Luke 1

¹Atthu anci-ene yaahiphavela omulepa wahala a itthu s'akhumelenle eriyari ahu,

²ntoko s'anihimeery'aya ale y'akhanle anamoona okhuma woopaceryani, akhalihiwa arumeyi a Ehapari Yooreera.

³Ni miyo-tho vaakohakohaly'aya oratta-ene itthu sothene s'akhumelenle okhuma woopaceryani, nto kihuupuwela wira ti yooreera wolepelani vootthokiheya kinoophentakani Tiofilo,

⁴wira musuweleke ekeekhayi ya moolumo yaawo aixuttihiw'anyu.

⁵Okathi wa Heroti, mwene a elapo y'oYuteya, aahikhala namukuttho, iihaniwa Sakariya a nloko n'Apwiya, nave mwar'awe aaitthaniwa Isapeli, a nloko n'Arawu.

⁶Oowanli aya yaari anaxariya vamaithoni va Muluku, y'anettela Soruma sothene n'ikano sa Muluku, ehivonyaka.

⁷Nto khiyaarina anamwane, okhala wira Isapeli khaayara, nave oowanli aya y'ahuuluvala.

⁸Nihiku nimosa, Sakariya onari mpaani mwa Muluku ovaraka muteko awe w'onamukuttho maana waari mukwah'awe.

⁹Ntoko s'alimalenly'aya anamukuttho ohaaveryana eparakha wi emoone ti pani aarowa ovolowa mpaani mwa Muluku wira, apaherye-mo erupani. Okathi yoowo eparakha y'ammorenle Sakariya.

¹⁰Okathi uwo wapahery'awe erupani atthu yahanle ota avekelaka.

¹¹Sakariya onari memmo aahimukhumelela munkelo a Apwiya emenle-ene moono wolopwana w'altaari a erupani.

¹²Sakariya vaamoonaly'awe munkel'owo, aahituthuwa vanci-ene ni woova.

¹³Nto munkelo w'ahimuhimeerya wira: Nyuwo Sakariya, muhoove! Muluku ohiiwa mavekelo anyu. Mwaarinyu Isapeli onimooyarelani mwaana mwamulopwana, yoowo onrow'anyu onvaha nsina na Yohani.

¹⁴Wanimoosivelani ni wotteelihani murima, nave atthu anci-ene anootthapa mwaha w'oyariwa wawe.

¹⁵Tivo owo onookhala muulupale vamaitthoni va Muluku, khonrowa owuryaka eviinyu, nnakhala soowurya sikina sinihapala, onoosareya Erooho Yooreera okhuma mmurimani mwa amey'awe.

¹⁶Owo onimwarukunuxa murima atthu anci-ene a Isarayeli wira yaatthareke Apwiya Muluku aya.

¹⁷Owo onrowa weettaka ohoolo w'Apwiya, osareiye-ene Erooho n'uwerya ntoko owerya w'Eliya, wira orukunuxe mirima s'asitiithi yaataneke n'an'aya ni wira arukunuxe mirima s'atthu oohiiwelela etthareke miruku s'anaxariya, siiso onoorowa waalokiherya atthu wira ewaakhele Apwiya.

¹⁸Nto Sakariya aahimukoha munkelo wira: ?Kinrowa osuwela sayi etthu ila? Woona miyo kihuuluvala, nave amwar'aka ahuuluvala.?

¹⁹Munkelo aahimwaakhula wira: Miyo ki Kapiriyeli, kinkhala ohoolo wa Muluku, kinimurumeel'aka. Yoowo t'okirumme olavula ni nyuwo, wira koohimeeryeni Ehapar'ila Yooreera.

²⁰Nyuwo khamunaamini moolumo aka, nto itthu iya sihimyaly'aka sinimwiiraneya waphiya okathi aya. Mwaha w'ohaamini nyuwo munookhala muhilavulaka, mpakha nihiku ninrow'aya wiiraneya itthu iya.

²¹Nave atthu yiira enwehereryaka Sakariya yaanitikinihiwa mwaha w'opisa wawe mpaani mwa Muluku.

²²Nto vaakhumaly'awe, khaawenrye waalavuliha atthu awo, nave awo y'ahisuwela wira yokhala y'onaly'awe mpaani mwa Muluku. Sakariya aamuthoonyasa paahi ahilavulaka.

²³Sakariya vaamalihaly'awe muteko awe mpaani mwa Muluku, aahihokolowela owaani.

²⁴Vaaviraly'aya mahiku vakhaani, Isapeli aahirupala nto khaakhumme vate vawe mpakha miyeeri mithanu vano aahihimya wira:

²⁵?Apwiya aakireerela murima, awo akuupuwela wira amalihe ehaaya y'arinaka ohoolo w'atthu.?

²⁶Mweeri wa neethanu na mosa, Muluku aahimuruma munkelo Kapiriyeli orowa muttetthe w'oKalileya, wiitthaniwa Nasareti,

²⁷Omphwanya mwali mmosa aakameliwe ni mulopwana mmosa iihaniwa Yosefe, a nloko na Taviti. Nsina na mwali uwo naari Maria.

²⁸Munkelo aahikela khumwaattamela, nto khumuhimeerya wira: Mutteeliweke murima, nyuwo moothanliwa ni Muluku, Apwiya ari ni nyuwo, oottottopeliwa ti nyuwo w'athiyana othene.

²⁹Maria, vaaiwaly'awe masu ala, aahituthuwa, vanci-ene: ?Khupacerya wuupuwela moolumo ala exeeni yaahimy'aya, iiraka? nikhomaso xeeni nla?

³⁰Vano Munkelo aahimuhimeerya wira: ?Maria muhoove: Moophwanya mahala ohoolo wa Muluku.?

³¹Munoorupala mmuyare Mwaana mwamulopwana yoowo munonvaha nsina na Yesu.

³²Mwaan'owo onookhala muulupale, onimwiitthaniwa Mwaana a Muluku a Wirimu-rimu. Apwiya Muluku anonvaha omwene wa Taviti tiithi awe.

³³Owo onrowa weettiherya voohimala-tho nloko na Yakope, nave omwene awe khunrowa omala.

³⁴Nto Maria aahimukoha munkelo wira: Sinrowa wiiraneya sayi sihimyaly'anyu, miyo kihimusuwelaka mulopwana?

³⁵Munkelo aahimwaakhula wira: Erooho Yooreera enimookhuruwelani, owerya wa Muluku a wirimu-rimu onimoohuruwelani ni muuttutthi aya, ti vo Mwaana Ooreera murima onrow'anyu omuyara, onamwiitthaniwa Mwaana a Muluku.

³⁶Nave-tho munninyu Isapeli orimuuluvalaru, oorupala, ola mweeri wa neethanu na mosa okhuma mweeri orupanly'awe, yoowo iireliwa khaniyara.

³⁷Okhala wira Muluku khiivo etthu enooceel'awe.

³⁸Nto Maria aahiira: Miyo kiri va, murumeyi a Apwiya, yiireyeke mwa miyo ntoko sihimmy'anyu. Vano munkel'owo aahimuhiya khurowa.

³⁹Mahiku awo Maria aahivenya, khurowa ni wakuva omwaako, muttetthe w'oYuteya.

⁴⁰Aahikela mpaani mwa Sakariya, khumukhomasa Isapeli.

⁴¹Nto Isapeli aiwakaru nikhomaso na Maria, mwaana aari mmirimani mwawe aahitannyeya. Isapeli aahisareya Erooho Yooreera.

⁴²Aahilavula akhuwelaka, khuhimya wira: Oottottopeliwa ti nyuwo mw'athiyana othene ni oottottopeliwa mwaana ori mmirimani mwanyu.

⁴³Vano miyo ki pani oowira ame aya Apwiy'aka arweeke okixekurya!

⁴⁴V'ekeekhayi kirimwiira kiiwakaru nikhomaso nanyu, mwaana orin'aka mmirimani-mu ootannyeya n'utteeliwa murima.

⁴⁵Ooreeriwa t'ule aaminni okhala wira sinimwiiraneya itthu sothene sihimeeriw'awe n'Apwiya.

⁴⁶Nto Maria aahiipa iiraka: Murim'aka onnattittimiha Apwiya

⁴⁷nave onnitthapa n'usiveliwa mwaha wa Muluku Moopoli aka

⁴⁸Okhala wira owo ookiweha miyo, murumeyi awe oowiyeviha! V'ekeekhayi okhuma olelo vaava atthu a maloko othene anrowa okiihanaka ooreeriwa

⁴⁹Maana Oowerya Sothene ookiirela miyo itthu suulupale; Owo nsinan'awe ti Oreera Murima.

⁵⁰Mahiku othene Owo onnaamorela ikharari ale othene animoova.

⁵¹Owo onniira itthu soowerya n'ikuru sawe ohaamwarexa atthu oowiisoona.

⁵²Onniwaakha omwene atthu oowerya nave onniwinnuwiha ale aniiyeviha

⁵³ohaasarihela sooreera alipa oovoliwa etala nave onniwoomola athaaciri matataru.

⁵⁴Oomukhaliherya Isarayeli murumeyi awe oomuupuwela yoowo ommorelaka ikharari.

⁵⁵Ntoko saahimeeraly'awe axitiithihu wa Aparahaamu ni osuulu awe wa mahiku othene.

⁵⁶Maria aahikhala n'Isapeli mpakha mahiku ahalaka vakhaani ophiyerya myeeri miraru.

⁵⁷N'ahiphiya nihiku Isapeli n'arow'awe oyara, aahimuyara mwaana mwamulopwana.

⁵⁸Anamwattamanani awe n'amusi awe, esuwelakaru wira Apwiya aamureerela murima vanci-ene, y'ahitteeliwa murima, khurowa otthapa vamosa ni yoowo.

⁵⁹Vano mwaana owo vaaphiyenry'awe mahiku mathanu ni mararu y'ahirowa omunnuwiha, ni yaaniphavela onvaha nsina na tiithi awe, Sakariya.

⁶⁰Nto mam'awe aahahimeerya wira: ?Nnaari! Iihaniweke Yohani.?

⁶¹Y'ahimwaakhula wira: ?Moomusini mw'anyu khaavo oniihaneliwa nsina nlo!?

⁶²Nto yaahimukwata tiithi awe, khumukoha nsina naatthun'awe onvaha mwan'awe.

⁶³Sakariya aahiihaniha nipawe khulepa wira: ?Nsina nawe Yohani.? Nto atthu othene y'ahitikinihiwa.

⁶⁴Naanaanoru, eyano ya Sakariya y'ahitthukuwa, nlumi nawe n'ahitaphuwa, owo aahipacerya-tho olavula, khumuttottopela Muluku.

⁶⁵Vano anamwaattamanani awe othene y'ahitikinihiwa ni woova. Nave ihapari iya s'ahilaleiwa omiyakoni wothene w'oYuteya. Numala Maria aahihokolowela owaani.

⁶⁶Nave atthu othene yaiiwa ihapar'iya y'anisuka mmurimani mwaya, y'upuwelaka. Nave y'aniikoha wira: Khino mwaana ole onrowa okhala pani? Vekeekhayi owerya wa Muluku w'ari ni yoowo.

⁶⁷Nto Sakariya tiithi awe mwaana owo, aahisareya Erooho Yooreera, khupacerya wiipa sa Muluku, ahimyaka wira:

⁶⁸Oottottopeliwa t'Apwiya Muluku a Isarayeli, okhala wira awo aaxekurya ni aawoopola atthu aya.

⁶⁹Awo aaniruuhela eriyari ahu Moopoli oowerya okhumme nloko na Taviti murumeyi aya.

⁷⁰Ntoko s'aroromelihaly'aya okhuma woopaceryani w'olumwenku muhina wa moolumo a maprofet'aya ooreera murima,

⁷¹wira anaakiherye awanan'ihu ni mmatatani mw'ale othene anninyokha

⁷²ni wira yaamorele ikharari axitiith'ihu ni wuupuwela waataana wooreera waapakaly'aya.

⁷³Ni nattiri Muluku aamwiirenly'awe Aparahaamu tiith'ihu,

⁷⁴wira aarowa onaakiherya awanan'ihu wi niweryeke omurumeela nihoovaka etthu,

⁷⁵nikhalaka atthu ooreera murima woomalela ni a xariya vamaithoni vawe mahiku othene a ekumi ahu.

⁷⁶Nave nyuwo mwanamwane muni mwiihaniwa profeta a Muluku a wiirimu-rimu maana onoorowa ohoolo w'Apwiya wira mwaalokiherye iphiro saya.

⁷⁷Onrowa waalaleerya woopowa atthu awe weiwo onrwa muhina wooleveleliwa itampi

⁷⁸Mwaha wa murima w'othunku wa Muluku ahu yoowo onimoorwa onixekurya ntoko nsuwa na voosiiso, wirimu-rimu.

⁷⁹Wira aamwaleele ale ankhala mweepiphini ni mmuttutthini mwa mookhwaani ni oneettiherya mavalu ahu mphironi mwa murettele.

⁸⁰Nave mwaan'owo aaninnuwa mweerutthuni ni muroohoni. Aahikhala moothakoni mpakhala nihiku naisoonihenry'awe w'atthu Isarayeli.