muluku okirumme.

¹⁷Akhala mutthu omphavela weettela otthuna wa Muluku, onowerya woona mwiixuttiho aka waari wa Muluku, wala kaalavulaka sa mmuruni mwaka.

¹⁸Ole onlavula sawawe, onniphavela wittittimiha paahi. Nto, ole omphavela omuttittimiha ole omurumme owo t'onihimya ekhweeli: Mwa yoowo khuuvo-vo wootha.

¹⁹Kahiyo Monse oovahaleni ikano? Vano khaavo nnakhala mmosa a nyuwo oneettela ikano iyo. Nanso, mumphavelela-ni okiiva?

²⁰Muttitthi w'atthu waahaakhula wira: ?Nyuwo mwa namukhwanepa. T'ani omphavela owiivani??

²¹Yesu aahiwaakhula wira: Miyo kiirale ethoonyeryo emosa paahi, vano nyuwo othene anyu khutikinihiwa.

²²Monse ohoorumani walyiha masoma an'inyu (naari ahikanle yoowo nto ari t'axitiithi anyu akhalayi apacenrye) nave nyuwo munnimulyiha masoma mutthu nihiku na esaapatu.

²³Vano mutthu aalyihiwaka masoma nihiku na esaapatu wira ihitthekeliwe ikano sa Monse, xeeni vannanariw'anyu ni miyo mwaha woonvoniha voomalela mutthu nihiku na esaapatu?

²⁴Muhimulamule mutthu muttharaka makhalelo awe anooneya nto mmulamuleke muttharaka exariya y'ekeekhayi.

²⁵Atthu akina a oYerusalemu yaanihimya wira: Kahiyo yoola omphaveliwa wira iiviwe?

²⁶Moone ola onlavula vanlakani, nave ehinahimya etthu wa yoola, khino makhulupale arosuwela tthiri wira owo ti Kristu?

²⁷Nto Moopoli arwa khaavo ontthuna osuwela okhummy'awe nto, ola hiyo noosuwela onkhumaawe-wo.

²⁸Okathi uwo, Yesu iira axuttihaka mpaani mwa Muluku. Vano aahihimya arunyaka wira: Nyuwo munnikisuwela! Nave moosuwela onkhumaaka-wo! Nto miyo nkirwiiye vootthuna waka, ole okirumme t'ekeekhayi Yoowo nyuwo muhinimusuwel'anyu.

²⁹Miyo kinnimusuwela, okhala wira kinkhuma mwa yoowo ni ti yoowo okirumme.

³⁰Okathi uwo yaaniphavela onvara, nto khaavo anvanre, okhala wira okathi awe nlelo khiwaaphiye.

³¹Vano atthu anci-ene a muttitthi uwo yaahimwaamini. Awo yaahihimya wira: Vanrwawe Moopoli, onimwiira mitikiniho suulupale, ovikana iye siiraly'awe Yes'ula?

³²Afarisi vaawiwaly'aya atthu othene elavulaka wiiphini itthu iya sa Yesu, awo vamosa ni makhulupale a anamukuttho,

³³Yesu aahihimya wira: Nlelo kinookhala ni nyuwo okathi vakhaani. Numala kinoohokolowela wa yole okirumme.

³⁴Nyuwo munookiphavela, muhikiphwanye: Maana iwo kinrowaaka, nyuwo khamunwerya ophiya-wo.

³⁵Ayuta yaahikohana yaaworu wira: Ola ontthuna orowa vayi, hiyo ohinweryahu omphwanya? Khino ontthuna orowa w'aYuta amwarenle mmalaponi n'uwiixuttiha amalapo?

³⁶Anihimya exeeni moolumo aahimmyaawe wira: ?Nyuwo munookiphavela, muhikiphanye, maana iwo kinrowaaka, nyuwo khamunwerya ophiya-wo??

³⁷Nihiku nookiserya, nihiku nuulupalexa na niira Yesu aaheemela khuhimya wira: Akhala mutthu ovoliwe ntthona arwe wa miyo, awurye.

³⁸Ole onikaamini miyo mmurimani mwawe anoosareya maasi a ekumi, ntoko sinihimy'aya Soolempwa sa Muluku.

³⁹Ni moolumo ala, Yesu aahihimya Munepa waarowaya wakhela ale yaatthuna omwaamini. Mahiku awo, Erooho ya Muluku nlelo wira ohinatthi ovahiwa atthu, okhala wira Yesu nlelo iira ahinatthi ottittimihiwa.

⁴⁰Mmuttitthini mw'atthu awo, akina yiiwaka moolumo ala, yaanihimya wira: ?V'ekeekhayi, ola ti profeta.

⁴¹Akina yaanihimya wira: ?Ola Kristu!? Nto akina-tho yaanihimya wira: Nto Kristu Moolopi ookhala ookhuma oKalileya?

⁴²Tthiri Soolempwa khasihimmye wira Kristu onrwa wa osuulu wa Taviti, ni wira onrwa oPetheleheemu, muttetthe wa Taviti.

⁴³Siiso wahikhala ohiiwanana w'atthu mwaha wa Yesu.

⁴⁴Akina a yaawo yaaniphavela onvara: Nto khaavo anvanre.

⁴⁵Makwarta yaahihokolowela w'alupale a anamukuttho ni w'a'Farisi, khukohiwa wira: ?Muhimuruhenle-ni??

⁴⁶Awo yaahiwaakhula wira: ?Khaavo otonko olavula ntoko mulopwan'owo!?

⁴⁷Afarisi yaahaakoha wira: Nave-tho nyuwo muhotothiwa?

⁴⁸Khino ookhala mmosa muhina wa makhulupale wala nFarisi omwaaminni Yoowo.

⁴⁹Nto atthu ala ahisuwenle ikano sa Monse aatakhalihiwa ni Muluku

⁵⁰Vano Nikotemu, mmosa a aFarisi, yole aronwe khalayi olavula ni Yesu, aahahimeerya wira:

⁵¹Khino ikano sahu sinimutthukwela mutthu ahipacenrye toko wiiwiwa n'usuweliwa siiralyaawe?

⁵²Awo yaahimwaakhula, wira: Ni nyuwo-tho mwa muKalileya? Musomeke oratteene soolempwa munoosuwela wira khaavo profeta onkhuma oKalileya!

⁵³Vano, khula mutthu aahivenya arowaka owannyawe.