Mark 16

¹Nummala ovira esaapatu, Maria a oMatala, ni Maria mam'awe Yakopo, ni Salome yaahithuma makhura oowunkhela wira erowe yattikitthele murutthu wa Yesu.

²Tivo ettiminku voosiisu nikhumaka nsuwa, yaahirowa omahiye.

³Erowaka mphironi yaanikohana mukina ni mukhw'awe wira: Taani onrowa onipirikixiha nluku nle va mukhora va nihiye?

⁴Okhala wira nluku nlo naari nuulupalexa. Vano vaaphiyaly'aya, yaahoona wira nluku nto naahipirikixeliwa okhwipi.

⁵Yaahikela mmahiye nave yahimoona mmiravo akilanthe-ene moono woolopwana, awanre ikuwo sootteela. Yaahituthuwa vanci-ene,

⁶vano mmirav'owo aahahimeerya wira: Muhituthuwe! Mwaarwenle omphavela Yesu a oNasareti aakhomeliwe va mwiikimanyo, owo oohihimuwa. Khaamo-mu. Mooneke nipuro naaixaathiw'awe.

⁷Vano murowe mwaahimeerye awiixutti awe ni Petru wira Owo onoohoola orowa oKalileya. Weiwo munomphwanya ntoko soohimenryaaweni.

⁸Athiyan'awo yaahikhuma omahiye niwaakuva, etthyawaka, okhala wira yaahituthuwa ni woova, nave khuuvo yaamuhimeeryaly'aya etthu maana yamoova.

⁹Numala ohihimuwa, Yesu aahiisooniherya ettiminku voosiisu opacerya wene ni Maria Matala, mwa yoowo oomonly'awe minepa sootakhala mithanu namiili.

¹⁰Maria a oMatala aahirowa waleela ehapar'ila awiixutti yeentte ni Yesu, yaawo yaari ooriipiwa murima ni yaanla.

¹¹Okathi awo yaaiwaly'aya wira Yesu mukumi ni wira muthiyan'owo aahimoona, khiyaakupanli.

¹²Numala, aahisooniherya wa makhalelo makina w'ale anli yaakhuma mmuttettheni.

¹³Awo naanaano-ru yaahirowa olaleya Ehapar'iyo w'awiixutti akina, nnakhala-tho yaala khiyaakupanli.

¹⁴Vookiserya, Yesu aahisooniherya w'ale muloko ni mmosa, okathi waaly'aya. Ahaapwapwela mwaha woohaamini waya n'ulipa murima, maana khiyaakupanli ale yaamonne ahihimuwale-ene.

¹⁵Numala aahahimeerya wira: Murowe mulaponi mothene mwaalaleerye atthu othene Ehapari Yooreera.

¹⁶Ole onrowa waamini khupasitiwa onimoopowa, nto ole ohinrowa waamini onoolamuliwa.

¹⁷Ale anrowa waamini anrowa osuwanyeihiwa ni ithoonyeryo iya: Mwa nsina n'aka enaamoomola minepa sootakhala nave enaamulavula ilavulelo isya.

¹⁸Yavara enowa wala yawurya murette oniiva khinaakhumelela etthu yootakhala. Nave yawiixaatherya matata aretta ala anoopenuwa.

¹⁹Vaamanly'awe olavula n'awiixutti, Yesu aahiwela wirimu, weiwo okilaanthy'awe moono woolopwana wa Muluku.

²⁰Nto awiixutti tthiri yaahirowa olaleerya Ehapari Yooreera mulaponi moothene. Nave Apwiya yaanaakhaliherya muhina mwa masu aya ni sootikiniha siir'aya nihiku nnihiku.