John 8

¹Nto Yesu aahirowa omwaako wihaniwa Olivera.

²Vaxakaru, aahipeherya ahokolowelaka mpaani mwa Muluku. Atthu othene yaahimwattamela. Yesu ahikilaathi, khupacerya owiixuttiha.

³Vano, awiixuttihi a ikano n'aFarisi yaahimuruuhela muthiyana mmosa, aphwanyiwe araruwaka; yahimwemexa muthiyan'owo eriyari y'atthu,

⁴khumuhimeerya Yesu wira: Pwiya, muthiyan'ola ophwanyeriwe araruwaka.

⁵Ikano sa Monse sinniruma owiiva ni maluku athiyana siisa. Mankhi nyuwo munihimya-ni?

⁶Awo yaamukonhe siiso wira emwehererye, ephavelaka mulattu w'omotherya. Nto Yesu ahuurama, khukelela olepa vathi n'ikatha.

⁷Atthu awo athipelelaka omukoha, Yesu aheemela khwaahimeerya wira: ?Akhala mutthu a nyuwo ohirina etampi, yoowo akhale muraaci onvonya nluku muthiyan'ola.?

⁸Ahuurama-tho, anavira alepaka vathi.

⁹Vaaiwaly'aya moolumo ala, awo yaahiweha wira yaari anatampi khupacerya ovenya-vo, mmosa mmosa epaceryaka anakhulu mpakha ale ookiserya oyeva, khuhala Yesu paahi ni muthiyan'owo.

¹⁰Yesu aheemela oratteene khuhimoona mutthu, ahikhanle muthiyan'owo mekhaawe nto aahimukoha wira: ?Muthiyana, atthu ale ari vayi? Khaavo oohukhummuni?

¹¹Khwaakhula wira: ?Khaavo, Pwiya.? Yesu aahimuhimeerya wira: ?Nave ni miyo-tho nkinohukhumuni. Murooke: Muhittheke-tho.?

¹²Yesu ahilavulana-tho atthu awo, wira: ?Miyo ki muthuko w'olumwenku. Ole onkitthara khaneetta-tho mweepiphini: Owo onookhalana muthuko w'ekumi.

¹³Afarisi yaahimuhimeerya wira: ?Nyuwo muniikhalela onamoona mmansinyu: Onamoon'anyu khuhiyo w'ekeekhayi!?

¹⁴Yesu ahiwaakhula wira: ?Hata kiikhalelaka onamoona kimwaneene, onamoon'ak'ola ti w'ekeekhayi, okhala wira miyo kinnisuwela okhumalyaaka ni onrow'aka! Vano nyuwo khamunsuwela okhumaly'aka, ni onrow'aka.?

¹⁵Nyuwo munlamula muttharaka itthu s'erutthu: Miyo nkinimulamula mutthu.

¹⁶Nto miyo kaalamulaka, olamula waka ti w'ekeekhayi, okhala wira nkinlamula mekhaka; kinlamula ti miyo vamosa n'Atiithi akirumme.

¹⁷Nave ikano sanyu sinihimya wira onamoona w'atthu anli ti w'ekeekhayi.

¹⁸Vano, miyo kinniikhalela onamoona mmansaka, nave Atiithi akirumme annikikhalela-tho onamoona.

¹⁹Awo yaahimukoha wira: ?Atiith'inyu ari vayi?? Yesu aahiwaakhula wira: Nyuwo khamunkisuwela, nnakhala khamunaasuwela Atiithi. Mwaakisuwenle miyo, mwamwaasuwela-tho Atiithi.

²⁰Yesu ahihimya moolumo ala axuttihaka mpaani mwa Muluku, vakhiviru wa nipuro na muhakhu. Khaavo anvanre, okhala wira okathi awe nlelo khiwaaphiye.

²¹Yesu ahaahimeerya-tho wira: Miyo kinoorowa. Nyuwo munookiphavela, nto munimookhwa mutampini mwanyu. Weiwo onrowaaka, nyuwo khamunwerya orowa-wo.

²²Ayuta yaanikohana wira: Khino onrowa wiisiva? Maana onihimya wira: ?Weiwo onrowaaka, nyuwo khamunwerya orowa-wo.?

²³Yesu aahahimeerya wira: ?Nyuwo mw'atthu a vathi-va: Miyo ki mutthu a wirimu. Nyuwo mw'atthu a moolumwenkuni-mu: Miyo nkihiyo oolumwenku yoola.

²⁴Tivo miyo kohimenryakani wira: ?Nyuwo munimookhwa mutampini mwanyu.? Maana mwahaamini wira miyo t'ule onkhala, vekeekhayi munimookhwa mutampini mwanyu.

²⁵Awo yaahimukoha wira: ?Nyuwo mwa pani?? Yesu ahiwaakhula wira: Miyo ti y'ole kohimenryaakani okhuma woopaceryani.

²⁶Miyo kihaana itthu sinci-ene soohimya mwaha wa nyuwo ni woolamulani, nto ole okirumme t'ekeekhayi nave itthu seiyo simwiiwaly'aka ti seiyo sinlaley'aka mulaponi.

²⁷Awo khiyaasuwenle wira aalavulela mwaha w'Atiithi.

²⁸Tivo, Yesu ahaahimeerya-tho wira: Okathi onrowanyu omuthomeya Mwaana a Mutthu, munoosuwela wira miyo t'ule onikhala ni wira miyo nkiniira etthu mekhaka: Miyo kinihimya itthu sikixuttihaly'aya Atiithi.

²⁹Ole okirumme ori ni miyo: Khakihiyale mekhaka, maana mahiku othene miyo kinniira itthu sinimusivela.

³⁰Vaalavunly'awe siiso, atthu anci-ene yaahimwaamini yoowo.

³¹Vano Yesu aahahimeerya aYuta yaamwaamini wira: Nyuwo mwaiwelelaka masu aka, veekeekhayi munookhala awiixutti aka.

³²Munoosuwela ekeekhayi, vano ekeekhayi yeeyo enimootaphulani.

³³Awo yaahimwaakhula wira hiyo n'osuulu w'Aparahaamu khinnakhale ipottha sa mutthu, nto nyuwo munihimya sayi wira munootaphuliwa?

³⁴Yesu aahahimeerya wira: Kinooleelani ekhweeli wira: Othene ale aniira etampi, t'akhanle ipottha s'etampi.

³⁵Epottha khinkhala vatthokoni mahiku othene: Mwaana t'onkhala-vo mahiku othene.

³⁶Tivo, Mwaana ootaphulani veekeekhayi munookhala ootaphuwa.

³⁷Miyo koosuwela wira mwa osuulu w'Aparahaamu. Vano mumphavela okiiva okhala wira masu aka khakhanle mwa nyuwo.

³⁸Miyo kinnihimya itthu soonalyaaka w'Atiithi: Nave nyuwo munniira itthu soonaly'anyu wa tiith'inyu.

³⁹Vano yaahimuhimeerya wira: ?Tiith'ihu t'Aparahaamu!? Yesu aahahimeerya wira: ?Mwaari aana a Aparahaamu, nvareke miteko sivanry'awe Aparahaam'uwo.

⁴⁰Nto nyuwo mumphavela okiiva miyo koohimenryeni ekeekhayi emwiiwalyaka Muluku. Aparahaamu khiirale etthu ila.

⁴¹Nyuwo munnivara miteko sa tiith'inyu. Awo yahimwaakhula wira: ?Hiyo khanihiyo aana ooraruwiwa. Hiyo nrina tiiith'ihu mmosa paahi: Muluku!?

⁴²Yesu aahahimeerya wira tthiri Muluku aari Tiith'inyu, veekeekhayi mwamukiphenta, okhala wira miyo kikhumme wa Muluku, ni kiri va, nave nkirwiye vootthuna waka nto yoowo tokirumme.

⁴³Nyuwo khamunsuwela sinihimy'aka okhala wira nyuwo khamunwerya wiiwa masu aka.

⁴⁴Nyuwo mw'atthu a Satana, yoowo okhanle tiith'inyu: Nyuwo munnitthuna wira sintthunawe tiith'iny'uwo. Owo ti mulipa-oowiiva okhuma woopaceryani. Owo khanakhale n'ikeekhayi, okhala wira mwa yoowo khiivo ekeekhayi. Owo Oothaka, onneettela makhalelo awe: Maana owo mulipa-owootha ni tiithi a wootha.

⁴⁵Vano miyo kinlavula ekhweeli: Tivo nyuwo muhinkaaminanyu.

⁴⁶T'ani a nyuwo onwerya okiphwanyana etampi? Vano, miyo kihimyaka ekhweeli, muhinkaaminela-ni?

⁴⁷Ole ori a Muluku onniiwa masu a Muluku tivo khamuniiwa sinihimy'aka okhala wira khamuhiyo atthu a Muluku.

⁴⁸Ayuta yaahimuhimeerya wira: Hiyo khannotha naahimyaka wira mwa muSamariya ni wira muri ni munepa wootakhala!

⁴⁹Yesu ahiwaakhula wira: Miyo nkirina munepa wootakhala! Miyo kinattittimiha Atiithi: Nto nyuwo khamunikittittimiha.

⁵⁰Miyo nkimphavela wiittittimiha, ookhala onkittittimiha ni onkilamula.

⁵¹Kinoohimeeryani ekhweeli wira: Akhala mutthu oneettela masu aka khanrowa okhwa wa mahiku othene.

⁵²Ayuta yaahimuhimeerya wira: Vano noosuwelexa wira muri ni munepa wootakhala. Aparahaamu ohookhwa, nave-tho maprofeta aakhwasa. Vano nyuwo munihimya sayi wira: Ale aneettela masu aka, khanrowa okhwa-tho?

⁵³Tiith'ihu Aparahaamu ohookhwa: Nyuwo muniikhaliha muulupale onvikana yoowo? Hata maprofeta ahookhwa: Nto nyuwo mwa pani?

⁵⁴Yesu ahiwaakhula wira: Miyo kaittittimihaka mmansaka, nttittimiho naka khanihiyo etthu. Atiithi tankittittimiha, yaawo munahimyanyu wira Muluku anyu.

⁵⁵Nto nyuwo khamunimusuwela: Ti miyo kinimusuwela. Kahimya wira nkinimusuwela, kinookhala ntoko nyuwo, anawoothe. Vano miyo kinnimusuwela, kinneettela masu awe.

⁵⁶Aparahaamu, tiith'inyu aahitteliwa murima aroromelaka woona nihiku naka: Oohoona tthiri, khusareya otteeliiwa murima.

⁵⁷Ayuta yaahimukoha wira: Nyuwo nlelo khamunatthi ophiya iyaakha miloko mithanu: Mmonne sayi Aparahaamu?

⁵⁸Yesu ahiwaakhula wira: Kinooleelani ekhweeli wira: Aparahaamu ahinatthi okhala, miyo t'ule onkhala.

⁵⁹Naanaanoru yaahittotta maluku wira envonyakase: Nto Yesu ahiipitha, khukhuma mpaani mwa Muluku.