Mark 15

¹Vaaxiiy'aya vaasiisu-ene, makhulupale a anamukuttho yaahithukumana ni mahumu, n'awiixuttihi a ikano ni makhulupale akina alipa-oophuka milattu, evaanelelaka mwaha wa Yesu. Vano yaahimutthukwa Yesu enarowa onvahererya Pilato.

²Nave Pilato aahimukoha Yesu wira: ?Tinyuwo mwene a aYuta?? Yesu aahimwaakhula wira: ?Nyuwo moohimya.?

³Okhala wira makhulupale a anamukuttho yaanimootherya Yesu itthu sinci-ene,

⁵Vano Yesu khaakhunle hata etthu nto Pilato vaahimutikiniha vanci-ene.

⁶Vaahilimaleliwa okathi wa niira na Paasikha, Pilato waataphulela atthu mmosa a alipa ootthukeliwa yoowo yaanvekel'aya.

⁷Vano aahikhala mmosa, iihaniwa parapa aatthukeliwe vamosa n'alipa ookhootta nlamulo n'elapo yaamwiinve mutthu okathi waakumihery'aya manyakunyaku.

⁸Nave atthu ekhuwelaka, yaahipacerya ovekela wira yiireliwe ntoko saalimalenly'aya wiireliwa.

⁹Vano Pilato aahaakoha wira: ?Munnitthuna wira miyo kootaphuleleni mwene a aYuta??

¹⁰Okhala wira Pilato anisuwela oratta-ene wira makhulupale a anamukuttho yaahinvahererya Yesu mwaha wa nrima.

¹¹Nto makhulupale a anamukuttho yaanikhalela nthiti waaleela atthu wira envekele Pilato wira amutaphule parapa.

¹²Pilato nlelo aahaahoka wira: ?Vano nto kimwiirihe exeeni mulopwan'ola munimwiihan'anyu mwene a aYuta??

¹³Nave muttitthi w'atthu waanikhuwela wiiraka: ?Mmukhomele va mwiikimanyo!?

¹⁴Pilato aahitthikela-tho wakoha iiraka: Nto exeeni; otthenkeni yoola? Vano awo yaamutepa okhuwela n'ikuru yiiraka: ?Mmukhomele, mmukhomele.?

¹⁵Nto Pilato aahimutaphula Parapa maana aaphavela waasiveliha atthu ale. Numala aahiruma wira Yesu amaniwe nave aahaavahererya wira yaamukhomele va mwiikimanyo.

¹⁶Vano-tho yaanimmana ni muthali vamuru, emusenelaka, yaanikokhora emulemelihaka.

¹⁷Yaahinwariha Yesu mukhumi woxeerya nave yaahuupa ekhara ya miiwa khunwariha mmuruni,

¹⁸khupacerya omukhomasa yiiraka: ?Mooxeleliwa mwene a aYuta!?

¹⁹Okathi-ene yoowo yiira emmanaka n'ikopo va muru, emusenelaka nto khunamukokhorela ohoolo w'awe ntoko wira anoomurumeela.

²⁰Numala onveeha, yaahimurula mukhumi woxeerya khunwariha-tho soowara s'awe. Ottharelana w'aya yaahinvenxa vale Yesu wira yamukhomele.

²¹Erowaka mphironi yaahikumana ni mulopwana mmosa aakhuma omatta w'awe. Anakhotto yaahinvara khumukhanyereriha omukuxerya Yesu mwiikimanyo. Mulopwan'owo iihaniwa Simoni a oKireni tiithy'awe Alexantere ni Rufu.

²²Yaahimuroiha Yesu nipuro niihaniwa ?Kolkota?, eyo piyo: ?Muru ohanle makhuva-ru.?

²³Nave yaahinvaha eviinyu yootakaaheriwa emiira wira awurye, nto owo khuhiwurya.

²⁴Voottharelana yaahimukhomela va mwiikimanyo. Vano yaahikawana soowara sa Yesu, numala waaverya eparakha wira yoone yaarow'awe okuxa khula mutthu.

²⁵Waari okathi wa iwoora thannaxexe sa voosiisu vaamukhomenly'aya va mwiikimanyo.

²⁶Nipawena na mulattu wo wiiviwa w'awe nalempwe wira: MWENE A AYUTA.

²⁷Nave vamosa n'iyowo yaahikhomeliwa alavi-lavi anli: Mmosa moono woolopwana, mukina moono woothiyana

²⁸Siiso yaahimaliheriwa yoolempwa enihimya wira: Aahikhalihiwa ntoko mutakhali.

²⁹Atthu yaavira vaavale yaaninveeha ettikinyaka muru, yiiraka: ?Khoo! Weyo, mulipa oopwexakasa empa ya Muluku n'uteka-tho mahiku mararu paahi!?

³⁰Wiisoopole mmansawo, okhuruwe vamwiikimanyo-vo.

³¹Nave-tho mukhulupale a anamukuttho n'awiixuttihi a ikano yaaninveeha Yesu, ehimeeryanaka mukina ni mukhw'awe wira: Oowoopola akina nto khaniwerya wiisoopola mmansawe!

³²Nyuwo Kristu, mwene a Isarayeli, mukhuruwe naanaano va vamwiikimanyo-vo, wira hoyo noone ni naamini. Nave-tho ale yaakhomelaniw'awe yaanimuruwana.

³³Ekhumelo yoothana eriyari mulaponi moothene yaahikhumelela ewiriphi mpakha iwoora tthaaru sa makaaripi.

³⁴Nto Yesu aahikhuwela vaalupale iiraka: ?Eloi, Eloi, Lama sapataani?? Otaphuleliwa w'aya enihimya wira: ?Muluku aka, Muluku aka mukinyanyalenleni??

³⁵Nto akina yaari vaavale vaamwiiwaly'aya yaanihimya wira: ?Mmwiiweke onimwiihana Eliya!?

³⁶Vano mulopwana mmosa aahivenya atthyawaka, aahinaaniha exiponxa ni eviinyu y'onyunya khutthukwelela vamutathini ananwuriha Yesu nto khuhimya wira: ?Mmuhiye nrowe nlipeleleke noone vakhala wira Eliya onimoorwa amukuruxe va mwiikimanyo!?

³⁷Vano Yesu aahikhuwela vaalupale nto khukhwa.

³⁸Ekuwo yuulupale ya mpaani mwa Muluku yaahikhereya eriyari, opacerya osulu mpakha vathi.

³⁹Mukhulupale a anakhotto eemenle ohoolo wa Yesu, oonne makhwelo awe aahiira: V'ekeekhayi mulopwan'ola aari Mwaana a Muluku!

⁴⁰Yaahikhala-tho vaavale athiyana akina yaawehexexa yeemenle ottaiwene. Mwa yaawo aahikhala-vo Maria a oMatala, ni Maria (maam'awe Yakopo mukhaani ni Yosefe) ni Salome.

⁴¹Athiyan'ala ti yaale yaamutthara n'umurumeela Yesu, okathi weettett'awe mu Kalileya. Yaaniphwanyaneya-tho weiwo athiyana anci-ene akina yaamutthanre Yesu mpakha oYerusalemu.

⁴²Makaaripi-ene, okathi wooweeteteliwa esaapatu, eyo p'iyo, namathanu nihinatthi okela nsuwa,

⁴³aahirwa Yosefe a w'Arimateya. Aari mulipa oovaha miruku oolemelihiwa vanci-ene, n'uwo-tho nave aaniwehererya orwa wa omwene wa Muluku. Owo aahilipiha murima nto khurowa wa Pilato orowa onvekela murutthu wa Yesu.

⁴⁴Pilato aahitikinihiwa vaaiwaly'awe yiriwaka Yesu ohookhwa nave aahiruma wiihaniwa mukhulupale a anakhotto wira amukohe vakhala wira aakhwiiye khalayi.

⁴⁵Vaamanly'awe ohimeeriwa ni mukhulupale a anakhotto, Pilato aahinvahererya murutthu wa Yesu Yosefe a w'Arimateya.

⁴⁶Owo aahirowa okuruxa murutthu vamwiikimanyo nave khuphapa n'isanta ya liinyu aathumaly'awe. Numala aahirowa onvitha munihiyeni naathimpwe vamwala nto aahipirikixa nluku nuulupale khuttiyelana mukhora wa nihiye.

⁴⁷Maria a oMatala ni Maria amey'awe Yosefe, yaaniwehexexa opuro waavithiw'awe.